Мыхэр о уицIыфых, Адыгеир
Адыгэм къыхэкIыгъэ лIышIу
Илъэпкъ ыпсэ хэлъыгъ, ащ паемэ, зэблэжьыщтыгъэп. Пытэу хэуцоу, зафэу гущыIэу. ЫшIэрэм гъуни-нэзи иIагъэп: адыгэм ышъхьэ къырыкIогъэ къэбари, тарихъ кууи, ижъырэ лъэпкъ жэрыIо творчествэм изэхэтыкIэ-гъэпсыкIи, акъыл къэкIопIэшхоу ар зэрэщытри, нарт тхыдэхэри, пщыналъэхэри, адыгэ литературэри, лъэпкъ шэн-хабзэхэри, зекIокIэ-шIыкIэхэри — зэкIэ адыгэ культурэр кIэзыгъэнчъэу ыгу щигъэшIуагъ.
ШIэныгъэ нэфыпсэу ыгу къыщыблэрэр зэфэдэкIэ зыщыщ илъэпкъ зэрэIуигъэкIэжьыщтымкIэ, ащ идахэрэ идэгъурэ зэриIэтыщтымкIэ, лъэужыкIэм теубытагъэ зыхэлъ лъэбэкъухэр ыдзынымкIэ, лъэпкъ гупшысакIэм гъогу фыхэхыгъэнымкIэ, гъэсэныгъэ-шIэныгъэшхоу зэригъэгъотыгъэр ныбжьыкIэхэм алъигъэIэсынымкIэ, адыгэ гупшысэм тамэ етыгъэнымкIэ Iофышхо ылэжьыгъ — кIэлэегъэджэ иныгъ, тхэкIуагъ, губзыгъагъ.
ЗыфасIорэр, лъытэныгъэ-шъхьэкIэфэ ин зэрэадыгэ дунаеу зыфашIыщтыгъэу, непи зыцIэ раIоу, Адыгеим ицIыф гъэсэгъабэм якIэлэегъэджэкIошхуагъэу Шъхьэлэхъо Абу ары. Джары цIыф гъэсэгъэ Iушыр зышIэрэ пэпчъ ащ зэреджэщтыгъэр, хигъэтIысхьэу гущыIэу, къызхэкIыгъэ иадыгэ лъэпкъ паемэ, ащ шIу къыдэхъункIэ ышIэмэ, уцуи тIыси имыIэу, мафи чэщи Iоф ышIэным фэхьазырыгъ.
ИкъэхъукI, иеджакI, иIофшIакI
Шъхьэлэхъо Абубэчыр Адышэс ыкъор Теуцожь районым ит къуаджэу Очэпщые мэлылъфэгъум и 19-м 1929-рэ илъэсым къыщыхъугъ. МэкъумэщышIэ-лэжьэкIо унагъом щапIугъэ кIалэм гупкIагъи, гулъыти, гукIэгъуи, къэрари ны-тыхэм ыкIи къоджэдэс нахьыжъхэм къыхалъхьагъ. ДаIорэр цIыфы мэхъу хабзэти, халъхьагъэр, зыпкъырищагъэр къыхэкIыжьыгъ.
«Емыджагъэр нэшъу» зэраIощтыгъэр Абу ыгу пытэу риубытагъ, къызыхэтэджэгъэ уахътэр гъуй-сый дэдагъэми, сыд ишIыкIэми еджэн, гъэсэныгъэм фэкIон зэрэфаер ышIэщтыгъ. ИкIэлэгъу пасэм ытхэу ригъэжьэгъэгъэ дневникым ар дэгъоу къеушыхьаты.
Сыдигъуи ыпэкIэ плъэрэр, ащкIэ зыдэлэжьэжьырэр лъыкIуатэ хабзэ. 1947-рэ илъэсым ащ къоджэ гурыт еджапIэр къыухыгъ ыкIи Адыгэ кIэлэегъэджэ училищым икурс экстернэу зы илъэскIэ къыти, икъуаджэу Очэпщые иублэпIэ еджапIэ илъэси 2, Нэчэрэзые илъэсибл еджапIэм кIэлэегъаджэу Iоф ащишIагъ.
1950 — 1951-рэ илъэсхэм дзэм къулыкъур щихьыгъ. Къыухи къызэкIожьым ПчыхьалIыкъое гурыт еджапIэм илъэси 3 Iоф щишIагъ. Ащ пыдзагъэу 1953 — 1957-рэ илъэсхэм Теуцожь райкомым икомсомол иятIонэрэ секретарэу, нэужым апэрэ секретарэу, комсомолым ыкIи партием яхэку комитетхэм Iоф ащишIагъ. Лажьэзэ, Адыгэ къэралыгъо кIэлэегъэджэ институтыр 1957-рэ илъэсым къыухыгъ. Мы илъэс дэдэм Шота Руставели ыцIэкIэ щыт шIэныгъэхэмкIэ Грузием и Академие иаспирантурэ чIахьи, 1960-рэ илъэсым къыухыгъ. 1968-рэ илъэсым филологие шIэныгъэхэмкIэ кандидат, 1986-рэ илъэсым филологие шIэныгъэхэмкIэ доктор хъугъэ. Студентэу зыщытыгъэ лъэхъанми, зэрэIушыр, зэрэгукIэгъушIэр къыхэщэу, ышэу Казбек ыкIи ятэшым ыкъоу IэпыIэгъу зимыIэм зэрилъэкIэу Абу адеIэщтыгъ, ежь къызфигъэныкъозэ, стипендием щыщ аритыщтыгъ — ари лIыгъэба ыкIи цIыфыгъэба. 1960 —– 1977-рэ илъэсхэм Адыгэ къэралыгъо кIэлэегъэджэ институтым кIэлэегъаджэу, кIэлэегъэджэ шъхьаIэу, доцентэу щылэжьагъ. 1977 — 1988-рэ илъэсхэм Адыгэ научнэ-ушэтэкIо институтым литературэмкIэ исектор ипэщагъ. 1988 — 1989-рэ илъэсым Адыгэ къэралыгъо институтым къэкIожьыгъ, адыгэ литературэмкIэ кафедрэм ипрофессорыгъ. Ыужырэ илъэситIум кIэлэегъаджэхэм яшIэныгъэ зыщыхагъэхъорэ институтым адыгэ филологием, тарихъым, культурэм якафедрэ щызэхещэ, ащ иIэшъхьэтетэу агъэнафэ. 1990-рэ илъэсым къыщегъэжьагъэу илъэс 20-м ехъум АРИГИ-м Iоф щишIагъ, литературэмкIэ отделым ипэщагъ.
Итворчеств, ытхыгъэхэр
Иадыгабзэ зэрикIасэу, зэрилъапIэр ыкIи иIэшIупс лъэш ащ зэрэзыIуищагъэр мыгъуащэу Шъхьэлэхъо Абу жэбзэ дахэ Iулъыгъ, иныдэлъфыбзэ пщынэ мэкъэ бзэрабзэм фэдагъ. ЛIы гъэсэгъэ-еджагъэм къыIощтыри ышIэщтыгъ, къэIокIэ-шIыкIэ амалыри IэкIэлъыгъ. Ытхыхэрэр 1954-рэ илъэсым щегъэжьагъэу хиутыщтыгъэх, адыгэ литературэм изэгъэшIэн-зэхэфын, икупкI, ишъуашэ, имэхьанэ къыраIотыкIэу ытхырэр багъэ. АдыгабзэкIэ тхылъэу къыдигъэкIыгъэхэр 10-м нахьыбэ мэхъух. Ахэм ащыщых «Адыгэ бзылъфыгъэр адыгэ литературэм къызэрэщигъэлъагъорэр», «Хэхъоныгъэм илъэуянэхэр», «Адыгэ фольклор», «Сатырхэм якъэхъукI», «МыкIосэрэ жъуагъохэр», «ЩыIэныгъэр. Литературэр. ПIуныгъэр», нэмыкIхэри.
УрысыбзэкIи тхылъхэр къыдигъэкIыгъэх: «Идейно-художественное своеобразие адыгейской литературы». «На пути творческого поиска». Шъхьэлэхъо Абу илитературоведческэ IофшIагъэхэм ащыщхэр гупчэ ыкIи чIыпIэ журналхэм къыхаутыгъэх. Советскэ энциклопедие иным, литературнэ энциклопедие ыкIи белорусскэ энциклопедием къадэхьагъэх.
Абу художественнэ произведениехэри ытхыщтыгъэх, ахэр гъэзетхэм, журналэу «Зэкъошныгъэм» къащыхиутыщтыгъэх. Тхылъхэр иIэх рассказхэмрэ повестхэмрэ дэтхэу: «ЛIыхъужъ машIу» ыкIи «Гум хэлъ мастэр», апэрэ произведениер тыркубзэкIэ зэрадзэкIыгъ. ЗэдзэкIы- гъэ IофшIагъэхэри кIэлэцIыкIу литературэмкIэ иIэх.
Егъэджэн IэпэIэсэныгъэу IэкIэлъ хъугъэр ыгъэфедэзэ Абу адыгэ литературэр гурыт еджапIэхэм зэрэщызэрагъэшIэщтым ипрограммэ зэхигъэуцогъагъ, я 9-рэ классым литературэмкIэ итхылъ, я 10-рэ классым иучебник (гъусэ иIэу), адыгэ литературэм иегъэджэнкIэ методи- кэр ытхыгъэх.
Общественнэ IофышIэкIуагъ
Адыгэ хэку хасэм изэхэщакIохэм ащыщыгъ, илъэсыбэрэ ащ ипэщагъ, етIанэ итхьамэтэ гъэшIогъагъ. Дунэе Адыгэ хасэм изэхэщакIохэм ащыщ, ащ ипрезидент иапэрэ гуадзэу, ыужым ипрезидентэу щытыгъ.
Шъхьэлэхъо Абу Iофышхоу илъэпкъ филэжьыгъэм медалэу «Адыгеим и Щытхъузехь» зыфиIорэр къыкIэкIуагъ. ШIур ыпхъэу щыIэгъэ лIышIоу Шъхьэлэхъо Абу Адыгэкъалэ ыкIи Теуцожь районым, къуаджэхэу Очэпщые, Щынджые, Аскъэлае яцIыф гъэшIуагъ. Ар Дунэе адыгэ академием иакадемикыгъ, Урысые Федерацием ыкIи Адыгэ Республикэм шIэныгъэхэмкIэ язаслуженнэ IофышIэшхуагъ. УФ-м итхакIохэм я Союз 1995-рэ илъэсым щегъэжьагъэу хэтыгъ.
Шъхьэлэхъо Абу гушъхьэлэжьыгъэ бай илъэпкъ къыфигъэнагъ, зы тхыгъэм а зэкIэ игъэфэгъуай. Щэч хэлъэп адыгэм къыхэкIыгъэ лIышIум ыцIэ егъашIи лъэпкъым зэрэготыщтым.
Мамырыкъо Нуриет.