«Угощэ дэгъумэ, урихьылIагъ»
Къуаджэм щыпсэурэ адыгэ унагъом ищыIакIэ, игумэкIхэм афэгъэхьыгъэ спектаклэу «Угощэ дэгъумэ, урихьылIагъ» зыфиIорэр Мыекъуапэ къыщагъэлъэгъуагъ.
Адыгэ Республикэм и Къэралыгъо Камернэ музыкальнэ театрэу Хьанэхъу Адам ыцIэ зыхьырэм къэгъэлъэгъоныр щыкIуагъ. Урысыем культурэмкIэ изаслуженнэ IофышIэу Цэй Ерыстэм ытхыгъэм техыгъэ музыкальнэ спектаклэр ятIонэрэу театрэм щагъэуцугъ. Режиссерыр Урысыем, Адыгеим искусствэхэмкIэ язаслуженнэ IофышIэшхоу Сулейманов Юныс.
Адыгэ Республикэм искусствэхэмкIэ изаслуженнэ IофышIэшхоу, Урысыем икомпозиторхэм я Союз хэтэу Хъупэ Мурат мэкъамэхэр ыусыгъэх. Оркестрэм ипащэр Адыгэ Республикэм изаслуженнэ артистэу Аркадий Хуснияров.
Пьесэр зытхыгъэр
— Аскъэлае культурэм и Унэ ипащэу илъэсыбэрэ Iоф щысшIагъ. Пенсием сызэкIом, сытхэным фэшI уахътэу сиIэр нахьыбэ хъугъэ. СызыгъэгумэкIырэ Iофыгъохэу щыIэныгъэм хэслъагъохэрэм яхьылIагъэу пьесэр стхыгъэ, — къытиIуагъ драматургэу Цэй Ерыстэм.
Зыфэгъэхьыгъэр
Адыгэ унагъом нысэ къыфащагъ. Гуащэри, пщыри мэгушIох, нысэр агъашIо. Бэ темышIэу нысэр мыдаIоу, лъэпкъ шэн-хабзэхэр ыукъохэу фежьэ. Нысэр зэрэшъхьахынэм дакIоу, бырсырхэр къыпкъырэкIых, илI игъусэу къалэм щыпсэун имурадэу къеIо…
ЛIакъом ишэн-хабзэхэр гукIэ зымыштэрэ нысэм ироль къешIы артисткэу Кобл Зурыет.
НэшIэ-IушIэу зызышIырэ нысэм ишэн-зекIуакIэхэр артисткэм дэгъоу къегъэлъагъох. Нэщх-гущхэу мэзекIо. Ролым куоу хэхьан зэрилъэкIыгъэм ишIуагъэкIэ, пьесэр щыIэныгъэм къызэрэхэхыгъэм псынкIэу гу лъыотэ.
Унагъом игумэкI
Гуащэм ироль фэгъэзэгъэ ЛIый Бэлэ уедэIузэ, адыгэ унагъом къуаджэм щыIакIэу щыриIэм ухещэ. Ащ ишъхьэгъусэ ироль артистэу Бэгъ Алкъэс къешIы. Гуащэр хъупхъэ, унагъом иIофыгъохэм язехьан фэгъэсагъ. Пщыр адыгэ хъулъфыгъэ шъыпкъ. ГумэкIыгъо иIэ зыхъукIэ, гъукIэу щагум дэт, игушIуагъо ыIэтынэу мурад зишIыкIэ, ишъхьэгъусэу Насыпхъанэ гущыIэгъу фэхъу, псынкIэу гурэIо.
Артистхэм шIушIагъэу афэтлъэгъурэм щыщ нэплъэгъукIэ зэрэзэгурыIохэрэр. Орэдыр къэгъэлъэгъоным дэгъоу щагъэфедэ. Режиссерым иIофшIагъэ къыхэтэгъэщы артистхэм къаIорэ орэдхэр ролэу къашIыхэрэм гумэкIыгъоу къащаIэтырэм зэрэдиштэхэрэр. Орэдыр гум къигущыIыкIы зыхъукIэ, артистым игущыIэ нахьышIоу къыплъегъэIэсы.
Нысэм ишъхьэгъусэу Дзэгъащтэ ироль къэзышIырэ артистэу Шъхьачэ Арсен гуфэбэныгъэ зыфыуегъэшIы. Ар колхозым хэт, IэнэтIэ хэхыгъэ щыриI. ЗэхэщэкIо дэгъу, иIофшIакIэ цIыфхэм агу рехьы, гъэзетэу «Адыгэ макъэм» ащ ехьылIэгъэ гущыIэ фабэхэр къыхиутыгъэх. Арэу щытми, Дзэгъащтэ ишъхьэгъусэ фэгъэдаIорэп, зэфэгубжых, зэхэкIыжьых. Артистэу Шъхьачэ Арсен ишэн-зекIуакIэхэмкIэ зыкъыуегъаштэ. Янэрэ ятэрэ агурыIонэу фэмыегъэ нысэм ясабый унагъом изыхыжьыгъэр Дзэгъащтэ егъэмысэ. Артистыр шъабэу зэрэзекIорэм, макъэр зэригъэуцурэм къэгъэлъэгъоным ихудожественнэ амалхэр къыщыхэщых.
Нысэм къегъэзэжьы
Нысэм зэгъэпшэнхэр зешIыхэм, унагъом къыгъэзэжьынэу рихъухьагъ. Сабыим пщымрэ гуащэмрэ фэзэщыгъэх. Унэгъо хъызмэтыри нысэм зэрихьэ хъугъэ, къызэригъэзэжьыгъэм фэшI унагъом гъунэгъухэр, Iахьылхэр къыфэгушIуагъэх. Адыгэ пщы- нэр агъэжъынчызэ, къэшъуагъэх, уджыгъэх.
Унагъом исабыеу Эдуард адыгэ шъуашэр щыгъэу пчэгум къехьэ, гушIуагъор адегощы…
Зэфэхьысыжьхэр
— Республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан, Дунэе Адыгэ Хасэм хэтэу МэщфэшIу Нэдждэт, культурэм иIофышIэу ШъэуапцIэкъо Аминэт, нэмыкIхэм бэрэ къытаIуагъ адыгабзэкIэ спектаклэхэр къэдгъэлъэгъонхэу. Адыгабзэр щыIэныгъэм нахьышIоу щыдгъэфедэн зэрэфаер, цIыфхэм яеплъыкIэхэр къыдэтлъытэхи, къэгъэлъэгъоныр икIэрыкIэу дгъэуцужьыгъ. Зэхэщэн IофхэмкIэ Адыгэ Хасэр IэпыIэгъу къытфэхъугъ, зэкIэми тафэраз, — къыIуагъ режиссерэу Сулейманов Юныс.
Адыгэ Хасэм ыцIэкIэ зэхахьэм къыщыгущыIагъ МэщфэшIу Нэдждэт.
— Хэгъэгу уиIэмэ быракъи, бзи, театри уиIэщт, — къыIуагъ Н. МэщфэшIум. — Камернэ музыкальнэ театрэм икъэгъэлъэгъон тыгу рихьыгъ, хэхъоныгъэхэр ышIынхэу фэтэIо.
Адыгэ Хасэм ищытхъу тхылъхэр, нэпэеплъ шIухьафтынхэр къэгъэлъэгъоным игъэуцун Iоф дэзышIагъэхэм, артистхэм язытыжьыгъэхэ Н. МэщфэшIумрэ Къ. Къуижъымрэ къызэраIуагъэу ащ фэдэ спектаклэхэу пIуныгъэм фэгъэхьыгъэхэр непэ тищыкIагъэх.
ЕплъыкIэхэр
Къэгъэлъэгъоным еплъыгъэхэ ШъэуапцIэкъо Аминэт, Мыгу Эдуард, Нэхэе Аслъан, Щэукъуй Нурыет, Бастэ Асыет, Роман Корчагэ, ГъукIэлI Зухра, ХьатхьакIумэ Аскэрбый, Хьакъуй Аслъан, фэшъхьафхэм къытаIуагъ спектаклэр агу зэрэрихьыгъэр.
Пьесэр зытхыгъэр пчэгум къырагъэблагъи фэгушIуагъэх, Iэгу фытеуагъэх.
Адыгэ унагъом ищыIакIэ фэгъэхьыгъэ спектаклэр мэлылъфэгъум и 28-м ятIонэрэу Мыекъуапэ къыщагъэлъэгъощт.
ЕмтIылъ Нурбый. Сурэтхэр къэгъэлъэгъоным къыщытетхыгъэх.