Хэгъэгум иорэдыIохэм язэнэкъокъоу «ЖъогъуакI» зыфиIо­рэр мэлылъфэгъум и 17-м рагъажьэ.

Илъэс къэс зэхащэрэ зэнэкъокъум Урысыем ишъолъырхэр хэлажьэх.

Адыгэ Республикэм искусствэхэмкIэ иколледж ия 3-рэ курс щеджэрэ Елизавета Призовар телекъэтынэу «Жъогъуа­кIэм» рагъэблэгъагъ. Республикэм ыцIэкIэ блэкIыгъэ илъэсхэм хэ­гъэгум иорэдыIо ныбжьыкIэхэм язэнэкъокъу хэлэжьагъэх Мышъэ Азидэ, Юрий Конжиныр, Апэнэс Астемир зыхэт эстрадэ купыр, фэшъхьафхэри.

2018-рэ илъэсым А. Апэнасэр зыхэт купым Урысыем апэрэ чIыпIэр къыщыдихыгъ. Адыгэ Рес­публикэм изаслуженнэ артистэу Апэнэс Астемир зэнэкъокъур шIо­гъэшIэгъоныгъ, къэбарэу къытфиIотагъэр макIэп.

Адыгэ Республикэм изаслуженнэ артисткэу, ансамблэу «Ошъутенэм» иорэдыIоу Даутэ Сусанэ 2019-рэ илъэсым зэнэ­къокъум я 7-рэ чIыпIэр къыщихьыгъ. Мыекъуапэ итворческэ купэу «Ошъа­дэм» иорэдыIоу Цышэ Зарет 2020-рэ илъэсым я 4-рэ чIыпIэр «Жъогъуа­кIэм» къыщихьыгъ.

— Джаджэ сыщыщ. Зэ­шыпхъуищ тэхъу, шына­хьыкIи сиI, — къытиIуагъ Елизавета Призовам. — Илъэси 6-м ситэу зэха­хьэ­хэм сахэлажьэзэ, искусствэм пыщагъэ сы­хъугъ. Эстрадэ, лъэпкъ орэдхэр, романсхэр, пат­риотическэ пIуныгъэм фэ­гъэхьыгъэхэр, нэмыкI­хэри къэсэIох. Орэдыр сыгу рихьыным фэшI гу­пшысэу хэлъым мэхьанэ есэты. ЗэкIэ орэдэу къас­Iохэрэр сыгу рехьых. Адыгэ Республикэм инароднэ артисткэу, зэлъашIэ­рэ орэдыIоу Нэхэе Тэ­марэ сикIэлэегъадж. Ащ лъэшэу сыфэраз. Жанрэ зэфэ­шъ­хьафхэмкIэ орэд къэсIоным сыфегъасэ. Ма­къэр зэрэбгъэIорышIэщтыр, орэдэу къапIорэм икупкI къызэрэзэIупхыщтыр, фэшъхьафхэри сэркIэ мэхьанэшхо зиIэ Iофыгъох.

ШъунаIэ тешъудз:

«ЖъогъуакIэм» фэгъэ­хьыгъэ къэгъэлъэгъонхэр телеканалэу «Жъуагъом», онлайным инэкIубгъохэм ащышъулъэгъущтых. Мэлылъфэгъум и 17-м апэрэ къэтынхэм шъуяплъын шъулъэкIыщт.

Урысыем ишъолъыр 85-рэ зыхэлэжьэрэ зэнэ­къокъум Адыгэ Респуб­ли­кэм щыщ пшъашъэу Елизавета Призовам исэнаущыгъэ къыщигъэлъэгъощт. Ащ чIыпIэу къыдихыщтыр телекъэтынхэм яплъыхэ­рэм бэкIэ ялъытыгъ. ОрэдыIом макъэу фатырэм ипчъагъэ зэхэщакIохэм кIэухым къалъытэжьыщт. 2021-рэ илъэсым, мэкъуогъум и 14-м хагъэунэ­фыкIырэ чIыпIэхэр къы­дэзыхыгъэхэм шIухьафтынхэр аратыжьыщтых.

Искусствэр зышIогъэшIэгъонхэр! Телекъэтынхэм шъуяплъ, шъугу ри­хьыгъэ орэдыIохэм шъумакъэхэр афэшъутых. Елизавета Призовам мэкъэ дахэу иIэм шъуедэ­Iу, къахэжъугъэщ! Елизаветэ Адыгэ Респуб­ли­кэм ыцIэ искусствэм лъагэу щиIэты шIоигъу.

Опсэу, Елизавета! Тхьэм уигухэлъышIухэр къыбдегъэхъух.

ЕмтIылъ Нурбый.