Терроризмэм пэшIуекIогъэнымкIэ комиссиеу Тэхъутэмыкъое районым щызэхащагъэм зэхэ­сыгъо иIагъ.

Iофтхьабзэм хэлэжьагъэх Адыгеим лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, Тэхъутэмыкъое район администрацием ипащэу Шъхьэлэхъо Азмэт, муниципалитетым инарод­нэ депутатхэм я Совет итхьа­матэу Хьатит Алый, Урысыем хэгъэгу кIоцI IофхэмкIэ и Министерствэ иотделэу Тэхъутэмыкъое районым щыIэм ипащэ ипшъэрылъхэр зыгъэцакIэу Шэ­хэлI Къэплъан, щынэгъончъэнымкIэ Федеральнэ къулыкъум АдыгеимкIэ и ГъэIорышIапIэ илIыкIоу Дмитрий Власовыр, район прокурорым иIэпыIэгъу шъхьаIэу Константин Волковоир, общественнэ движениеу «Адыгэ Хасэм» итхьаматэу ЛIымыщэкъо Рэмэзан, дин зэфэшъхьафхэм ялIыкIохэр, нэмыкIхэри.

Терроризмэм ыкIи экстремиз­мэм апэшIуекIогъэным, лъэпкъ ыкIи дин зэгурыIоныгъэр гъэпы­тэгъэным япхыгъэ Iофыгъохэм къэзэрэугъоигъэхэр атегущыIагъэх.

Шъхьэлэхъо Азмэт мы лъэны­къомкIэ чIыпIэ зыгъэIорышIэ­жьыпIэхэм япшъэрылъхэр зэрагъэцакIэхэрэм къытегущыIэзэ, пэшIорыгъэшъ Iофтхьабзэхэм язэхэщэн анахьэу анаIэ зэрэтырагъэтырэр хигъэунэфыкIыгъ.

Ащ пае, район программэу «Гармонизация межнациональных отношений и развитие национальных культур на территории МО «Тахтамукайский район» зыфиIорэр аштагъ. Ащ ипшъэрылъ шъхьаIэхэм ащыщых муниципалитетым лъэпкъ зэмызэгъыныгъэ къимытэджэным Iоф дэшIэгъэныр, террориз­мэм пэшIуекIогъэныр, цIыфхэм языкIыныгъэ ыкIи язэгурыIоныгъэ гъэпытэгъэныр.

Дин зэфыщытыкIэхэм ыкIи кощыным епхыгъэ Iофыгъохэм язэхэфын фэгъэзэгъэ межведомственнэ комиссие зэхащагъ. Программэм къыдыхэлъытагъэу Iофтхьабзэу рагъэкIокIыхэрэм язэфэхьысыжьхэр псэупIэхэм япащэхэм къашIых.

Анахьэу кIэлэ Iэтахъохэм ыкIи ныбжьыкIэхэм анаIэ атырагъэты. Лъэпкъ зэфыщытыкIэхэр гъэпытэгъэным фытегъэпсыхьэгъэ IофшIэныр районым иеджапIэхэм ащылъагъэкIуатэ. Лъэпкъ зэфэшъхьафхэм къахэкIыгъэ кIэлэцIыкIухэр нахь зэпэблэгъэнхэм, ныбджэгъуныгъэ азыфагу илъыным фэIорышIэх зэхащэрэ зэдэгущыIэгъухэр, литературнэ пчы­хьэзэхахьэхэр, зэнэкъокъухэр.

Лъэпкъ ыкIи дин зэфыщытыкIэхэм алъэныкъокIэ Iофхэм язытет зыфэдэм, радикализмэм пэшIуекIогъэнымкIэ Адыгеим ыкIи Пшызэ шъолъыр ащыпсэу­хэрэ быслъымэнхэм я ДиндэлэжьапIэ зэпхыныгъэу дыряIэм къатегущыIагъ Комитетым итхьаматэу Шъхьэлэхъо Аскэр. Ащ къызэриIуагъэмкIэ, Адыгеим икъэралыгъо программэу «Лъэпкъ зэфыщытыкIэхэр гъэпытэгъэныр ыкIи патриотическэ пIуныгъэр» зыфиIорэм къыдыхэлъытагъэу Iофтхьэбзэ гъэнэфагъэхэр рагъэкIокIых.

Экстремизмэм ыкIи терроризмэм апэшIуекIогъэнымкIэ Iоф зэрэзэдэпшIэн плъэкIыщтыр Адыгеим иобщественнэ организациехэм ящысэкIэ дэгъоу къыб­гурэIо. ГущыIэм пае, зэпхыныгъэ пытэ зэдыряIэу зэдэлажьэх движениехэу «Адыгэ Хасэр», «Пшызэ къэзэкъыдзэм и Мые­къопэ отдел», Адыгеим иславянхэм, ермэлхэм, къэндзалхэм, урымхэм ясоюзхэр, нэмыкIхэри. Джащ фэдэу Комитетым Iоф адешIэ диаспорэ зэфэшъхьафхэм япащэхэм ыкIи яактивистхэм.

Ислъам диныр мамырныгъэм, зэфагъэм, шIушIагъэм ятамы­гъэу щыт. «Ислъам терроризмэр» зыфиIорэ къэIуакIэр тищыIэныгъэ къызыхэхьагъэр бэшIагъэп. Ар къохьэпIэ хэушъхьэфыкIыгъэ къулыкъухэм яIофшIэн къыкIэлъыкIуагъ. Мы терминыр агъэфедэзэ, IэубытыпIэ ашIызэ ахэм геополитическэ пшъэрылъхэр агъэцакIэх.

Официальнэ СМИ-хэм къы­зэратырэмкIэ, хэбзэухъумэкIо къу­лыкъухэм яшIуагъэкIэ мы аужырэ илъэсищым дин-экстремистскэ ячейкиплIым яIоф­шIэн республикэм щызэпагъэугъ.

2021-рэ илъэсым Гупчэ Азием хэхьэрэ республикэхэм ащыщ горэм къикIыгъэм республикэм теракт щызэрихьанэу зигъэхьазырзэ къаубытыгъ.

Зэхэсыгъом къыщыгущыIэ­гъэхэ ЛIымыщэкъо Рэмэзан, динлэжьхэу Мысс Асфар, Тхьаркъохъо Аскэр ыкIи къэзэрэу­гъоигъэхэм зэкIэми зэдаштагъ быслъымэн ныбжьыкIэхэр Ислъамым ишапхъэхэмкIэ пIугъэнхэм непэ мэхьанэшхо зэриIэр.

Болэт Меда.