Зэкъошныгъэр агъэпытэзэ

Дунаим щыцIэрыIохэ къэшъокIо ансамблэхэу «Кабардинкэмрэ» «Налмэсымрэ» зэгъусэхэу Мыекъуапэ концерт къыщатыщт.

Адыгэ Республикэм и Къэралыгъо академическэ къэшъо­кIо лъэпкъ ансамблэу «Налмэсыр» зызэхащагъэр мыгъэ илъэс 85-рэ мэхъу. Ансамблэм июбилейрэ къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэмрэ афэгъэхьыгъэ пчыхьэзэхахьэхэр Къыблэ шъолъырым, Темыр Кавказым, нэмыкIхэм ащыкIощтых.

Непэ, мэлылъфэгъум и 15-м, зы лъэпкъым иансамблитIумэ «Зы бзэ, зы хабзэ, зы лъэпкъ» зыфиIорэ яконцерт Мыекъуапэ игъэкIотыгъэу щыкIощт.

— Ансамблэхэм яартистхэр зэхэтхэу лъэпкъ къашъохэр къызэдашIыщтых, искусствэм идэхагъэ къагъэлъэгъощт, — къытиIуагъ «Налмэсым» ихудожественнэ пащэу, Адыгэ Респуб­ликэм инароднэ артистэу, Пшызэ, Абхъазым язаслуженнэ артистэу Хъоджэе Аслъан.

«Кабардинкэм» ихудожественнэ пащэу, Адыгэ Республи­кэм изаслуженнэ артистэу Iэтэбый Игорь Адыгеим иныбджэгъушIу. Ансамблэ цIэрыIохэр зэгъусэхэу зэкъошныгъэм ипчыхьэзэхахьэ зэрэхэлэжьэщтхэм мэхьэнэ ин иIэу елъытэ.

Зэкъошхэм япчыхьэзэхахьэ онлайным инэкIубгъохэм къащагъэлъэгъощт. Дунаим концертым зэрэщеплъыщтхэм тегъэгушхо. Искусствэ лъагэм ыбзэкIэ зы бзэ, зы хабзэ зиIэ зэлъэпкъэгъухэм япчыхьэзэхахьэ Адыгеим, Урысыем ямызакъоу, зэкIэ дунаим щыпсэурэ хэгъэгухэм ялъэпкъхэр зэфищэщтых, язэфыщытыкIэхэр ыгъэпытэщтых.

Шъукъашъу, шъуудж, тилъапIэхэу «Кабардинкэр», «Налмэ­сыр»! Тэ Iэгу тышъуфытеощт, гукIэ тыкъыжъудэшъощт, шъуищытхъу дунаим щашIэщт.

Шъопсэу, «Кабардинкэр», «Налмэсыр», зэкъошхэм яп­чы­хьэзэхахьэ лъапсэу фэшъушIыгъэр орэпытэ.

Мыекъуапэ щыкIощт зэхахьэм адыгэ быракъыр гуфитэу щагъэ­быбэтэщт, зэдэпсэурэ лъэпкъхэм зэхахьэр мэфэкI афэхъущт.

ЕмтIылъ Нурбый.