Апшъэрэ купым хэт футбол клубхэу хэгъэгум изэнэкъокъу хэлажьэхэрэм я 25-рэ ешIэгъухэр яIагъэх.

Апэ ишъын зылъэкIыщтхэр зэIукIэгъухэм къащынэфагъэх.

КIэуххэр

«Химки» — «Тамбов» — 1:0, «Уфа» — «Ахмат» — 3:0, «Арсенал» — «Краснодар» — 1:0, «Шъачэ» — «Зенит» — 1:2, «Локомотив» — «Спартак» — 2:0, «Динамо» — «Урал» — 2:2, ЦСКА – «Ротор» — 2:0, «Рос­тов» — «Рубин» — 0:1.

Зэтэгъапшэх

Команди 6-мэ къэлапчъэм Iэгуаор дадзэн алъэкIыгъэп. Адыгэмэ ятарихъ къалэу Шъачэ иклуб «Зенит» дешIэзэ, я 58-рэ такъикъым Бурмистровым къэлапчъэм Iэгуаор дидзагъ. «Зенит» нахьыбэрэ ыпэкIэ илъызэ, я 63-рэ ыкIи я 80-рэ такъикъхэм Азмун «Шъачэ» икъэлапчъэ Iэгуа­ор дидзагъ, 1:2 пчъагъэр хъугъэ.

«Краснодар» итренер шъхьаIэ зэблахъугъ. В. Ганчаренкэр IэнэтIакIэм Iухьагъ, ау ащ къызэриIуа­гъэмкIэ «Краснодар» иешIакIэ шIэхэу зэблихъущтэп, ыпэкIэ щешIэхэрэм агъэразэрэп. Я 62-рэ такъикъым Чаушич къэлапчъэм пэчыжьэу зыдаом, ухъумакIохэм апхырыкIыгъэ Iэгуаор Сафоновым къыубытынэу амал ыгъотыгъэп.

ЦСКА-м иешIакIохэу Эджуке я 45-рэ такъикъым, Рондон я 70-м «Ротор» икъэлапчъэ Iэгуаор дадзагъ.

«Локомотив» 2:0-у «Спартак» текIуагъ. Камано я 22-рэ, Смоловым я 45-рэ такъикъхэм Iэгуа­ор хъагъэм дадзагъ. «Локомотив» текIоныгъэр къыдихыгъэми, «Спартак» гугъэр чIинэрэп, медальхэм афэбэнэщт.

«Зенит» дышъэр ыхьыщтэу тэлъытэ. Тыжьыным, джэрзым клуби 5 афэбанэ.

ЧIыпIэхэр

1. «Зенит» — 54 2. «Спартак» — 47 3. «Локомотив» — 46 4. ЦСКА – 46 5. «Рубин» — 43 6. «Динамо» — 43 7. «Шъачэ» — 40 8. «Химки» — 38 9. «Ростов» — 37 10. «Краснодар» — 34 11. «Ахмат» — 32 12. «Урал» — 30 13. «Арсенал» — 20 14. «Ротор» — 18 15. «Уфа» — 17 16. «Тамбов» — 13.

Ауж къинэхэрэм яIофхэр нахь хьылъэ мэхъух. Клуби 4-мэ гумэкIыгъуабэ яI.

Я 26-рэ зэIукIэ­гъухэр

17.04 «Краснодар» — «Зенит» «Ахмат» — «Химки» «Локомотив» — «Ростов» «Ротор» — «Динамо» 18.04 «Спартак» — «Уфа» «Шъачэ» — ЦСКА «Арсенал» — «Тамбов» «Урал» — «Рубин». «Краснодар» «Зенит» зэрэдешIэщтыр ушэтыпIэшIу фэ­хъущт.