Адыгэм идунай. Сириер.
Дунаим щыпсэурэ адыгэхэм афэгъэхьыгъэ къэбархэр къэсыугъоиныр сигухэлъэу хэгъэгу пчъагъэхэр къэскIухьагъэх. А гъогум нэIуасэ щысшIыгъэ силъэпкъэгъухэм сымгъэгъуащэхэу адэсшIыгъэ зэпхыныгъэхэр нэужми, илъэс пчъагъэ тешIагъэми, зэпысымычхэу гъашIэм къыздесэхьакIых, сэгъэпытэх.
Зэ сызаIокIэм къысфаIотэгъэ къэбархэри сщымыгъупшэхэу, языIахь хэз фэмыхъоу, къэсэшIэжьых. Ащ фэдэу Шам хэгъэгум 2010-рэ илъэсым сызэкIом, згъэшIэгъонэу къэбарыбэ щызэхэсхыгъагъ. Сыдэущтэу сщыгъупшэн адыгэ тхэкIошхоу КIэрэщэ Тембот 1959-рэ илъэсым мы хэгъэгум щыпсэурэ Адэл Абдылсалам зэрэфэтхэгъагъэр? А письмэр ыгъэлъапIэу ащ ибысым къызэрэсигъэлъэгъугъагъэр сынэгу зэрэкIэт.
Географие шIэныгъэхэмкIэ докторэу, Дамаск университетым икIэлэегъэджэ гъэшIуагъэу Адэл Абдылсалам мы къызэкIэлъыкIогъэ илъэсхэми сыдэгущыIэ зэпытыгъ. Тинасыпышъ интернетыр къаугупшысыгъ, ащ тызэшIуигъэкIодырэп. Непэ анахь узфэгумэкIын адыгэ щыIэмэ, ахэр Сирием щыпсэухэрэр арых. Якъэбархэм сакIэупчIэныр сигухэлъэу Адэл Абдылсалам зыфэзгъэзагъ. ТигущыIэгъу бэ тыгу къыгъэкIыжьыгъэри, шъхьэихыгъэ къытигъэшIыгъэри.
— Адэл, сигопэ дэд мырэущтэу услъэгъузэ сыкъызэрэбдэгущыIэрэр. Технологиер кIуачIэ, онлайн-зэдэгущыIэгъухэри теттхэхэу къэтлъэгъужьыгъ. Сирием интернет шъуиIэмэ, ари дэгъуба...
— Опсэу, Нэфын. УкъызэкIом цIэу къыпфэсшIыгъагъэмкIэ сыкъыоджэщт сэ. Светланэм арыба къикIырэр?
— Ары. Сигопэ дэд, цIэ дах къысфэуусыгъэр.
— Интернетыр тIэкIу жъажъэу мэлажьэми, тиI, шыкур ари. Шъыпкъэ, загъорэ зэпыугъохэр фэхъух, сыхьат-сыхьатэу электричествэр къытаты. Къэралыгъор зэIыхьагъ, къин тыхэт, зэкIэ узэрэфэе дэдэу къыпIэкIахьэрэп. Ау дгъотырэми тезэгъы, сыд пшIэщт. Интернетым тпсэ джыри зэрэпытыр рытэIуатэ, джырэкIэ адыгэм идунай тызэрэпышIагъэр а зыр ары. Лъэпкъым шъхьапэ фэхъущт тхыгъэхэм сапыкIырэп, ахэр Фейсбукым бэу къисэгъахьэх. Мы пандемие зэманым унэм тишIыхьагъэба, егъашIэм улэжьагъэ хъумэ къины зи умышIэу утIысыжьыныр. Арышъ, сэтхэ зэпыт, гушъхьэ лэжьыгъэхэм сапылъ.
— Сирием тыкъызэкIом, къуаджэу Мардж-СултIан узщыпсэущтыгъэр. Ар джырэкIэ зэхакъутагъэу зэхэтхыгъ. Сыд о уиунэ икъэбар?
— Чылэр дэгъоп, къэбарышIу зи дэлъэп. О укъызэкIо лъэхъаным нэбгырэ минищ фэдиз дэсыгъ. Непэ унэгъо 15 горэ дэсыжьми ары. Ахэр зыдэкIон ямыIэ паекIэ къыдэнагъэхэшъ ары нахь, ущыпсэушъунэу псэупIэжьэп Марджыр. Пчъэ-шъхьаныгъупчъэхэр унэмэ аIутхъыгъэх, акIоцI зы псэуалъэ арытыжьэп, зэрапхъуагъ зэпстэур. Джыдэдэм ащ зэо-банэ дэтыжьэп. Ау унэ ныкъо-тыкъохэм сыдэущтэу уачIэсыщт? БгъэцэкIэжьынхэ пIомэ, ахъщэ цIыфхэм аIэкIэлъэп. Сэ мары пенсие мин 50 къысаты, зы хьалыгъу килограмм къэпщэфыщтмэ, минипшI лъыоты, бензин литрэ 20-м пенсием изыщанэ ыхьыщт. Сэ джыдэдэм Дамаск сыщыI, сикIалэ сыдэпсэу, загъорэ къуаджэм тэкIо, тыкъыдаплъэ, сихапIэ умышIэжьынэу хъугъэ, къэгъэгъэ хатэу угу зэкIугъагъэхэри щыIэжьэп, унэ кIоцIым итыгъэ пстэур зэрапхъуагъ. Джа тхылъеджапIэу сыугъоигъагъэу зытепхыгъагъэми зи къыхэнэжьыгъэп. БзэджашIэхэм машIо кIадзи агъэстыгъэх тхылъхэр. УчIэсышъунэу унэр щытэп, гъонэ-сан, дэпкъхэр зэгочыгъэх, апчхэр хэлъыжьэп. Iофыр хъатэп, зэрэхъущтыри зыми ышIэрэп. Ау а политикэм ащ фэдизэу сырыгущыIэнэу сыфаеп.
— А бэнакIохэу шъхьафитыдзэр зызфэзыусыжьыгъэхэр чылэм дэтыжьхэба?
— Дэтыжьхэп, ау цыхьэ зыфэпшIыщтыри пшIэрэп. Сириер зэрэхъугъэр джыдэдэм — хэти джасусым фэдэу уеплъы. ШIу зыгу илъыри, лые къыозыхыщтыри зэхэпшIыкIырэп. Загъорэ топ о макъэхэри къэIух, заор зэпыупагъ пIонэу щытэп. УдэмыкIымэ зэкIэм анахь дэгъу. Мырэхьатыныгъэ щыIакIэм илъэсипшI хъугъэу тыхэтэу къэтэхьы, джы мы уз емынэри къыхэхьажьи, тиIофхэр зэIигъэхьэпагъэх. Мы Шам сызтес урамым мафэ къэс джыназитIу-щы темытэу хъурэп. Ары шъхьаем, коронавирусыр щымыIэу аIо тикъэралыгъокIэ. Дунаир зэлъикIугъэу, тэ къыднэмысыныр сэ сшIошъ хъурэп.
— Коронэр щымыIэу аIомэ, ащыгъум «нэгуихъохэр зыIушъулъхь», «унэм шъукъимыкI» е, сэшIа, «шъуIэхэр шъутхьакIых» аIорэба? Е вакцинэр зыхэшъулъхьанэу къаджэхэрэба?
— Хьау, ащ фэдэ щыIэп. Ары шъхьаем, зэхэшIыкI зиIэ цIыф тхьамыкIэхэм дунаим щыхъурэр алъэгъуба, ягъунэгъу-яIахьылхэри зэрэсымаджэхэрэр алъэгъушъ, ежь-ежьырэу зыIуалъхьэ нэгуихъохэр. Мастэ хэлъхьагъуми игугъу къашIырэп, сшIэрэп къыднэсыщтми. «Урысыем къикIыщт, Китаим къикIыщт» аIо. Вакцинэр къыднэсыми, ар, сэ сызэрегуцафэрэмкIэ, ащэщт. Ащ фэдэ зыхъукIэ, «пIэ дагъэмэ пшъхьэ щыфэжь» адыгэхэм зэраIоу тыхъущт. Ар тэ тфэщэфыхэнэп. ТиIоф дэи.
— Адэл, къэпIуатэхэрэр тхьамыкIагъу. Тхьэм шъукъеухъум. Сирием укъыщыхъугъ, ущеджагъ. Германием ущылэжьагъ, зэ «Сахарэ пшэхъуалъэр сыушэтыщт» пIуи, Африкэ, Азие къэралыгъохэми уанэсыгъагъ. УиIофшIэн, уисэнэхьат шъхьаIэ къытфытегущыIэба, сыдэущтэу географие шIэныгъэр къыхэпхынэу хъугъагъа?
— Мы къэпIуагъэхэм сагъэгушIуагъ, сыда пIомэ, илъэсипшI ыпэу къыпфэсIотэгъагъэхэр пщыгъупшагъэхэп. Университетым сэ 1951-рэ илъэсым сычIэхьагъ. А лъэхъаным дзэм ухэхьаным лъэшэу уасэ иIагъ, цIыфхэм ашIолъэпIагъ. Сэри ахэмэ сащыщыгъ, дзэм сыхэхьанышъ, стамэ жъуагъо тезгъэтIысхьанышъ, Дамаск иурамхэм сызэпэшIэтэу сарыкIоныр, пшъашъэхэр къызэзгъэплъынхэр… кIо кIэлэ ныбжьыкIэ гупшысэхэр къесхьакIэу сыхэтыгъ. Дзэм исатырхэми сахэуцоным пае ушэтынхэр скIугъагъэх ыкIи сапхырыкIыгъагъ. Ары шъхьаем, тибын зэхэгущыIэжьи, университетым ущеджэныр нахь гъогу тэрэзэу къысфыхахыгъ, «зы еджагъэ горэ къытхэрэкI» къысаIогъагъ. Джаущтэу апшъэрэ еджапIэм сычIэхьагъ. КIэлэегъаджэ сыхъунэу седжэгъагъ, илъэс заулэри сисэнэхьат сырылэжьагъ. Ау а лъэхъаным хабзэу щыIагъэмкIэ, университетыр дэгъоу къызыуухыкIэ, аспирантурэ къыкIэлъыкIожьыныр хабзэу щытыгъ. ЕтIани шIэныгъэлэжь гъогум укIагъэхъопсэу зы шапхъэ щыIагъ. Узфэе къэралыгъо къыхэпхынышъ, докторыцIэр къыщыбгъэшъыпкъэжьынэу укIошъущтыгъэ. Германием джаущтэу сыкIонэу хъугъагъэ. Магистрэм ащ сыщыфеджагъ картограф сыхъунэу. Картэм адыгэхэм чIыпIэтх раIо. Джаущтэу чIыпIэтхыхэр зэхэзгъэуцонхэу нэмыц хэгъэгум зыщызгъэсагъ. ДокторыцIэм икъыдэхын етIанэ илъэсищэ ыуж ситыгъ. «Геоморфологие» зыфаIорэ шIэныгъэр ары докторыцIэр къызэрэдэсхыгъэр. Нахь къыбгурыIоным пае къикIырэр къэсIон — чIынапэм икъушъхьэхэмрэ икъуладжэхэмрэ язэхэтыкIэ уушэтыныр ары. Сызщеджагъэр къохьэпIэ Берлин ишъхьафит университет ары. Сыкъэтыфэ зы ушэтын горэ ахэм агъэхьазырыгъагъ. Ливием, Нигерием, ЧАД-м кIонхэшъ, Сахарэ ипшэхъуалъэ аушэтынэу фаехэу. ШIэныгъэлэжь купым сэри сыхагъэхьагъ, зэкIэмкIи мэзищэ Сахарэ сыкъэтыгъ. Шъыпкъэр уфаемэ, Нэфын, джы къызнэсыгъэми сыкIэнэцIы а лъэныкъом зэ сыкIожьынэу.
— Ащ фэдизэу пшIогъэшIэгъоныгъа?
— СызщыIэгъэ уахътэр кIэлэгъум иуахътэу щытыгъ. УиныбжьыкIэгъур зыщыбгъэкIуагъэм уфызэкIэплъэжьызэ гъашIэр къэохьы. Дамаск къызысэгъэзэжьыми пшэхъуалъэхэм яжьырэ япсырэ сыушэтыным сыпылъыгъ. Тэри тихэгъэгу пшэхъо чIыпIэхэр къебэкIых, арышъ, ащ фэдэ чIыналъэ зэхэтыкIэр Сирием шIоIофэу ыушэтыныр игугъугъ. СишIэныгъэ гъогу джащ фэдэу Кувейт, Эмиратхэм, Иран сищэгъагъ. Сидиссертацие зыфэгъэхьыгъагъэр пшэхъуалъэхэр зыдэщыт чIыпIэхэр илъэс минипшI-тIокI ыпэкIэ сыд фэдагъэха? Яжь сыд фэдагъа? Ос къащесыщтыгъа? Оялэхэу щытыгъэха? Зыгорэ къащыкIыщтыгъа? Джа пшэхъо чIынэлъэ чIэгъхэм тятIыхызэ, къуладжэхэм ягъэпсыкIэхэм тяплъызэ, ятIэмэ танэсымэ, ахэр зэрэзэхэлъхэр тыушэтызэ, тизэфэхьысыжьхэр тшIыгъэх. Къэдгъотыгъэр — Сирием илъэс мин 12 ыпэкIэ ощхи щыIагъ, къушъхьэхэм ос-мылхэри илъэс ренэм ателъыщтыгъэ, джа Iошъхьэмафэ фэдэу щытыщтыгъэх. Джары Африки, Азии къызфэскIухьагъэр.
— Къызыогъэзэжьым Дамаск университетым кIэлэегъаджэу ущылэжьагъ ара?
— Ары, профессорыцIэр къыдэсхыгъ, сыушэтыгъэ шIэныгъэхэр къэзгъэшъыкъэжьыгъэх. Ау сыуцугъэп, джыри зы гъогу сапэ къикIыгъ. Профессор пэпчъ фитыныгъэ иIагъ ащыгъум илъэсныкъо Iоф зишIахэкIэ зы хэгъэгу горэм кIонышъ, ыушэтыгъэ шIэныгъэхэм джыри ахигъэхъонэу, ащ къыщылэжьэнэу. Сэ Япониер къыхэсхыгъ ыкIи ащи илъэсрэ сыкъисыгъ. Ащ сиунагъуи зыдэсщэгъагъ. ГъэшIэгъоны джы къыпфэсIотэщтыр.
— Ащ сыд узфэкIогъагъэр? Сыд къыщыуушэтыгъэр? Токио ара уздэщыIагъэр?
— СызфэкIуагъэр къоджэдэсхэм ямэкъумэщ Iофхэр зэрэзэрахьэрэр, ядунай зэхэтыкIэ елъытыгъэу къагъэкIырэр, тэ СириемкIэ пштэмэ, ахэм атехыгъэу сыд къэдгъэкIышъущтыр? Джа упчIэхэр ары сыушэтыгъэхэр. Ары шъхьаем, хъугъэр гъэшIэгъоны. Зы мазэ горэм сыщыIагъэу Хоккайдо университетэу Саппоро иректор къысфытеуагъ: «Уадыга, адыгабзэ ошIа?» ыIуи. «СэшIэ» зысэIом, «зы тхьамафэм сыхьатитIу къытфыхэпхызэ, адыгабзэ ебгъэшIэнэу студентибл къыпфэдгъэкIощт» ыIуагъ. Ары шъхьаем, зы адыгэбзэ тхылъ сIыгъэп, хьарыфылъэ сIэкIэлъэп, сыдэущтэу язгъэшIэщт? КъызэрэчIэкIыгъэмкIэ, ежьхэм зэкIэ яIагъ, Адыгеим къикIыгъэу адыгабзэм узэрэфеджэщт тхылъ 50 фэдиз хъоу, адыгэ гъэзетхэри, журналхэри аIыгъыгъэх. «Адыгэ макъэр» къызыдэкIыгъэм мэфищ тешIагъэу къаIэкIахьэщтыгъэ.
— Сыдэу гъэшIэгъоны мы къэпIуатэрэр! Сыдым пае адыгабзэр зэрагъашIэщтыгъа? Сыд фэдэ илъэсыр ары ар зыхъугъагъэр?
— 1982-рэ илъэсыр ары. Дунаим бзэу тетыр зэкIэ зэрагъашIэу, аушэтэу щытыгъэх. Джаущтэу илъэс реным адыгэбзэ курс афызэхэсщагъ, зытэухым, адыгабзэ ашIэ хъугъэ. ЕтIанэ, Сирием къэзгъэзэжьыным ыпэкIэ, джыри зы лъэIукIэ зыкъысфагъэзагъ. ГущыIэ мин зыдэт япон-адыгэ гущыIалъэ афызэхэзгъэуцонэу къысэлъэIугъэх. АфэзгъэцэкIагъ ыкIи а гущыIалъэр нэужым къыхаутыжьыгъагъ. — Адэл, илъэс 11 ыпэу уадэжь тыкъызеблагъэм сыдэу мы къэбарыр къысфэмыIотэгъагъа?
— О укъызэрэкIогъагъэр къэпшIэжьырэба? Жьыхьарзэм уфэдагъ, нартхэм ащ фэдэ хьакIэм сыд раIорэр? МэшIуахьэ укъэкIуагъэм фэдагъ. Чэщ хэкIотагъэу укъилъади, уиIоф бгъэцакIи, нэфылъэ къызэрэкIидзэу къуаджэм удэлъэтыжьыгъагъ. Зы тхьамафэрэ ущыIагъэмэ, къэбар гъэшIэгъоныбэ зэхэозгъэхыщтыгъэ.
— ШъыпкъэмкIэ, тиуахътэ кIэкIыгъэ, игъо тыфифагъэп нахьыбэрэ Мардж-СултIаным тыдэсынэу. Сирием мэфипшIэ тыщылэжьэгъагъ ащыгъум, сымышIахэу мы хэгъэгум адыгэхэм афэгъэхьыгъэ къэбарэу щызэхэсхыгъагъэр бэ дэд. Джыри зэ къэзгъэзэжьыныр симурадэу сыкъыдэкIыжьыгъагъ. Ау тэ гухэлъ тэшIы, Алахьэм зэрегъэзафэ. Заор къежьи, тикъакIо зэпигъэугъ. Адэл, адэ Хэкум сыдигъо укъэкIуагъа? О уилIакъокIэ Лащхэм уащыщ, уилъэкъоцIэгъухэр, уиунэкъощхэр бгъотыгъэхэу щытха?
— Японием ыуж Хэку гъогум сыкъытехьагъ. Апэу сыкъызэкIом, Налщык Дунэе Адыгэ Хасэм изэфэс сыкъеблэгъэгъагъ. Адыгэ лъэпкъ Iофхэм ауж сихьагъэу щытыгъ, Сирие Адыгэ Хасэм сыритхьаматэуи илъэс заулэм сылэжьагъ. Тэ тызтекIыгъэ титэтэжъ «Лащ цIыкIур» раIощтыгъэ. Сятэ бэрэ къысиIощтыгъэ тэ Югославием тыкъикIыжьыгъэу, къуаджэу зыдэсыгъэхэм Мадэн ыцIагъ. «А чылэр зэзгъэгъотын, хэта зышIэрэр, тиунэкъощхэр джыри дэсынхэкIи хъун» сIуи, апэ картэхэмкIэ къуаджэм сылъыхъугъ, ау къэзгъотыгъэп, нэужым машинэм ситIысхьи, 1984-рэ илъэсым Югославием, Косовэ сыкIуагъ. Адыгэхэр къэзгъотыхи, Тхьэм рахьмэт къырет, Рэщыд Абазэ аIоу, ащ иунэ сыригъэблагъи, сихьэкIагъ. Хэкум къэкIожьыгъагъ а лIыр, Мэфэхьаблэ дунаим щехыжьыгъ. ЗэкIэмэ сяупчIы, «тыдэ щыIа мы Мадэныр?» сэIошъ. Ау зыми ышIэрэп. ЕтIанэ илъэси 110-рэ ыныбжьэу зы арнаут лIыжъ горэм ыдэжь сащагъ. Ащ ышIэу къычIэкIыгъ Мадэн къуаджэри, дэсыгъэхэри. КъызэриIогъагъэмкIэ, чылэм ыцIэ зэблахъуи, Руд фаусыгъ. «Адыгэ унагъоу дэсыгъэхэр Цэйхэр, Лащхэр» къызысеIом, сыгу къипкIыщтэу сшIошIыгъагъ. Лащхэр зэшищ хъухэу зэрэдэсыгъэхэр, тIур Тыркуем, зыр Сирием зэрэкIуагъэхэр къысфиIотэгъагъ. Аужырэу зыцIэ къыриIогъагъэр сятэжъ ары. Джащ къыщегъэжьагъэу силIакъо илъэужхэм салъыхъоу сыублэгъагъ. 1991-м хэкум сыкъакIуи, ныбджэгъушIоу сиIэгъэ ХьэдэгъэлIэ Аскэр есщажьи, Лащхэм салъыхъоу сыублагъ. Джыракъые унэгъуитIу, Къэбэртаем унэгъуищ дэсхэу къычIэкIыгъ. Джащ фэдэу Тыркуеми, Германиеми сиунэкъощхэр къарызгъотагъэх.
— Къэбар гъэшIэгъонхэр къэоIуатэх, Адэл. НэIуасэ тыззэфэхъум къэпIотэгъагъэхэр джы къызнэсыгъэми сщыгъупшэхэрэп. Хэкум упышIагъэ зэрэхъугъагъэр згъэшIагъо икъугъагъ. А тхылъ къэмланэ къызэрэпфагъэхьыгъагъэр, КIэрэщэ Тембот, ХьэдэгъэлIэ Аскэр уакъызэрэфатхэщтыгъэр, КIэращэм иджэуап тхыгъэу 1959-рэ илъэсым къыпфигъэхьыгъагъэр непэ фэдэу сыгу къэкIыжьых. Хэгъэгу зэошхом ыуж зэтеуцожьырэ Адыгэ хэкур зэрэпсэурэр, губгъомэ натрыф хьасэхэр зэращытIэмыхэрэр, адыгэ бзылъфыгъэхэр еджэхэ зэрэхъугъэхэр тхакIом къызэрэпфитхыгъагъэхэр сщыгъупшэрэп.
— Опсэу, Нэфын, аущтэу тарихъ къэбархэм уасэ зэрафэпшIырэмкIэ, зэрэпщымыгъупшэхэрэмкIэ. 1957-рэ илъэсым Москва ныбжьыкIэ фестивалэу щыIагъэм Сирием икуп хэлэжьэгъагъ. Ахэм ахэтыгъ сэ синэIосэ араб лIы горэ. КъызэкIожьым, адрес тхыгъэ тхьапэм тетэу къысфихьыгъ. Налщык къикIыгъэ къэшъокIо купым адыгэ шъуашэхэр щыгъэу зелъэгъум, зэрэадыгэхэр гурыIуи, якъэбар кIэупчIагъ сэщ пае. Кирилл тхакIэр сэр-сэрэу зэзгъэшIагъэу щытыгъэти, а адресэу къысIэкIэхьагъэмкIэ письмэ згъэхьыгъэ. Адыгэ тхакIохэр щыIэхэмэ, ахэм къыдагъэкIыгъэ тхылъхэм сакIэлъэIугъ къысфагъэхьынэу.
Илъэс тешIагъэу, сызэрэтхагъэри сщыгъупшэжьыгъэу, почтэм къэмлан горэ къысфэкIуагъэу макъэ къысагъэIугъ. Iанэм тефэми тефэ къодыеу, пхъуантэ къысфэкIуагъ. Къысфэзгъэхьыгъагъэр Налщык щыщэу Елбэт Хьасан. Къызэдэсхымэ, къыдэкIырэр тхылъы, журнал, гъэзет. О укъызэкIом ахэр зэкIэ озгъэлъэгъугъагъэх. КIэращэмрэ ХьэдэгъалIэмрэ нэужым сафэтхэнэу езгъэжьагъ. Джаущтэу блэкIыгъэ лIэшIэгъум ия 60-рэ илъэсхэм хэкум апэрэ зэпхыныгъэхэр дэсшIыгъагъэх. Сэ симызакъоу, Сирием ис адыгэхэри къыкIэлъэIухи, адрес заулэ ястыгъагъ. Сыда пIомэ, а Елбэт Хьасан сикъэбар хэкумкIи афиIотагъэу щытыгъэти, бэхэр къысфатхэхэу аублэгъагъ.
— Ащыгъум хэхэс ыкIи хэкурыс адыгэхэм лъэпкъ лъэмыдж афэбгъэпсыгъагъ, зэпыпшIагъэх.
— Ары зэрэщытыгъэр, ау гукъаор — джа уасэ зыфэшIыгъое тхылъхэу къысфэкIогъагъэхэр зэкIэ заом дэкIуагъэх. Ар зы гуузэу сиI. КIо, сыд пшIэн. ХьэдэгъалIэмрэ сэррэ ныбджэгъушIу тызэфэхъуи, нартхэм якъэбар угъоякIоу щытыгъэба, бэрэ тызэдэлэжьагъ ащ пае. Апэрэ письмэм кIэдзагъэу къысфатхэ къэс, нартхэм якъэбар нахь Iоф зи иIагъэп. Сириеми заулэрэ къэкIуагъ, нэжъ-Iужъхэм зэдэгущыIэгъухэр адишIэу, адыгэ къуаджэхэр къызэдэткIухьагъэх. КIэрэщэ Тембот слъэгъунэу синасып къыхьыгъэп, сыкъыкIэхьажьыгъэп. Хэкум сыкъызэкIом, ар дунаим ехыжьыгъагъ. КъэсшIэжьырэр апэу ар къызысфатхэм, тхыгъэр хэутыгъэу къыгъэхьыгъ, ау сэ сыкIэлъэIугъагъ IэпэрытхыкIэ къысфэтхэгъагъэмэ нахь сигуапэщтыгъэу. ЯтIонэрэ письмэр ыIэкIэ къытхыгъ, ау, шъыпкъэм уфаемэ, зэхэпшIыкIынэу щытыгъэп, итхыбзэ къиныгъэ, ежь закъор арын фай еджэшъунэу щытыгъэр. Арэу щытми, а тхыгъэр сэ лъэшэу сшIолъэпIэ дэдагъ.
— Джыдэдэм сыд Iофэу пшIэрэр, Адэл? Зыгорэ отха? Сыд зыуж уитыр?
— ИлъэситIу хъугъэу зыгъэпсэфыгъо уахътэм сыщыI, сылэжьэжьрэп. Японием сыкъэтзэ гущыIалъэу зэхэзгъэуцогъагъэм фэдэхэр нэужыми сыугъоигъэх. Адыгэ-араб гущыIалъэ къыдэзгъэкIыгъ, нэужым адыгэ-урыс географие термин гущыIалъэ сыугъои, Мыекъуапэ къыщыдэзгъэкIыгъ. 2011-рэ илъэсым араб-адыгэ гущыIалъэ къыхэсыутыгъ. ГущыIэ мин 35-рэ дэт. Ар анахь IофшIэгъэ инэу сшIыгъэр ары. Ащ нэмыкIэу статья 500 фэдиз адыгэм фэгъэхьыгъэу стхыгъэ. Джахэмэ сапылъ. КIо джырэкIэ ахэр Фейсбукым къыхэсэутых. Нахьыбэу сыздэлажьэрэр адыгабзэр ары.
Тиныдэлъфыбзэ зэрэкIодырэр гумэкIыгъо дэд. ТыркуемкIэ латиныбзэм зыратыгъэу адыгабзэр зэрагъэшIэн агу хэлъ, ау ащкIи зэгурыIуагъэхэп.
— Адэ сыд тшIэнэу плъытэрэр тыбзэ къэтыухъумэнымкIэ?
— Непэ тилъэпкъ хэгъэгу 50 тIощтыгъэмэ зэрысыр, джы 60-ми блэкIыжьыгъ. Тянэхэм тэ бзэр тагъэшIагъ, джы ныхэмэ адыгабзэр ябгъэшIэн фай ыпэ рапшIэу. ЕтIанэ еджапIэхэр тимакIэх, ахэр хэкур ары нахьыбэу зыдэщыIэхэр. Мары Тыркуеми, Германиеми бзэ конференциехэр ащыIагъэх, ахэр латиныбзэм техьэхэ ашIоигъу, ары шъхьаем хэкум ащ фэдэ хьарыфылъэ ыштэщтэп егъашIэми. Хэкум имылъ тхыбзэр пштэкIэ зи пкIэ иIэп. Ары сэ ясIорэр, ащ зэрэщытхэхэу утхэн фай. Ащ нэмыкIэу сэ зэрэслъытэрэмкIэ, адыгэр къэзыгъэнэщтыр ахъщэр ары. Ар уиIэмэ, IэшIэхэу бзэр ябгъэшIэщт. ГущыIэм пае, зы фабрикэ дэгъу зэIупхыщт мэзэ лэжьэпкIэ дэгъу къыщахьэу. Щылэжьэщтыр адыгабзэ зышIэрэ закI. Афэмыхъоу зэрагъэшIэн бзэр шIэх дэдэу. Ахъщэр зыбгъотырэм, бзэри бгъотыжьыщт, шIэныгъэри уушэтыжьыщт.
— Мыщ фэдизэу адыгэ лъэпкъым уфэгумэкIэу уигъашIэ къэохьы. Зы зэман горэм хэкумкIэ зыкъэбгъэзэн гухэлъ уиIэу уни талъэныкъо щыпщэфыгъагъ. Ау хэхъухьагъэр сшIэрэп, сыд къиныгъуа узгъэщтагъэр? Сыдэу хъугъэми, укъэкIожьыгъэп чIыгужъым. Сэ лъэшэу сигухэкI ощ фэдэ лIы Iуш, шIэныгъэлэжь губзыгъэ IэкIыбым зэрэщыIэр, илъфыгъэхэри адыгэм зэрэпэчыжьэхэр.
— ТызэрэцIыкIоу кIэтыдзагъэу хэкум тыфалIэзэ непэ нэси къэтэхьы. Iофыр зытетыр — унэгъо 17 тыхъоу Сирием щыщ адыгэхэм тызэгурыIуи, Мыекъуапэ иурамэу Пролетарскэм тет унэхэм ащыщ псэупIэхэр къыщытщэфынэу ахъщэ къэдгъэхьыгъагъ. Ар зыхъугъагъэр 1991-рэ илъэсыр ары. Илъэсищ фэдизэ Iофым ыуж титыгъ, ау зэман пхэнджым тыхэфэгъагъа, сшIэрэп хэхъухьагъэр, тызгъэпцIэгъэ цIыфхэр тапэ къикIыгъэх. Миллионерэу къытэплъыщтыгъэх, ахъщэр къытпытэкъоу къашIошIыщтыгъэ. Тиахъщэ тшIокIодыгъ, уасэхэр хэгъэхъогъащэу къытаIуагъ, зыгорэ къытпатхъынэу ыуж итыгъэх, Урысые хэгъэгуми игъэпсыкIэ зызэпригъэзагъ, къыддэхъугъэп тигухэлъ.
— Адэ укъыфэзэщырэба хэкум джы? Мыекъуапэ, Налщык бэшIагъэ укъызымыкIуагъэр.
— Мардж-СултIаным икъэхалъэ Iуашъхьэ горэм тет, Мыекъуапи иадыгэ къэхалъэ тIэкIу теIэтыкIыгъэу щыт. Тыдэ учIалъхьэмэ нахь дэгъущт? Мы упчIэм сигъашIэ зыщыригъэзыхыгъэм бэрэ сегупшысэ сэ. Ау джы сыдэущтэу згъэзэжьын, сыд сипсэукIэ зыфэдэщтыр? Джэуап сиIэп ащкIэ.
— Сирием нахьи нахьышIуIоу ущыпсэунэу сэ къысшIошIы, Адэл.
— Тэрэз зыфапIорэр, мыдкIэ адыгэ унагъоу исхэр зыщыгугъыхэрэр джа нэмыкI къэралыгъо кIуагъэхэм къафагъэхьыщт ахъщэр ары. КъэсIуагъэба хьалыгъум ыуасэр, ау джар къэпщэфыным паи сыхьатищэ чэзыум ухэтыщт. Сирием непэ миллион 12 икIыжьыгъ. Уиныбджэгъури уиджэгъогъури пшIэрэп. Тшъхьэ рыкIорэм ишъыпкъапIэ зыми ышIэрэп. Ау Iоф псынкIэп зыкъэпIэтыныр. Нахьыбэм икIырэр хэгъэгум джыдэдэм ныбжьыкIэхэр арых. Ныбжьыр кIуагъэу джы сыдэущтэу укощын? СэркIэ ар къины.
— Шам Адыгэ ШIушIэ Хасэр мэлажьа? Ащ амал горэ IэкIэлъа?
— Мэлажьэ, бэмышIэу итхьаматэ зэблахъугъ. Непэ зыгъэIорышIэрэр Шорэ Хьасан. Еджагъэу, университетым ипрофессорэу щыт. КIэлэ гъэсагъ, адыгабзэ ешIэ, а зым изакъоми сэ сыфэраз. Лъэшэу сыщэгугъы, лъэпкъ зэхашIэри зымгъэгъощэрэ цIыфышъ, игухэлъхэр зэкIэ къыдэхъунэу.
— Тхьэм шъуигухэлъхэр къыжъудегъэхъух. Опсэу, Адэл, гущыIэгъу укъызэрэсфэхъугъэмкIэ.
— Ори опсэу, Iофы зебгъэшIэу укъызэрэткIэупчIэрэмкIэ. Сэ сызэрэлъаIорэр, мы адыгэ купэу дунаим итэкъухьагъэу тетхэр яныдэлъфыбзэкIэ гущыIэжьынхэу, илъэс миних хъугъэу зыпсэ хэт адыгэбзэ дахэр мыкIодынэу. Лъэпкъыр щызгъэIэщтыр тыбзэ. АщкIэ тызщыгугъырэр Хэкур ары. Бзылъфыгъэхэр ары анахьэу зызфэзгъазэ сшIоигъор — ялъфыгъэхэм ныдэлъфыбзэр арагъэшIэнэу сялъэIу.
ТIэшъу Светлан. Адыгеим изаслуженнэ журналист.