Республикэм и Къэралыгъо филармоние икъэгъэлъэгъопIэ цIыкIу «ШIулъэгъу къэгъэгъэ Iэрам» зыфиIорэ пчыхьэзэхахьэр щыкIуагъ.

Гъатхэм щыIэныгъэр къегъэ­дахэ. Гъатхэм, шIулъэгъум тха­кIохэр, композиторхэр афэусэхэзэ, ягупшысэхэр цIыфхэм алъагъэIэсых. Филармонием пчыхьэзэхахьэр щызезыщэгъэ Ирина Ибрагимовар шIулъэгъу къабзэм фэгъэхьыгъэ усэхэм къяджагъ, зэгъэпшэн гъэшIэ­гъонхэр ышIыгъэх.

Александр Пушкиным, Сергей Есениным, нэмыкI тхэкIо цIэ­рыIохэм шIулъэгъум ехьылIагъэу аусыгъэхэр щыIэныгъэм зэрэхэмыкIуакIэхэрэр тиорэдхэм ахэтэлъагъо.

Дунэе фестиваль-зэнэкъо­къухэм ялауреатхэу Нэгъой Бэллэ, Сергей Трутневым шIу­лъэгъу орэдхэр къаIуагъэх. Сергей Пособиловым музыкальнэ Iэмэ-псымэхэмкIэ орэдыIохэр ыгъэжъынчыгъэх.

Дунэе хэгъэгу фестивальхэм щытхъуцIэхэр къащыдэзыхыгъэ Набэкъо Бэллэ фортепианэмкIэ къадежъыугъ, произведениехэр къыригъэIуагъэх.

Адыгэ къэшъо мэкъамэу Набэкъо Бэллэ ыусыгъэр авторымрэ Сергей Пособиловымрэ узыIэпищэу къырагъэIуагъ. Лъэпкъ гуп­шысэр къыхэбгъэщызэ, музыкантхэм уядэIу.

Композитор цIэрыIохэу Шопен, Блантер, Варламовым, фэшъхьафхэм япроизведениехэр пчыхэзэхахьэм щызэхэтхыгъэх. Адыгэ Республикэм инароднэ артисткэу Нэгъой Маринэ мэкъэ хэхыгъэкIэ орэдыбэ къыIуагъ. Нэгъой Маринэрэ ащ ыпхъоу Бэллэрэ зэгъусэхэу бзэ зэфэшъхьафхэмкIэ къыхадзэгъэ орэдхэм шIулъэгъу къэабзэр къыраIотыкIы.

ЗэлъашIэрэ композиторэу, Урысыем инароднэ артистэу Тхьабысымэ Умарэ ыусыгъэхэ орэдхэм шIулъэгъум ипчыхьэзэхахьэ къагъэдэхагъ. Тхьабысымэ Умарэрэ Жэнэ Къырымызэрэ зэдаусыгъэ «О унитIур» М. Нэгъоим къызыхедзэм, залым чIэсхэр Iэгу фытеуагъэх, тимылъэпкъэгъухэри дежъыугъэх. «Къэбар дах», «Орэдыр о зигъэгъус», нэмкIхэри артистхэм ка­Iуагъэх.

ШIулъэгъум ипчыхьэзэхахьэ хэлэжьагъэхэр гущыIэгъу зэфэхъу­гъэх, нэпэеплъ сурэтхэр атырахыгъэх. Артистхэм шIулъэгъу къабзэр къизыIотыкIырэ къэгъэгъэ Iэрамхэр аратыгъэх.

Сурэтхэм арытхэр: пчыхьэзэхахьэм хэлэжьэгъэ артистхэр.