ИмэфэкIкIэ тыфэгушIо
ТиIофшIэгъоу, тигъэзет иныбджэгъушIоу, адыгэ лъэпкъым къырыкIощтым ыгъэгумэкIэу, илъэпкъ фэшъыпкъэу ХьашIуцIэ Мухьамэд къызыхъугъэр илъэс 75-рэ тыгъуасэ хъугъэ.Мухьамэд Мусабый ыкъор Къэбэртэе-Бэлъкъар республикэ гъэзетэу «Адыгэ псалъэ» зыфиIорэм иредактор шъхьаI, шIэныгъэхэмкIэ Дунэе адыгэ академием ивице-президент, Урысые Федерацием культурэмкIэ изаслуженнэ IофышI, Адыгеим, Къэбэртэе-Бэлъкъарым, Къэрэщэе-Щэрджэсым язаслуженнэ журналист, Къэбэртэе-Бэлъкъар Республикэм и Адыгэ Хасэ итхьамат, Дунэе щэрджэс ассоциацием и Совет хэт, Адыгэ Республикэм иапшъэрэ тынэу «Адыгеим ищытхъузехь», абхъаз орденэу «Напэмрэ Щытхъумрэ» зыфиIохэрэр, Iимамэу Щамилэ и Дунэе фонд ыгъэнэфагъэу мамырныгъэм и Дышъэ медаль, мамырныгъэм и Советскэ фонд и Дышъэ медаль, щэрджэс Дунэе фондым ишIухьафтынэу «Отличие» зыфиIорэр къыфагъэшъошагъэх.
1997-рэ илъэсым къыщыублагъэу ХьашIуцIэ Мухьамэд «Адыгэ псалъэм» иредактор шъхьаI. Тигъэзетеджэхэр зэрэщыгъуазэхэу, зэкъош республикищым язэхэт номерхэр илъэсипшI пчъагъэ хъугъэу къыдэкIых, номери 120-м къехъугъэх. ХьашIуцIэ Мухьамэд IофшIэным фаблэрэ цIыф, ынэхэм нэфынэр къакIихэу, лъэпкъым игукIае игунэсэу, ихъяр пстэуми алъигъэIэсы шIоигъоу щыт.
Тарихъым, культурэм афэгъэхьыгъэ тхыгъабэ М. ХьашIуцIэм къыдигъэкIыгъ, тикъэралыгъо имызакъоу, дунаим щыпсэурэ тилъэпкъэгъухэм зэлъашIэ.
Мухьамэд имэфэкI мафэкIэ тыфэгушIо, псауныгъэм къыщымыкIэу, Iофэу зэшIуихырэм хигъэхъон амал иIэу, ыкIуачIэ изэу ригъэжьэрэ пстэури къыдэхъунэу, бэгъашIэ хъунэу тыфэлъаIо!