Театрэм и Дунэе мафэ фэгъэхьыгъэ зэхахьэхэр Адыгэ Республикэм икъалэхэм, районхэм гъэшIэгъонэу ащыкIуагъэх.

Республикэм и Къэралыгъо Камернэ музыкальнэ театрэу Хьанэхъу Адамэ ыцIэ зыхьырэм иIофшIапIэ Адыгеим итеатрэхэр щызэIукIагъэх.

Iофтхьабзэр Адыгэ Респуб­ликэм инароднэ артистэу Сихъу Станислав зэрищагъ. Театрэм щыIэныгъэм чIыпIэу щыриIэр илъэс къэс нахь пытэ зэрэ­хъурэм, цIыфыр театрэм зэри­пIурэм, усакIохэр, драматург- хэр театрэм зэрэфатхэхэрэм С. Сихъур къатегущыIагъ.

КIэлэцIыкIухэм ятеатрэу «Дышъэ къошыным» иартистхэм театрализованнэ едзыгъохэр къашIыгъэх. ГукIэгъу хэлъэу цIыфыр зэрэпсэун фаем дакIоу, иIофхэр ежь-ежьырэу ыгъэцэкIэнхэм яхьылIэгъэ пычыгъо­хэр орэдым диштэхэу къаIотагъэх.

Адыгэ Республикэм культурэмкIэ иминистрэу Аулъэ Юрэ зэхахьэм къыщыгущыIагъ. 2020-рэ илъэсыр къинэу зэрэкIуа­гъэм, зэпахырэ узым къыхэкIэу спектаклэхэр онлайн шIыкIэм тетэу театрэхэм къызэрагъэ­лъэгъуагъэхэм, театрэр зышIогъэшIэгъонхэм артистхэр алъы­Iэсынхэ зэралъэкIыгъэм министрэм осэ ин фишIыгъ.

Районхэм ащыIэ культурэм я Унэхэр, республикэм и Лъэпкъ театрэу Цэй Ибрахьимэ ыцIэ зыхьырэмрэ Урыс къэралыгъо театрэу А. С. Пушкиным ыцIэ зыхьырэмрэ зычIэтхэ унэр зэрагъэцэкIэжьырэр, Адыгэ Республикэм и ЛIышъхьэу КъумпIыл Мурат, Правительствэр кIэщакIо афэхъухэзэ, театрэхэм язэхэщэн Iофхэр нахьышIу зэрэхъугъэхэр министрэм къыхигъэщыгъэх, мэфэкIым фэгъэхьыгъэу къафэгушIуагъ.

Узыгъэщхырэм уегъасэ

Театрэхэм ямэфэкI къэгъэлъэгъонхэр сэмэркъэум, гущыIэ щэрыохэр зэрэбгъэфедэщтхэм, цIыф зэфыщытыкIэхэм, шIулъэгъум, нэмыкIхэм афэгъэхьы­гъагъэх.

Лъэпкъ театрэу И. Цэим ыцIэ зыхьырэм иартистхэу КIэмэщ Разыет, Даур Жаннэ, Нэхэе Мэрджанэт, Къэбэхь Анзор, Жъудэ Аскэрбый, Хьакъуй Андзаур, фэшъхьафхэри мэфэкIым хэлэжьагъэх. Адыгэ орэдышъо дахэу зэхахьэм щыжъынчырэм къыдэшъуагъэх. Адыгэ шэн-хабзэхэр зэрэзепхьащтхэр пчэгум къыщагъэлъэгъуагъэх.

Лъэпкъ театрэм ихудожественнэ пащэу Хьакъуй Аслъан къытиIуагъ ыгу ихыгъэу узыгъэ­гъэщхырэм шIу къыпфишIэ зэрэшIоигъор къызыхэщырэ театрализованнэ пычыгъохэр гъэшIэгъонэу зэрэзэпхыгъэхэр.

Театрэм и Дунэе мафэ ипэгъокIэу Мамый Ерэджыбэ ытхыгъэм техыгъэу «ГъашIэм имэзищ» зыфиIорэр Лъэпкъ театрэм Мыекъуапэ къыщигъэлъэгъуагъ.

Артистхэу Джолэкъо Рэщыд, КIэмэщ Разыет, Даур Жаннэ, Бэгъушъэ Анзор, Хьакъуй Андзаур къэгъэлъэгъоным рольхэр къыщашIыгъэх.

ШIулъэгъум икъежьапIэхэр

Урыс Къэралыгъо театрэу А. С. Пушкиным ыцIэ зыхьырэм иартистхэм шIулъэгъум, гъатхэм идэхэгъу, фэшъхьафхэм яхьы­лIэгъэ едзыгъохэр къашIыгъэх. ЩыIэныгъэм къыхэхыгъэхэр гум рехьых. Гъатхэр гум къикIырэ шIулъэгъум зэрэдиштэрэм фэгъэхьыгъэ усэхэр, къэшIынхэр щхэных, уагъэгупшысэ.

— Тигуапэу тирольхэр къэтшIыгъэх, цIыфхэр дгъэщхыгъэх, — къытиIуагъ Урыс Къэралыгъо театрэм иартисткэу Элеонора Парковам. — Непэ сценэм къытехьагъэх Хъуаджэкъо Азэмат, Оксана Светловар, Жьылэгъот Заремэ, нэмыкIхэри. Адыгеим артист гъэшIэгъонхэр иIэх, уяплъызэ узыIэпащэ.

Адыгэ Республикэм и Къэралыгъо Камернэ музыкальнэ театрэу Хьанэхъу Адамэ ыцIэ зыхьырэм ихудожественнэ пащэу, Урысыем, Адыгеим искусствэхэмкIэ язаслуженнэ IофышIэшхоу Сулейманов Юныс зэхэщэкIо купым хэтыгъ, Iофыгъуабэмэ кIэщакIо афэхъугъ.

— Республикэм итеатрэхэр зы пчэгум зэрэщызэIукIагъэхэм мэхьэнэшхо етэты, — къыти­Iуагъ Сулейманов Юныс. — Артистхэр гущыIэгъу зэфэхъугъэх, шIыкIабэмэ зэдягупшысагъэх.

Владислав Верещако, ЛIый Бэллэ, Давид Манакьян, нэ­мыкI артистхэр едзыгъохэм ахэлэжьагъэх. Купышхор зэхэтэу зэдэ­уджын зэрилъэкIырэм яартист нэшанэхэр щыIэныгъэм къызэрэхэхыгъэхэр къегъэлъагъох.

— ЗэхэщакIохэм тафэраз, — къытиIуагъ Адыгэ Респуб­ликэм и Лъэпкъ театрэу И. Цэим ыцIэ зыхьырэм иартистэу ХьатхьакIумэ Аскэрбый. — Зичэзыу къэгъэлъэгъонхэм за­фэдгъэхьазырыным фэшI мэфэкI зэхахьэм гухахъо хэдгъотагъ.

КъафэгушIуагъ

Урысыем итеатрэхэм я Союз икъутамэу Адыгэ Республикэм щыIэм ипащэу, Урысыем, Къэ­бэртэе-Бэлъкъарым, Абхъазым, Пшызэ язаслуженнэ артистэу, Адыгэ Республикэм инароднэ артистэу Зыхьэ Заурбый мэфэкI зэхахьэм хэлэжьэн ылъэкIы­гъэп. Ащ шIуфэс тхылъэу театрэхэм яIофышIэхэм къафигъэхьыгъэм къыщеIо артистхэм шIоу щыIэр къадэхъу зэрэшIоигъор.

ЩыIэныгъэр лъэкIуатэ, хъугъэ-шIагъэхэр тарихъым инэкIубгъохэм ахэхьэх. Театрэхэм япчъэхэр нахь игъэкIотыгъэу къызэIуахыжьынхэу, артистхэм роль дэгъухэр къашIынхэу, теат­рэр зышIогъэшIэгъон цIыфыбэ яплъынэу афэтэIо. Театрэр орэпсэу, тыгъэу къытферэпс, ощх фабэу къытферэщх. Иорэд къэтIоным тэ тыфэхьазыр.

ЕмтIылъ Нурбый.