УФ-м илъэпкъ гвардие идзэхэм я Мафэ гъэтхапэм и 27-м хагъэунэфыкIыгъ. Хэбзэ рэхьатныгъэм идзэхэр зызэхащагъэхэр илъэс 210-рэ ыкIи УФ-м илъэпкъ гвардие зыщыIэр илъэси 5 зэрэхъугъэм афэгъэхьыгъэ Iофтхьэбзэ зэфэшъхьафхэр республикэм щыкIуагъэх.

Тарихъыр, IофшIагъэхэр

Шъугу къэдгъэкIыжьын, 2016-рэ илъэсым мэлылъфэгъум и 5-м УФ-м и Президент иуна­шъокIэ лъэпкъ гвардием и Фе­деральнэ къулыкъу Урысыем щызэхащагъ.

2016-рэ илъэсым шэкIогъум и 10-м лъэпкъ гвардием и Федеральнэ къулыкъу ипащэу В. В. Золотовым иунашъокIэ мы Федеральнэ къулыкъум иотделэу АР-м щыIэм ипащэу полицием иполковникэу Алексей Порва агъэнэфагъ. Нэужым, мыщ къулыкъу щызыхьыхэрэм япчъагъэ зэрэхагъэхъуагъэм къыхэкIэу, 2018-рэ илъэсым отделыр ГъэIорышIапIэ ашIы­жьыгъ. Джы ащ Иван Гричановым пэщэныгъэ дызэрехьэ.

Федеральнэ законэу «УФ-м илъэпкъ гвардие идзэхэм афэгъэхьыгъ» зыфиIорэм къызэригъэнафэрэмкIэ, лъэпкъ гвардиер къэралыгъо дзэ организа-циеу щыт, къэралыгъо ыкIи общественнэ щынэгъончъэныр, цIыфхэм яфитыныгъэхэр ыкIи яшъхьафитыныгъэ къэухъумэ­гъэнхэм ар афэIорышIэ.

Дзэм ихабзэхэр къызэтегъэ­нэжьыгъэнхэм ыкIи къулыкъум имэхьанэ зыкъегъэIэтыгъэным лъэпкъ гвардиер фэIорышIэ ыкIи ащ епхыгъэ мэфэкIыр гъэтхапэм и 27-м хагъэунэфыкIы. Лъэпкъ гвардием хэхьа­гъэх подразделениехэу ОМОН-р, СОБР-р, авиаотрядыр, вневедомственнэ къулыкъур, нэмыкI­хэри. Ащ ипшъэрылъ шъхьаIэхэм ащыщ общественнэ рэхьатныгъэр, къэралыгъо псэолъэ шъхьа­Iэхэр къэухъумэгъэнхэр, экстремизмэм ыкIи террориз­мэм апэуцужьыгъэныр, нэмыкI­хэри.

Мы уахътэм ехъулIэу ГъэIорышIапIэм нэбгыри 100-м ехъу­мэ къулыкъур щахьы. Ахэм ащыщыбэм УФ-м икъэралыгъо тын лъапIэхэр къафагъэ­шъошагъэх: нэбгыри 7-мэ ЛIы­хъужъныгъэм иорден, къулы­къушIэ 30-мэ медалэу «За отвагу», нэбгырэ 15-мэ а 1-рэ, я 2-рэ шъуашэ зиIэ орденэу «За заслуги перед Отечеством» зыфиIорэр. Къулыкъур ахьызэ хэкIодэгъэ нэбгыритIумэ, Артем Гармаш медалэу «Урысыем и ЛIыхъужъ» зыфиIорэр, Вячеслав Кравцовым ЛIыхъужъныгъэм иорден къафагъэшъоша­гъэх.

2020-рэ илъэсыр къызихьагъэм къыщегъэжьагъэу общественнэ рэхьатныгъэр къэухъу­мэгъэным, щынэгъончъэныр агъэлъэшыным афэшI ГъэIоры­шIапIэм ихэушъхьафыкIыгъэ подразделение пшъэрылъ мини 2-м ехъу ыгъэцэкIагъ, къулы­къушIэ мини 8-м ехъу ахэм ахэ­лэжьагъ, авиацием быбыгъуи 127-рэ зэхищагъ. Ахэм яшIуагъэкIэ бзэджэшIагъэ зезы­хьагъэу зэгуцафэхэрэ нэбгыри 9 къаубытыгъ, административнэ хэбзэукъоныгъэ 1108-рэ къыхагъэщыгъ.

Iашэр агъэфедэн фитхэу тиреспубликэкIэ Iизын къызэратыгъэхэм япчъагъэ нэбгырэ мин 13-м ехъу, ахэм пкъыгъо мин 21,7-м ехъу аIэкIэлъ. Мы лъэныкъомкIэ щыIэ хэбзэгъэуцугъэр зыукъуагъэхэм Iашэ 500 къаIахыгъ. Джащ фэдэу лицензие ыкIи фитыныгъэ къязытырэ тхылъ 14-мэ кIуачIэ ямыIэжьэу ашIыгъ. Унэе ыкIи къулыкъу Iэшэ 272-рэ ежь яшIоигъоны­гъэкIэ къатыжьыгъэх.

Республикэм ищыIэкIэ-псэукIэ нахьышIоу гъэпсыгъэнымкIэ лъэпкъ гвардием мэхьа­нэшхо зэриIэм щэч хэлъэп. Арышъ, къулыкъум шIуагъэ къы­тэу иIофшIэн зэхищэным, цIыфхэм IэпыIэгъу афэхъуным, ахэр къыухъумэгъэнхэм тапэкIи анаIэ зэрэтырагъэтыщтыр ГъэIорышIапIэм ипащэ къы­щыхигъэщыгъ.

МэфэкIымкIэ афэгушIуагъэх

МэфэкIым фэгъэхьыгъэ зэха­хьэ ОМОН-м ищагу щыкIуагъ.

Ащ хэлэжьагъ Урысые Федерацием илъэпкъ гвардие и ГъэIорышIапIэу Адыгэ Респуб­ликэм щыIэм ипащэу, полицием иполковникэу Иван Гричановыр, ветеранхэм я Совет итхьаматэу Павел Шевченкэр, подразделениехэм якъулы­къу­шIэхэр.

Ясэнэхьат епхыгъэ мэфэкIымкIэ республикэм илъэпкъ гвардие хэтхэм Иван Грича­новыр къафэгушIуагъ ыкIи щытхъурэ гъэхъагъэрэ хэлъэу къулыкъур ахьынэу къафэлъэ­Iуагъ.

— Илъэси 5-кIэ узэкIэIэ­бэ­жьымэ, Лъэпкъ гвардием идзэ­хэм я Федеральнэ къулыкъу зэхащагъ, — къыIуагъ ГъэIо- ры­шIапIэм ипащэ. — А уахътэм къыкIоцI ведомствакIэр гъэпсыгъэным ыкIи ылъэ теуцонымкIэ IофшIэнышхо ашIагъ. Къиныгъо зэфэшъхьафхэм ямы­лъы­тыгъэу, тикъулыкъушIэхэм япшъэ­рылъхэр дэгъоу зэшIуа­хых. Сицыхьэ телъэу къэсIон слъэкIыщт зиIофшIэн фэшъыпкъэхэу, зифэшъошэ цIыфхэр ти ГъэIорышIапIэ исатыр зэрэ­хэтхэр.

МэфэкI зэхахьэр окIофэ, къулыкъур зыхьызэ зыпсэ зыгъэтIылъыгъэ дзэкIолIхэм та­къикърэ афэшъыгъуагъэх ыкIи ахэм ацIэкIэ щыт шIэжь сау­гъэтым къэгъагъэхэр кIэралъхьагъэх.

Iофтхьабзэм икIэух зиIофшIэн пшъэрылъхэр щытхъу хэлъэу зыгъэцэкIэгъэ нэбгырэ 40-м ехъумэ медальхэр, щытхъу тхылъхэр, шIухьафтын лъапIэхэр ГъэIорышIапIэм ипащэ аритыжьыгъэх.

Пчъэ зэIухыгъэхэм я Маф

ЫпшъэкIэ зигугъу къэтшIыгъэ мэфэкIхэм яхэгъэунэфыкIын къыдыхэлъытагъэу Мые­къопэ гурыт еджапIэу N 10-м ия 6 — 7-рэ классхэм арысхэм мы Iофтхьабзэр афызэ­хащагъ. ОМОН-р зыдэт чIыпIэм ныбжьыкIэ цIыкIухэр рагъэблэгъагъэх.

Отрядым икомандирэу, полицием иполковникэу Владимир Ивченкэм хэушъхьафыкIыгъэ подразделением итарихъ ыкIи пшъэрылъэу ыгъэцакIэхэрэм кIэлэцIыкIухэр нэIуасэ фишIыгъэх.

Къулыкъур ахьызэ фэхыгъэ дзэкIолIхэм кIэлэеджакIохэр такъикърэ афэшъыгъуагъэх. Нэ­ужым джырэ шапхъэхэм адиштэу шIыгъэ Iашэхэм, шъуа­шэ­хэм ыкIи подразделением ихэу­шъхьа­фыкIыгъэ техникэхэм якъэ­гъэлъэгъон ныбжьыкIэхэр еплъы­гъэх.

Iэшъынэ Сусан. Сурэтхэр Iэшъынэ Аслъан ты­рихыгъэх.