Ушъыипхъэхэр
КIуачIэкIэ, акъылыгъэкIэ, пкъышIуагъэкIэ, дэхагъэкIэ, баиныгъэкIэ уашъхьащыкIыным сыда елъытыгъэр? Пстэуми анахь шъхьаIэр, анахь лъапIэр насыпыр ары. УнасыпышIуа хьаумэ унасыпынчъа — джары пкIэ зиIэр.
Гупшысэгъуае нахьи, сэмэркъэу лакъырдынчъ. Узыпызыщэрэ щхы макъэм губжыпхэри къызэкIоцIигъэкIын ылъэкIыщт. Щхыр зыIупэ къемычъэрэм егъэзыгъэу игъашIэ рехы. Сыд фэдэрэ уизекIуакIи ащ лъыпытэу кIэух фэхъу. Усакъын, зыпплъыхьан, узыдэплъыхыжьын фае. Зиплъыхьэзэ, акIэрыплъызэ шIэныгъэр зэзгъэгъотыгъэу, ежьыркIэ тэрэзымрэ пхэнджымрэ зыгъэунэфыгъэу, емрэ шIумрэ зэхэзышIыкIыгъэр — джащ фэдэр ары зиакъыл уцугъэ цIыфыр. Ащ емрэ шIумрэ ышъхьэкIэ зэригъэунэфыгъэхэм ишIуагъэкIэ лъытэныгъэ ин иI. Хэт сыд ыIуагъэкIи, ежьыркIэ зи хэлъэп. Ащ ыушэтыгъахэх ери шIури. Ар ежьыркIэ кIэгъэкъон пытэ хъугъэ. ЦIыфым паекIэ ар екъу.
Шъхьаджи фэдэ щыIэп. Зын-зыт къахэкIыгъэ тIолъфэныкъохэри зэфэдэхэп. ЗэтIуазэхэми зэфэмыдэныгъэ горэ къахэфэ. Емрэ шIумрэ къыбгурызыгъаIорэм уедэIуныр пшъхьэ еппэсырэп. МыдаIорэр хьа- рылъфы ащ фэдэ гор зытраIукIыгъэр. Ау, шъыпкъэм укъыпкъырыкIымэ, щыIэныгъэр — ушэтын. УигъашIэ щызэхэпфын фае тэрэзымрэ мытэрэзымрэ. Зэгорэм тэрэзыджэу узекIонкIи хъун, ау ар оркIэ шIэныгъэ. Мыщ дэжьым къыкIэгъэтхъыгъэн фаеу сэлъытэ, а шIэныгъэу бгъотыгъэр нэужым зэрэбгъэфедэщтым уищыIакIэ бэкIэ елъытыгъ. Сыда гъуазэу къыхэпхыщтыр: ер ара, хьауми шIур ара? ЩыIэныгъэр шъолъыр-шъолъырэу зыIоу, зыщыфаем ем ешэсэу, зыщыфаем шIум ионэгу зызышIырэр лъэшэу хэукъо. ЩыIэныгъэр шъолъыр-шъолъыр къэзышIырэр уицIыфыгъэ зыушэтхэрэ къиныгъомрэ хъярымрэ арых.
«Тхьэр къыпфехэу къыхэкIы» аIо. Тхьэр къызыфэусагъэмэ яхъуапсэх цIыфхэр. Сыда пIомэ, ар ЛЪЭГЪУНЫГЪЭ, ар гукIэгъу. Ау макIэ зэхэзышIэрэр Тхьэр къызэрэфэусэрэ щысэр. Тхьэр бзылъфыгъэкIэ, хъулъфыгъэкIэ, сабыйкIэ, чъыгыкIэ, тыгъэкIэ, мазэкIэ…. къыфэусэ, къыпфехы гукIэгъу амырэу, ащ шIыкIэу иIэр жъуагъоу ошъогум итым нахьи мин пчъагъэкIэ нахьыб. ГукIэгъур ымыгъэкIодыныр цIыфым инахьышъхьэ пшъэдэкIыжь.
ЦIыфмэ зыгорэкIэ закъыхэбгъэщы пшIоигъоныр —ар бгъэшIэгъонэу икъурэп. Ау шъорышIыгъэм зыдемыгъэхьыхэу узэрэщытэу зыкъэбгъэнэныр — ар ямышIыкI.
ЩыIэныгъэр шъэф зэрыбл. ЦIыфым игъашIэ къырыкIощтыр къэшIэгъуае. Ау нахьыбэмэ ягъашIэ зэрэрахыщт шIыкIэр ашIэмэ ашIоигъу, къэхъущтым щэщтэхэшъ. ЗэкIэри гъэнэфагъэу щытыгъэмэ, зыми джэнджэш хэлъыныеп.
ЦIыфмэ ахэдзыгъэ ухъугъэ фэдэу чIыпIэ зигъэуцу. Ащ лъыпытэу зыдэплъыхыжь, угу иплъэжь — сыд уфэд?! ШъхьэкIафэ зыфэпшIыжьыныр къыптефэу ухаплъа?! ЦIыфхэр къыпфэмыныкъохэмэ, цIыф уримыщыкIагъэмэ, унасыпышIощта?! Адыгагъэр уихабзэу, уибзыпхъэмэ, уцIыф икъугъ. Лъэгъуныгъэмрэ гукIэгъумрэ апэогъохымэ, унасыпышIу! УипчъэшъхьаIу зи къытемыуцуагъэми, узэпэш — зыпари нэрызы пшIырэпышъ. Уиунэ зэтегъэпсыхьагъ, сыда пIомэ адыгэ шъыпкъэр сыдигъуи фэхьазыр хьакIэм. Иунапчъэ бэрэ къаухьэ ыIоу, ихьакIэщыпчъэ зэфишIырэп, хьакIэм иIахьэ ышхыжьырэп. Зы нэбгыри къыпфыкъомыкIми, уизакъоп, уизэкъонэуи къэтэп. Уиунэ зыщыбгъэсагъэшъ, хасэ укIон уфит. УцIыфышъ, утхьамыкIэпышъ (къэлэсэрай уимыIэ нахь мышIэми), уянэ-уятэхэмрэ уянэжъ-уятэжъхэмрэ анэмыкI зыми уафэмыпщылI, зафэмыгъэцIыкIу.
Убаймэ — урымыкъэй, утхьамыкIэмэ — фэныкъоныгъэр гугъу умышIы. Куцэр зэрэтеуцогъу-теуцогъур зэхэпшIыкIэу опсэумэ, былымыр зэрэнэлатыр къыбгурэIомэ, къиныгъохэр къыохьылъэкIыщтэп. Къиныр — къыохъулIэрэр гугъу зэрэпшIырэм къыхэкIы. Тхъэгъошхор — лэжьэным къыкIакIо. Джэгурэмэ, шъуепцIызэ зигъашIэ изыхырэмэ, уямыхъуапс. ЦIыфэу Тхьэм укъыгъэшIыгъэшъ, цIыфыгъэмрэ зэфагъэмрэ уишапхъэу, уигупсэхэмрэ узхэтхэмрэ бгъэгушIохэу, бгъэгушхохэу уигъашIэ их.
КIахъо зимыIэм хахъо иIэп. Гъэсэныгъэ зимыIэм неущ иIэп.
Щтэ уиI-уимыIэми, гушхуагъэм уздищэрэр гъэунэфыгъуае. Угушхоныр — щынагъо умышIэныр арэп. Щтэ мышIэныр къызыхэкIырэр — чаныгъэр, блэнагъэр арых. Гушхогъэ иным ухэтэу зыхъурэм, щынэ мышIэныр къыдакIо. Ар гушхогъэ дэд. Ау иублэгъум щтапхэмрэ бланэмрэ бэп зэрэзэтекIыхэрэр. Зэфэмыдэ къэзышIыхэрэр: щтапхэм шIощтагъомэ къащеухьэ, бланэм зыми пымылъэу ыпэкIэ регъэхъу. Сыд ищтагъоми, бланэр мыгъэунэфыгъэм екIу.
НэгъэупIэпIэгъу пэпчъ цIыфым зихъожьын елъэкIы. ЦIыфыр — жьыбгъэм фэд. Непэ фабэу, макIэу зы бгъумкIэ къекIымэ, неущ — чъыIэу, уриутэу адрэбгъумкIэ къеукIы. Уегупшысэмэ, цIыфым а зы нахэр ренэу зыдиIыгъэп. Адыгэмэ бэшIагъэ гу зылъатагъэр шъор зэрэзэокIрэм. Ау ар плъэгъуным пае упхырыплъын фае. Зытетым тетэу къанэрэ щыIэп. Уесэжьыгъэу цIыфым къыпщэхъумэ, ащыгъум ар джыри пшIапэрэп зыфэдэр.
ШъудаIу. Зэхэшъухырэр зэхэшъушIыкIэу, къыжъугурыIоу. ШъумыдэIуаш. ШъудаIу, шъузэдэIурэр зэхэшъуугуфыкIын шъулъэкIынэу, зэхэшъудзыжьынэу — емрэ шIумрэ. Шъуезэщыгъэу шъузэгуцэфэжьыгъэмэ, шъузэпIэскIужь, нэмыкIым шъуиягъэ ешъумыгъэкIэу. ШъутхьакIумэхэр жъугъэчаных, ары пакIошъ, шъунэхэр гъусэ афэшъушIых. ШЪУДАIУ. «МыдаIорэр хьарылъфы», — аIо адыгэмэ.
Шъунэхэр жъугъаплъэх тэрэзэу. Нэхэм ренэу гур гъусэу ярэI. Адыгэмэ зэраIоу, гур мыплъэмэ нэр плъэрэпышъ. Хэчъыягъэм фэдэу шъумы- зекIу. Шъукъэлъэтэжь. IэкIо-лъэкIуагъэ къызыхэжъугъаф. Псалъэмэ (гущыIэмэ) шъуахэдаIу. ХэхьакIэрэ хэкIыкIэрэ зэжъугъашIэх. «Зэхэмыхьэрэ зэмыIахьылрэ», — аIуагъ адыгэмэ. Зэкъоныгъэр насыпыгъэу щытыгъэмэ, цIыфыр бэшIагъэу дунаим текIодыкIыжьыныгъи. НэгушIуагъэр нэшанэу хэшъухи, шъуищыIакIэ къызэрэзэкъокIыщтым шъуеплъ. Нэхъой-нэхъоеу дунаим шъухаплъэзэ гъашIэм шъурыкIу.
Тэу Нуриет.