Культурэм иIофышIэ и Мафэ ихэгъэунэфыкIын фэгъэхьыгъэ Iофтхьабзэу тыгъуасэ республикэм и Къэралыгъо филармоние щыкIуагъэм Адыгеим и ЛIышъхьэу КъумпIыл Мурат хэлэжьагъ.

Джащ фэдэу мы Iофтхьабзэм щыIагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м и Премьер-министрэу Геннадий Митрофановыр, республикэм иминистерствэхэмрэ иведомствэхэмрэ япащэхэр, муниципальнэ образованиехэм культурэмкIэ яIофышIэхэр, отраслэм иветеранхэр.

Iофтхьабзэр къызэIуихызэ, Адыгеим и ЛIышъхьэ культу­рэмрэ искусствэмрэ яIофы­шIэхэм ясэнэхьат епхыгъэ мэфэкIымкIэ къафэгушIуагъ. «Творческэ коллективхэм яIофышIэхэу, искусствэм щылажьэхэу тиреспубликэ ищытхъу языгъа­Iохэрэм, Урысыем ис лъэпкъхэм язэгурыIоныгъэ зыгъэпытэхэрэм ягъэ­хъагъэхэм тарэгу­шхо. Культурэм мэхьанэшхо иI, ащ икъэу­хъумэн къэралыгъом лъэ­шэу ынаIэ тыригъэтын фае. Ащ хэхъоныгъэ егъэшIыгъэныр, Урысыем икультурэ кIэн къэу­хъумэгъэныр ап­шъэрэ мэхьанэ зэттырэ лъэныкъохэм ащыщ», — къыIуагъ КъумпIыл Мурат.

Республикэм ипащэ джащ фэдэу хигъэунэфыкIыгъ Урысыем и Президентэу Владимир Путинми культурэм лъэшэу ынаIэ зэрэтетыр.

Республикэм икультурэ щыIэныгъэ лъэхъэнэ къызэрымыкIом хэлэжьагъэхэм, шIэжьымрэ щытхъумрэ я Илъэс изэхэщэнкIэ IэпыIэгъу къафэхъугъэхэм лъэшэу зэрафэразэр КъумпIыл Мурат къыхигъэщыгъ. Респуб­ликэм ипащэ зэрэхигъэунэфыкIыгъэмкIэ, отраслэм хэхъоныгъэ егъэшIыгъэнымкIэ лъэпкъ проектэу «Культурэм», Адыгеим хэхъоныгъэ зэришIыщт унэе программэм, къэралыгъо, федеральнэ программэхэм, «Единэ Россием» ипартийнэ проектэу «Культура малой Родины» зыфиIорэм мэхьанэшхо яI.

КультурэмкIэ учреждениехэр нахьышIоу зэтегъэпсыхьэгъэн- хэм, инфраструктурэм игъэпытэн, культурэм иIофышIэхэм ясоциальнэ Iофыгъохэр зэшIохыгъэнхэм апае гъэрекIо сомэ миллиард 1,8-рэ къатIупщыгъ. Культурэм и Унэ 12 агъэцэ­кIэжьыгъ, 3 кIэу ашIыгъ, модельнэ тхылъеджэпIи 5 къызэ­Iуахыгъ, Лъэпкъ музеим игъэ­кIэжьын джыдэдэм макIо. Мыгъэ культурэм ипсэолъэ 16 агъэцэкIэжьынэу, культурэм и Унэ 17-р мылъкукIи, техникэкIи нахь зэтырагъэпсыхьанэу рахъухьэ.

Адыгеим и ЛIышъхьэ культурэм щылажьэхэу зиIофшIэн гъэхъэгъэшхохэр щызышIыгъэ­хэм къэралыгъо тынхэр зэIукIэм щафигъэшъошагъэх. Культу­рэмрэ искусствэмрэ хэхъоныгъэ зэрарагъэшIырэм, илъэсыбэ хъугъэу гуетыныгъэ фыряIэу Iоф зэрашIэрэм афэшI щытхъуцIэу «УФ-м изаслуженнэ артист» зыфиIорэр Адыгеим лъэпкъ къашъохэмкIэ икъэралыгъо академическэ ансамблэу «Налмэсым» ибалетмейстерэу Езбей Батрайрэ адыгэ къашъохэмкIэ кIэлэцIыкIу ансамблэу «Мые­къуапэ инэфылъхэр» зыфиIорэм ипащэу Нэныжъ Айдэмыррэ къафагъэшъошагъ. ЩытхъуцIэу «Адыгэ Республикэм инароднэ артист» зыфиIорэр республикэм и Камернэ музыкальнэ театрэ иорэдыIо шъхьаIэу Ирина Кириченкэм къырапэсыгъ.

Культурмрэ искусствэмрэ алъэныкъокIэ гъэхъагъэхэр зэ­ря­Iэхэм фэшI щытхъуцIэу «Адыгэ Республикэм изаслуженнэ артист» зыфиIорэр къафагъэшъошагъ АР-м и Камернэ музыкаль­нэ театрэ иоркестрэ иартистэу Бэрзэдж Светланэ, народнэ орэдыIо ансамблэу «Орэдым» ихормейстерэу Гъо­нэжьыкъо Фатимэ, нысхъапэ­хэмкIэ театрэу «Дышъэ къошыным» иартистэу Юрий Григоренкэм, Урыс драматическэ театрэм иартистэу Оксана Светловам.

ЩытхъуцIэу «Адыгэ Респуб­ликэм культурэмкIэ изаслуженнэ IофышI» зыфиIорэр къаратыгъ ермэл къашъохэр къэзышIырэ народнэ ансамблэу «Еразанк» ихудожественнэ пащэу Сюзанна Бабаян, нысхъа­пэхэмкIэ театрэу «Дышъэ къошыным» иIофышIэу музыкэ Iофхэм апылъ Михаил Гембе, Тэхъутэмыкъое тхылъеджэпIэ гупчэм ипащэу ШэхэлI Саидэ.

Культурэм иIофышIэ заулэмэ Адыгэ Респуб­ликэм и ЛIышъхьэ ирэзэныгъэ тхылъхэр, АР-м и Къэралыгъо Совет — Хасэм и Щытхъу тхылъхэр, УФ-м культурэмкIэ и Министерствэ ирэзэныгъэ тхылъхэр къафагъэшъошагъэх. Лъэпкъ орэдхэмкIэ ансамблэу «Кубаночка» зыфиIорэм народнэ творчествэмкIэ заслуженнэ коллективыцIэр къырапэсыгъ. ТекIоныгъэм ия 75-рэ илъэс фэгъэхьыгъэ Iоф­тхьабзэхэр гъэхъагъэ хэлъэу зэрэзэрихьагъэхэм фэшI Урысые политикэ партиеу «Единэ Россием» лъэпкъ орэдхэр къэзыIорэ къэралыгъо ансамблэу «Ислъамыем» иартистхэм рэзэныгъэ тхылъ къаритыгъ.

АР-м и Къэралыгъо Совет – Хасэм и Тхьаматэу Владимир Нарожнэри, АР-м культурэмкIэ иминистрэу Аулъэ Юри культурэм иIофышIэхэм къафэгушIуа­гъэх.

МэфэкI Iофтхьабзэр концерткIэ аухыгъ. Рес­публикэм итворческэ коллективхэм ахэтхэр, орэдыIо, къэшъокIо артист цIэ­рыIохэр ащ хэлэжьагъэх.

Адыгэ Республикэм и ЛIышъхьэ ипресс-къулыкъу