Лъапсэр егъэжьапIэм щэпытэ
КъокIыпIэм щыпсэурэ лъэпкъхэм яискусствэкIэ Къэралыгъо музееу Мыекъуапэ дэтым ипащэу агъэнэфэгъэ ШъэуапцIэкъо Аминэт гущыIэгъу тыфэхъугъ.
— Аминэт, федеральнэ IофшIапIэм ипащэу уагъэнэфагъ. IэнэтIэшхом узэрэIухьагъэм фэшI «Адыгэ макъэм» еджэхэрэм ацIэкIэ тыпфэгушIо.
— Тхьашъуегъэпсэу.
— IофшIэныр зэребгъэжьагъэр тэлъэгъу. КъыпIукIэ зышIоигъоу пчъэм Iутыр макIэп…
— Музеир цIыфхэм якIуапI. Сэ чIыпIэ нэкI сыкъэкIуагъэп. Кушъу Аслъан апэрэ пащэу иIагъ. ПсэолъэшIхэм Iофыгъуабэ агъэцакIи, музеир зычIэтыщт унэр дахэу зэтырагъэпсыхьагъ.
— ЗэлъашIэрэ сурэтышIхэм, археологхэм, нэмыкIхэм якъэгъэлъэгъонхэр музеим щызэхащэх. КъэгъэлъэгъуапIэр дахэу зэрэщытыр зэкIэми хагъэунэфыкIы.
— Нурбый, сэри ащ сыщыгъуаз. Тимузей фэдэ зимыIэ шъолъыр пчъагъэмэ къарыкIыгъэхэм саIокIэ. Мыекъуапэ дэт музеир искусствэ лъагэм фытегъэпсыхьагъэу сэлъытэ.
— IэнатIэм узыIохьэм IофшIэныр сыда зыщебгъэжьагъэр?
— СиIофшIэн IофшIэным щезгъэжьагъ. (Аминэт мэщхы. Тхьэпэ зэгъэфагъэу столым телъхэм нэшIукIэ ахаплъэ.) Кушъу Нэфсэт Тхьэм джэнэт къырет. IофшIагъэу иIэр бэ. ШIыкIэшIухэм зэралъыхъущтыгъэр, цIыфхэр зэхищэнхэ, ыгъэдэIонхэ зэрилъэкIыщтыгъэр тэшIэ. Музеим щырагъэжьэгъэ Iофхэр лъыдгъэкIуатэхэ тшIоигъу.
ХэушъхьафыкIыгъэ лъэныкъохэр
— Музеим унэшъо хэхыгъэу иIэхэр зэригъэцакIэхэрэр къытаIоба.
— Отдели 4 тиI. ШIэныгъэм, къэгъэлъэгъонхэм язэхэщэн, искусствэм пылъхэм, ныбжьыкIэхэм тазэрэлъыIэсыщтым, тызэгъусэу Iоф зэрэтшIэщтым, фэшъхьафхэм тигухэлъхэр афэгъэхьыгъэх.
— IофшIэныр кадрэхэм къащежьэ. ЩыкIагъэхэр шъуиIэха?
— Нэбгырэ 43-рэ музеим Iут. Кадрэхэр тфикъухэрэп. Исэнэхьат хэгъозэгъэ искусствовед тищыкIагъ. Лъэхъаным диштэу тапэкIэ тылъыкIуатэзэ, IофшIэным зэхъокIыныгъэхэр фэтшIыщтых. Къэгъэлъэгъонхэм яхьылIэгъэ къэбархэр цIыфхэм нахьышIоу алъыгъэIэсыгъэнхэр тимурад хэхыгъэхэм ащыщых.
— Нэм ылъэгъурэр гум ышъхьэпэныр арыба къэпIуатэрэр?
— Ары, музеим цIыфыр зыкIокIэ ылъэгъугъэр, зэхихыгъэр зэфехьысыжьых. Дунэе мэхьанэ зиIэ къэгъэлъэгъонхэр музеим щызэхащэх. Искусствэм щыцIэрыIохэр, культурэр зышIогъэшIэгъонхэр, хэбзэ къулыкъушIэхэр тиIофтхьабзэхэм ахэлажьэх. Ахэр псэ зыпыт гущыIэхэмкIэ зэфэщэгъэнхэр, искусствэ шъыпкъэм икупкI алъыгъэIэсыгъэныр музеим щылажьэхэрэм япшъэрылъ.
— ШIэныгъэлэжьым, сурэтышIым, лъэпкъ IэпэIасэм яIофшIагъэ, ушэтынэу ашIырэм, ягупшысакIэ цIыфхэр ащышъогъэгъуазэх.
— Ар Iоф псынкIэп. Искусствэм ущылэжьэныр, шIыкIэ тэрэзхэр къэбгъотынхэр сэнэхьатым ишъэфых. Сэ сишIошIкIэ, лъым ар хэлъын фае. Тхьэм къыуитыгъэм угу етыгъэу Iоф дапшIэзэ, амалышIухэр къэогъотых. Музеим ясэнэхьат хэшIыкI ин фызиIэхэр зэрэщылажьэхэрэм сегъэгушхо.
УхъумакIо
— Федеральнэ IофшIапIэу шъущыт. Къыблэм, Темыр Кавказым якультурэ, яискусствэ къэжъугъэлъэгъонхэмкIэ сыд фэдэ егъэжьапIэха шъуиIэхэр?
— Шъолъырхэм тарихъ гъэшIэгъон яI. Искусствэм изэлъыIэсыкIэ амалхэр тапэкIи дгъэфедэщтых. «Культурэм лъэпкъхэр зэфещэх» зыфиIорэ екIолIакIэм зедгъэушъомбгъущт. ЗекIо къакIохэрэм таIукIэщт. Адыгеим ибаиныгъэхэри нахьышIоу ядгъэшIэщтых.
— Музеир — тарихъым иухъумакIу.
— Культурэм иунэхэу районхэм, къуаджэхэм ащыIэхэм къэгъэлъэгъонхэр къащызэIутхыщтых. Лъэпкъхэм яискусствэ ащыдгъэгъозэщтых. Музеим 2024-рэ илъэсым нэс Iоф зэришIэщт шIыкIэм тизэхахьэ тыщытегущыIагъ, унашъохэр итхъухьагъэх.
Къэгъэлъэгъонхэр
— 2021-рэ илъэсым зэхэшъущэщтхэ къэгъэлъэгъонхэр къытапIохэ тшIоигъу.
— ЗэкIэ къэгъэлъэгъонхэр дунаир зыхъожьыгъэ Кушъу Нэфсэт ишIэжь фэгъэхьыгъэщтых. ЗэлъашIэрэ сурэтышI-модельерэу СтIашъу Юрэ июбилей ехьылIэгъэ къэгъэлъэгъон зэхэтщэщт. Адыгэ шъуашэм идэхагъэ къэдгъэлъэгъощт. Iофтхьэбзэ 12 дгъэнэфагъэ. З. Бгъэжънэкъом, А. Самойловым, А. ПIатIыкъом, нэмыкIхэм ятворчествэ ащыдгъэгъозэщтых. Тыркуем къыращыщт пкъыгъохэм якъэгъэлъэгъон гъэшIэгъон хъущтэу сэлъытэ.
— Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм шъузэрэхэлажьэрэр тэшIэ.
— Москва, фэшъхьафхэм къэгъэлъэгъонхэр ащызэхэтщэщтых. Лъэпкъ зэпхыныгъэр щыIэныгъэм щыдгъэпытэщт.
— Музеим цIыф пчъагъэу къакIорэр, къэгъэлъэгъонхэм яплъыхэрэр нахьыбэ мэхъуха?
— Мазэ къэс ящэнэрэ мэфэкум пкIэ аIытымыхэу илъэс 16-м нэс зыныбжьхэр, унэгъо Iужъухэр, нэмыкIхэри музеим къетэгъэблагъэх. Зэпахырэ узым икъиныгъохэр къызэтынэкIыщтхэу, тиIофхэр нахьышIу хъущтхэу сэлъытэ.
Корреспондентыр
Адыгэ Республикэм культурэмкIэ и Министерствэ иколлегие изэхэсыгъо министрэу Аулъэ Юрэ, илъэсыбэрэ Iоф зыдишIагъэхэм ШъэуапцIэкъо Аминэт гущыIэ фабэхэр къыфаIуагъэх, Министерствэм ищытхъу тхылъ къыратыжьыгъ, шIоу щыIэр къыдэхъунэу фэлъэIуагъэх.
Тэхъутэмыкъуае дэт район тхылъеджапIэм IофшIэныр щезыгъэжьэгъэ ШъэуапцIэкъо Аминэт Урысыем, Адыгеим, Ингушетием культурэмкIэ язаслуженнэ IофышI. Аужырэ илъэсхэм Адыгэ Республикэм культурэмкIэ иминистрэ игуадзэу щытыгъ, общественнэ IофшIэкIошху. Мурадыбэ иIэу IэнэтIакIэм Iухьагъ. Урысыем, Адыгеим культурэмкIэ яминистерствэхэм, Адыгеим и ЛIышъхьэу КъумпIыл Мурат, Iоф зыдишIагъэхэм лъэшэу афэраз, «тхьашъуегъэпсэу» гъэзетымкIи ариIожьы шIоигъу.
Опсэу, Аминэт! Адыгэ Республикэм ыцIэ лъагэу зыIэтыхэрэм уащыщ. Тхьэм бэгъашIэ уешI. УиегъэжьэпIэшIухэр къыбдэхъунхэу пфэтэIо.
ЕмтIылъ Нурбый.