Охътэ лъэужхэр
Уахътэр. ЦIыфыр. ГъашIэр. Мы Iахьищыр сыдигъуи зэготхэу зы гупшысэ мэстанэм екIы. ЦIыфыр Тхьэм къыгъэхъугъэ псэ зыпытхэм анахь лъэшэу ары зэралъытэрэр.
Ащ елъытыгъэу къэпIон хъумэ, мы чIым къытехьэрэ нэбгырэ пэпчъ ежь ыгу, ыпсэ, иакъыл-Iушыгъэ, игукIэгъу-къэбзагъэ атешIыкIыгъэ лъэуж къызэригъанэрэр хэти ешIэ.
Зыр ышъхьэ, иунагъо, ищагу, иурам нахь чыжьэу IукIырэп, адрэр — лъэпкъым, чIыгум, хэгъэгум апаемэ — псэемыблэжь. Ахэм ацIэхэр цIыф гъашIэм иохътэ зэфэшъхьафхэм хэмыкIокIэжьынхэу къахэнагъэх. ЛIэужхэм ахэр зэрашIэхэрэр тхыдэхэр, лIыхъужъ орэдхэр, къэбархэр ыкIи тарихъ тхыгъэхэу гъэзет-журналхэм къарыхьэхэрэр, тхылъхэу къыдэкIыхэрэр арых.
ЦIыфым илъэуж
ЕгъашIэм адыгэр зыгъэдэхагъэу, щызыгъэIагъэр иадыгэгъэ дах, ынапэ къэбзэным, икъэрар зэфэным, ицIыфыгъэ-лIыгъэ мыуцэкуным гъунэ зэралъифыщтыгъэр ары.
Мы зэкIэм яхьылIагъ тхылъыкIэу сапашъхьэ илъыр. Ар Адыгэкъалэ къыщыдэкIырэ гъэзетэу «ЗыкIыныгъэм» илъэс 30-м ехъугъэу Iоф щызышIэрэ Кушъу Аслъан ытхыгъ — «Портреты времен» зэреджагъэр. Очеркхэр бэу дэтых, илъэсыбэ IофшIэгъэ зэфэхьысыжьымкIэ авторыр итхылъеджэхэм адэгуащэ.
Кушъу Аслъан Адыгэ Республикэм ыкIи Краснодар краим ащызэхащэрэ журналист зэнэкъокъухэм хагъэунэфыкIырэ чIыпIэхэр къащыдихыгъ, 2018-рэ илъэсым, журналистикэм ылъэныкъокIэ, Урысые зэнэкъокъоу «Патриоты России» ыкIи Лъэпкъ шIухьафтынэу «Моя земля — Россия» зыфиIохэрэм ялауреат.
Тхылъым къыIуатэрэр
«Портреты времен» — очерк тхыгъабэ къыдэхьагъ. Ахэр тхакIом шъхьи 4-у ыгощыгъ. Апэрэм — «Из истории малой родины», ятIонэрэм — «Ты помнишь, как все начиналось», ящэнэрэм — «Пантеон памяти нашей» ыкIи яплIэнэрэм — «Живущие во благо» зэряджагъэр. Мыхэр зэкIэ тарихъ очерк тхыгъэх, журналист IэпкIэ-лъэпкIагъэр къахэщэу, къыIуатэрэмкIи, тхэкIэ-шIыкIэмкIи зэдештэх, еджэгъошIух, гъэшIэгъоных. ЗыцIэ къыриIорэ цIыф пэпчъ щыIэныгъэм кIэгушIоу, иуахътэ ыгъэшIуным дэгуIэу, фэлъэкIырэр ышIэу зэрэщыIагъэр къащыIотагъ.
Хэкужъым итарихъ зыцIэ пытэу хэуцуагъэхэу, къыхэнэгъэ гъэсэгъэ-еджагъэхэу, гъэшIэ мурад инхэр щыIэныгъэм пхырызыщыгъэхэу, Кавказ заом ыуж Урысыем икъэралыгъо гъэпсыкIэ изэтегъэуцон, апэрэ Дунэе ыкIи граждан заохэм, Октябрэ революцием ыкIи Хэгъэгу зэошхом ахэлэжьагъэхэм афэгъэхьыгъэ очеркхэр осэнчъэх. Тхылъыр къызэIуехы ЛIыхэсэ лIакъомкIэ, Шъэофыжь ыкъохэу Абубэчыр, Хъанашхъо, Мурат-Чэрый ягъашIэ зыхэтыгъэхэ уахътэм иилъэс фыртынэхэм зэрэфагъэIорышIагъэм. Зэшхэм цIыфхэр къызгуагъэуцонхэ, зылъащэнхэ зэралъэкIыщтыгъэр, Хьалъэкъое къуаджэр Тыркуем икIыжьынэу зежьэм, зауи бани хэмытэу, кIалэхэм ятэу ЛIыхэсэ Шъэофыжь бгъуитIури ыгъэдаIохи, пачъыхьэм илIыкIохэри, къоджэдэсхэри зэрэзэгуригъэIуагъэхэр тарихъым къыхэнагъ. Шъэофыжь пщыгъэп ыкIи оркъыгъэп, ау гушхо зыкIоцIылъ лэжьэкIуагъ, апэдэдэ адыгэхэмкIэ тутыныр зышIагъэхэм ащыщыгъ. Ыкъохэри тым игъогу рыкIуагъэх, шIушIэныр яшэныгъ, лIыгъэ ахэлъыгъ.
ЛIыхэсэ Мурат-Чэрые иунэгъо лъапсэ джары тарихъ шIэжьым къызэрэхэнагъэр. Ежьыр Ставропольскэ гимназием щеджагъ, ащ ыужым игъэсэныгъэ лъигъэкIотэным фэшI стипендие къыратынэу лъэIу тхылъ ытхыгъ, граждан инженерхэр зыщагъэхьазырхэрэ институтэу Санкт-Петербург дэтым макIо. Я 20-рэ лIэшIэгъум иилъэс къинхэми къаухьагъэп Мурат-Чэрые, урыс-япон заом хэлэжьагъ, лIыгъэу хэлъыр мызэу, мытIоу тынхэмкIэ хагъэунэфыкIыгъ. Общественнэ-политикэ щыIакIэр анахь зыщыхьылъэгъэ илъэсхэм ЛIыхэсэ Мурат-Чэрые къалэу Баку игенерал-губернаторыгъ. Ыгу хэкIэу Баку зыщыIукIэгъэ адыгэхэм къариIогъагъ, икъуаджэ — ядэжь кIонэу нэдэплъыпIэ зэримыIэр, ыгукIэ ар ренэу щымыгъупшэу зыдиIыгъми.
Лъэпкъым ыусыгъэ орэдым илъэс 300-м зы лIы шъыпкъэу къэхъурэм Мурат-Чэрые зэращыщыгъэр къыщаIуагъ. М. ЛIыхасэм пхъуитIу къыкIэныгъагъ — ФатIимэтрэ Джэнэтрэ.
Кушъу Аслъан иочерк пэпчъ тарихъ хъугъэ-шIэгъэ иным епхыгъ — Апэрэ Дунэе заом адыгэ шыудзэ полкыр зэрэхэлэжьагъэр, адыгэхэр ялIыгъэ, янамыс зэрэфэсакъыщтыгъэхэр, Хэгъэгу зэошхом ТекIоныгъэр къызэрэщыдахыгъэр авторым итхыгъэхэм ащыкIэгъэтхъыгъ. Революцием ибэнэкIо лъэшыгъэу, адыгэ лъэпкъымкIэ зышъхьамысыжь-емызэщыжьыщтыгъэу Хьахъурэтэ Шыхьанчэрые ехьылIагъэр, тхыдэ зыцIэ хъугъэу Кущмызэкъо Айтэч фэгъэхьыгъэ очеркыр узIэпащэу гъэпсыгъэх — ахэр цIыфышхо зафэхэу адыгэ лъэпкъым къыхэкIыгъэхэм ясурэт шъыпкъэх.
Кушъум итхылъ я II-рэ шъхьэ Адыгэкъалэ агъэпсынэу зэрэхъугъэм, зэрагъэуцугъэм ехьылIагъ. Бжъэдыгъу къоджабэр хычIэгъ зашIыгъэ ужым, зы «нэбгъо псэупIэу» мы къалэр адыгэхэмкIэ хъугъэ. Я III-рэ шъхьэр къэлэдэсхэм афэгъэхьыгъ. Тхылъым къыдэхьэгъэ очерк 22-р авторым охътэ гъэнэфагъэм ихъугъэ-шIагъэхэм ателъытагъэх.
«Портреты времен» зыфиIорэр урысыбзэкIэ тхыгъэ, ау ащ адыги, урыси зэфэдэу амал къареты адыгэ лъэпкъым итарихъ куу хэтыгъэ цIыфхэм ядунэететыкIагъэр охътэ зэфэшъхьафхэм ателъытагъэу ашIэнымкIэ. Тэ тшъхьэ къырыкIуагъэу, хьазаб тхьамыкIагъоу лъэпкъым пэкIэкIыгъэр, ыщэчыгъэр, тицIыфхэр мэзахэм къыхэкIынхэшъ, щыIэкIэ нэфым фэкIонхэм пае, щэIагъэу, лIыгъэу, амалэу аIэкIэлъыгъэр зынэсыщтыгъэр зэхэугуфыкIыгъэу нэм къыкIэзгъэуцорэ тарихъ очеркхэр лъэшэу тищыкIагъэх, тинепэрэ щыIакIэ нахь тыфэсакъэу, хэдгъахъоу тыпсэунымкIэ къытшъхьапэщт.
Кушъу Аслъан итхылъыкIэ «Гъогу маф!» етэIо, ежьым икъэлэмыпэ мыуцэкунэу тыфэлъаIо.