Адыгэ Республикэм культурэмкIэ и Министерствэрэ Адыгэ Республикэм лъэпкъ культурэмкIэ и Гупчэрэ сэнэхьат IэпэIэсэныгъэмкIэ шъолъыр зэнэкъокъоу «Культурэм иIофышIэ анахь дэгъу» зыфиIорэр зэхащэ.

Адыгэ Республикэм икъэралыгъо программэу «Культурэм хэхъоныгъэ егъэшIыгъэныр» зыфиIоу 2021-рэ илъэсым телъы­тагъэм ыкIи шIэныгъэмрэ технологиехэмрэ я Илъэс къыдыхэ­лъытагъэм, УФ-м и Президент икIыгъэ илъэсым итыгъэгъэзэ мазэ и 25-м къышIыгъэ Указэу N 812-м ягъэцэкIэн атетэу Iофтхьабзэр зэхащэ. Мы мазэм и 24-м культурэм и Унэу П.Х. Афанасовым ыцIэ зыхьэу муниципальнэ гъэпсыкIэ зиIэ «Джэджэ районым» итым ар щыкIощт.

Лъэныкъо зэфэшъхьафхэм ащ хэлажьэхэрэм закъыщагъэ­лъэгъощт, лъэпкъ культурэмкIэ Гупчэм исоциальнэ нэкIубгъохэм цIыфхэм нахь агу рихьыгъэм амакъэ щафатын алъэкIыщт гъэтхапэм и 23-м пчэдыжьым сыхьатыр 10-м къыщыублагъэу гъэтхапэм и 24-м мафэм сыхьатыр 3-м нэс.

ТекIоныгъэ къыдэзыхыхэрэм дипломхэмрэ ахъщэ шIухьафтынхэмрэ аратыщтых, апэрэ чIыпIэр зыфагъэшъуашэрэм шIэжь кубокыр ыхьыщт ыкIи 2021-рэ илъэсым культурэм иIофышIэ анахь дэгъоу алъытэщт.

Зэнэкъокъум икIэух зэфэхьысыжьхэр гъэтхапэм и 25-м социальнэ нэкIубгъохэмрэ лъэпкъ культурэмкIэ Гупчэм исайтрэ къарыхьащтых.