Шъопсэу, медицинэм илIыхъужъхэр!
Дунаим щызэлъашIэу, Адыгэ Республикэм и Къэралыгъо орэдыIо-къэшъокIо ансамблэу «Ислъамыем» медицинэм иIофышIэ лIыхъужъхэм афэгъэхьыгъэ шIушIэ концерт Мыекъуапэ къыщитыгъ.
Адыгэ Республикэм и Къэралыгъо филармоние щыкIогъэ пчыхьэзэхахьэр тарихъым инэкIубгъохэм шIукIэ къахэнэжьыщт.
Iофтхьабзэр зэрищагъ Адыгэ Республикэм изаслуженнэ журналистэу ТIэшъу Светланэ. Ащ зэхахьэм щыхигъэунэфыкIыгъ зэпахырэ узэу дунаир зэлъызыкIугъэм медицинэм иIофышIэхэр чанэу зэрэпэуцужьыгъэхэр.
Чэщи, мафи зэхамыдзэу щыгъын фыжьыр зыщыгъхэр цIыфхэм япсауныгъэ икъэухъумэн фэбэнагъэх. Яунагъохэм къахэхьажьынхэ амылъэкIэу уз хьылъэм пэуцугъэх. Заом имашIо Iутхэм фэдэу, апсэ емыблэжьхэу цIыфхэм япсауныгъэ къызэраухъумэщтым пылъыгъэх.
Узым къыхэкIэу нэбгырабэ дунаим зэрехыжьыгъэр зэхахьэм къыщаIуагъ. Медицинэм иIофышIэхэу къулыкъур зыхьыгъэхэм ащыщхэр непэ къытхэтыжьхэп. Филармонием изалышхо нэрылъэгъу IэпыIэгъоу щагъэпсыгъэм иэкран ящыIэныгъэ зыхъожьыгъэхэм ясурэтхэр къыщагъэлъэгъуагъэх.
Мамыр щыIакIэм лIыхъужъныгъэ шъыпкъэ щызезыхьагъэхэу медицинэм Iоф щызышIэхэрэм «тхьашъуегъэпсэу» араIожьыгъ. ЩымыIэжьхэм шъхьащэ афашIыгъ, зы такъикъэ афэшъыгъуагъэх.
Тхылъ пчъагъэ афатхыщт
Узым пэуцухи, лIыхъужъныгъэ зезыхьагъэхэм тхылъ пчъагъэ афатхыщт, фильмэхэр къафагъэлъэгъощтых. Ащ щэч хэлъэп. АцIэхэр непэ къетIохэрэп – уахътэм иджэрпэджэжь щызэхэтхыщтых.
ЩыIэныгъэр лъэкIуатэ
ШIушIэ пчыхьэзэхахьэр ансамблэм икъашъоу «ИслъамыемкIэ» къызэIуахыгъ. Адыгэ Республикэм изаслуженнэ артисткэу Лъэустэнджэл Рузанэрэ Пшызэ изаслуженнэ артистэу Сихъу Руслъанрэ къашъом икIэщакIох.
Нарт Шэбатныкъо фэгъэхьыгъэ орэдыр Дзыбэ Руслъан къыхидзагъ.
Рапсодиеу «Хьагъэуджым изэфакIо» техыгъэр пщынаоу, республикэм инароднэ артисткэу Лъэцэр Светланэ къыхедзэ, жъыур кIезыгъэщырэ орэдыIо цIэрыIоу ХъокIо Сусанэ уедэIузэ, артистхэм зэдырагъаштэзэ, пэсэрэ орэдышъор лъэхъанэу тызыхэтым зэрэщыIурэм осэ ин фэошIы.
Пщынэуи 4-мэ адыгэ орэдышъохэр дахэу къырагъэIуагъэх. Жъыум фэгъэзагъэхэм ясэнаущыгъи уегъэгушIо.
Сэмэркъэу-кIэнэкIэлъэ пэсэрэ орэдэу ХьапакIэм фэгъэхьыгъэр республикэм инароднэ артистхэу Агъыржьэнэкъо Саниетрэ Къумыкъу Щамсудинрэ къыхадзэ.
Дер Адир ыкIи Шъымырзэ Казбек пчыхьэзэхахьэр лъагъэкIотагъ.
Урысые Федерацием IофшIэнымкIэ и ЛIыхъужъэу МэщбэшIэ Исхьакъ игущыIэхэм атехыгъэ орэдхэу композиторэу Нэхэе Аслъан ыусыгъэхэм ащыщхэр урысыбзэкIи, адыгабзэкIи зэхэтхыгъэх. «Ижъырэ орэд» зыфиIоу Эльдарэ Айдэмыррэ Шъымырзэ Казбекрэ къаIуагъэм гур куоу егъэгупшысэ. Ныр икIалэ ежэ, унэм къыгъэзэжьыщтэу мэгугъэ…
Адыгэ пщынэм ехьылIэгъэ орэдым уегъэгушхо лъэпкъ орэдышъор дунаим зэрэщигъэIурэм фэшI. Дер Адир орэдыр къыхедзэ. Лъэпкъ орэдэу адыгабзэм ехьылIагъэр Нэгъой Азэ мэкъэ чанкIэ къеIо, «Тиорэд – тиадыгабз», – орэдым къыщеIо Нэгъой Азэ.
Орэдыр лъэпкъым ылъапсэу зэрэщытыр усакIом IупкIэу ытхыгъ. Пщынаохэу Мышъэ Андзаур, Мышъэ Азэмат орэдыIохэм адежъыугъэх.
ХъокIо Сусанэ орэдыбэ къыхидзагъ. ОрэдыIохэм адиштэу лъэпкъ къашъохэр ансамблэм къышIыгъэх. Медицинэм фэгъэхьыгъэ орэдыр гъогогъуищэ къаIуагъ, Iэгу афытеуагъэх.
КIэщакIор
«Ислъамыем» ихудожественнэ пащэу, Урысыем, Адыгеим янароднэ артистэу, композиторэу Нэхэе Аслъан шIушIэ пчыхьэзэхахьэм кIэщакIо фэхъугъ.
Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем зэхахьэм къыщыгущыIагъ. Композитор цIэрыIоу Нэхэе Аслъан, артистхэм зэрафэразэр ащ къыIуагъ.
– Ансамблэу «Ислъамыер» зызэхащагъэр мыгъэ илъэс 30 мэхъу, – хигъэунэфыкIыгъ Мэрэтыкъо Рустем. – Онлайн концертхэм ямызакъоу псэ зыпыт пчыхьэзэхэхьэ гъэшIэгъоным тырагъэплъыгъ. «Ислъамыер» дунаим щашIэ, тилъэпкъэгъоу IэкIыб щыIэхэм алъэIэсы. Игъэхъагъэхэм ахигъэхъонэу ансамблэм фэтэIо.
ШIушIэ зэхахьэм медицинэм иIофышIэхэр ягуапэу еплъыгъэх, кIэухым артистхэм «тхьашъуегъэпсэу» араIожьыгъ.
ЕмтIылъ Нурбый.