Дунэе мэхьанэ иIэ хъугъэ
Гъэтхапэм и 14-м тилъэпкъэгъухэм атхыгъэ «Адыгэ диктантым» изэфэхьысыжьхэр къэнэфагъэх. Мыгъэ апэрэу ар онлайн шIыкIэкIэ зэхащагъ.
Адыгэ къэралыгъо университетым адыгэ филологиемкIэ ыкIи культурэмкIэ ифакультет идеканэу Хьамырзэкъо Нуриет къызэриIуагъэмкIэ, IофшIэгъэ 613-рэ къатыгъ, ахэм ащыщэу 11-р къызэIукIыгъэп, зэкIэмкIи ауплъэкIугъэм ипчъагъэ — 602-рэ.
Ахэм ащыщэу дэгъу дэдэу зытхыгъэхэр нэбгыри 117-рэ, ар процент 19 зэрэхъурэр, дэгъоу зытхыгъэхэр — 226-рэ, диктантым хэлэжьагъэхэм ар япроцент 37,5-рэ. БлэкIыгъэ илъэсым «Адыгэ диктантыр» зытхыгъэхэм япчъагъэ зэрэхъущтыгъэр 182-рэ, дэгъу дэдэкIэ нэбгырэ 21-мэ атхышъугъагъ. Мыгъэрэ Iофтхьабзэр онлайн шIыкIэу зэрэзэхащагъэм ишIуагъэкIэ нахьыбэ хэлэжьэн ылъэкIыгъ. Хьамырзэкъо Нуриет къызэриIорэмкIэ, мы шIыкIэм лъэныкъо дэгъухэри, джыри уздэлэжьэн фэе Iофыгъохэри къыгъэнэфагъэх:
— Адыгеим, Къэбэртэе-Бэлъкъарым, Къэрэщэе-Щэрджэсым, Краснодар, Шъхьащэфыжь, хы ШIуцIэ Iушъо шапсыгъэхэм ащыщэу тхагъэхэм мыгъэ къагоуцуагъэх IэкIыбым щыпсэурэ тилъэпкъэгъухэри. Онлайн шIыкIэм фэдэ амал къытитыгъ. Германием, Тыркуем, Иорданием, Сирием ащыпсэухэрэми адыгэ диктантыр къыддатхыгъ. ЯпчъагъэкIэ нэбгырэ 50 мэхъух, ахэм ащыщэу 18-р Дюздже университетым истудентых. Пчъагъэм зэрэхэхъуагъэм лъэшэу тигъэгушIуагъ, ау уплъэкIужьын IофшIэныр мызэгъэгум къэзгъэхьылъэгъэ лъэныкъохэри къыхэкIыгъэх: электроннэ почтэкIэ къэзгъэхьыгъэхэм ащыщ зырызхэм яIофшIагъэхэр къызэIукIыгъэхэп, гумэкIыжьхэу телефонымкIи, почтэмкIи а зыр къытфэзгъэхьыгъэхэр къахэкIыгъэх, IофшIагъэхэм сурэтэу атрахыгъэхэм язытет зэрэдэигъэм къыхэкIэу, уплъэкIугъуаехэри къахэфагъэх. Фэдэ уплъэкIун шIыкIэхэм, IофшIэгъэ пчъагъэри бэу, тэри апэрэу тарихьылIагъ. Ахэм зэфэхьысыжьэу афэтшIыщтхэр джыри тапэкIэ щыIэ IофшIэнхэм ащыщ.
— Анахь зэфэхьысыжь шъхьаIэу мыгъэрэ диктант тхыным шъуигъэшIыгъэр сыд фэда?
— Диктантыр зытхыхэрэр тIоу гощыгъэнхэ фае – бзэр зыIулъэу зыгъэфедэхэрэмрэ бзэр зэзыгъашIэхэрэмрэ. А купитIум яхьылъагъэкIэ диктант зэфэшъхьафхэр ягъэтхыгъэнхэ фае. Джыдэдэм офлайн ыкIи онлайн шIыкIэм атетэу тхагъэхэм кIэлэеджакIохэри, студентхэри, ныбжь зиIэхэри, бзэм рылажьэхэрэри, рымылажьэхэрэри, зэзыгъэшIэрэ къодыехэри зэгъусэхэу зэдэтхагъэх. Ау щытми, «Адыгэ диктантыр» культурнэ- егъэджэн, гъэсэныгъэ мэхьэнэ ин зиIэ Iофтхьабзэу щыт, ар пстэуми апэ итэгъэуцо!
Тэу Замир.