Адыгэ Республикэм культурэмкIэ и Мини­стер­ствэрэ АР-м культурэмкIэ икъэралыгъо бюджет учреждениеу «Адыгеим лъэпкъ куль­турэмкIэ и Гупч» зыфиIорэмрэ ИлъэсыкIэ мэфэкIым ихэгъэунэфыкIын тегъэпсыхьэгъэ Iофтхьабзэр лъэпкъ хабзэхэм атетэу 2021-рэ илъэсым гъэтхапэм и 21-м зэхащэщт.

Гъэмрэ кIымрэ зыщызэхэ­кIырэм, гъэтхапэм и 21-м, адыгэхэр ИлъэсыкIэм зыпэгъо­кIыхэрэр лIэшIэгъубэ хъугъэ. Мыщ фэдэ Iофтхьабзэм лъэпкъ зэхашIэр нахь къегъэущы, ха­бзэхэм якъэухъумэнкIэ, къыткIэхъухьэрэ ныбжьыкIэхэр адыгэ хабзэм тетэу зекIонхэмкIэ, культурэм изыкъегъэIэтынкIэ ишIуагъэ къэкIо.

Адыгэ Республикэм икъэлэ шъхьаIэ дэсхэми, хьакIэхэми ИлъэсыкIэ мэфэкIым хэлэжьэнхэу мыгъи амал яIэщт. ЧIыопсыр къызыущыжьрэ, къызыфэбэжьрэ лъэхъаныр щыIэныгъакIэм иублапIэу бэшIагъэу алъытэ, щыIэныгъэм ылъапсэу щыт, зинэфыпскIэ хьалэлэу цIыфхэм къятэрэ Тыгъэр лъэшэу агъэлъапIэ. Нэшанэ горэхэмкIэ ИлъэсыкIэр зыфэдэщтыр адыгэ­хэм къашIэщтыгъ. Щэджагъо нэс зыошIукIэ, гъэм гъэбэжъушхо агъотынэу, ощх къызещхыкIэ е ос къызесыкIэ, огъу хъунэу алъытэщтыгъ.

ИлъэсыкIэ мэфэкIыр мыгъэ къутырэу Гавердовскэм, ООО-у «НАН» къыфэгъэзэгъэ чIыпIэм щыхагъэунэфыкIыщт. ЗышIоигъо пстэуми ижъыкIэ ИлъэсыкIэм зэрэпэгъокIыщтыгъэхэ шIыкIэм зыщагъэгъозэнэу амал яIэщт. ХьакIэхэм лъэпкъ IэшIагъэхэмрэ Iэпэщысэхэмрэ якъэгъэлъэгъони, дышъэидэмкIэ мастер­-классэу зэхащэщтри ашIогъэшIэгъонынэу къытщэхъу.

Адыгэ Республикэм и ­Лъэп­къ театрэу И. Цэим ыцIэ зыхьырэм иактерхэр, Адыгеим иартист цIэрыIохэр, итворческэ купхэм, лъэпкъ движениехэм ахэтхэр мэфэкI Iофтхьабзэм хэлэжьэщтых. Ащ хэлажьэхэрэри, еплъыхэрэри ахьакIэщтых.

МэфэкI Iофтхьабзэр 2021-рэ илъэсым гъэтхапэм и 21-м сыхьатыр 12-м мыщ фэдэ чIыпIэм щырагъэжьэщт: къ. Гавердовскэр, ур. Цветочнэр, 1, ООО-у «НАН».

Шъукъеблагъ!