ЩынэгъончъэнымкIэ Урысыем икъулыкъу иIофышIэхэр Адыгэ Республикэм щызэрахьанэу агъэхьазырыщтыгъэ террористическэ актым пэрыохъу фэхъугъэх. ЗэшIуахыгъэ Iофыгъохэм яшIуагъэкIэ Гупчэ-Азиатскэ шъолъырым къикIыгъэу цIыфхэр бэу зыщызэрэугъоихэрэ чIыпIэхэм ащыщ къыгъэоным фэзыгъэхьазырыщтыгъэр къаубытыгъ.

Ар зыщыпсэущтыгъэм къыщагъотыгъэх къэорэ пкъыгъом изэхэлъхьанкIэ агъэфедэхэрэр, «ИГИЛ» зыфиIорэ дунэе тер­рористическэ организацием (УФ-м и Апшъэрэ хьыкум 2014-рэ илъэсым итыгъэгъэзэ мазэ и 29-м ышIыгъэ унашъомкIэ Урысыем щадэрэп) ибыракъ, Мыекъуапэ икартэу терактхэр зыщызэрахьащтхэр зыхэгъэу­нэ­фыкIыгъэр, зэпхыныгъэм иамал­хэу террористическэ мэ­хьанэ къызэрыкIыхэрэр бэу зы­тетхэр, террорыр зэрэзэра­хьэрэ пкъыгъохэм яшIыкIэ амал­хэу интернетым къырахыгъэхэр, къэралыгъом къызэрихьашъущтхэ тхылъ нэпцIхэр.

ЩынэгъончъэнымкIэ чIыпIэ къулыкъум иследственнэ подраз­деление къаубытыгъэм ылъэ­ныкъокIэ уголовнэ Iоф къызэIуи­хыгъ Урысыем и Уголовнэ ко­­декс ия 30-рэ статья иапэрэ IахькIэ, я 205-рэ статья иапэрэ IахькIэ (террористическэ актым изыфэгъэхьазырын).

Къэбарыр Урысыем щынэгъончъэнымкIэ ифедеральнэ къулыкъу къытыгъ