Адыгабзэмрэ тхыбзэмрэ я Мафэ гъэтхапэм и 14-м хагъэунэфыкIыгъ. Ащ епхыгъэу Кощхьэблэ районым ит къуаджэу Фэдз игурыт еджа­пIэ Iофтхьэбзэ зэфэшъхьафхэр щызэхащагъэх. Ныдэлъфыбзэр зыгъэ­лъапIэхэрэм, зыIэтхэрэм, зыгъэбзэрабзэхэрэм, зигупсэхэм ащыщ­хэм непэ нэIуасэ шъуафэтэшIы, абзэ еплъыкIэу фыряIэр ахэм къыраIотыкIы.

Я 5-рэ классым икIэлэеджакIоу КIэрэф Бэл:

— Сэ адыгэ лъэпкъым сыщыщ, сичIыгужъ сис, сыщапIу, сыщеджэ. Синыдэлъфыбзэ сырэгушхо, сэгъэлъапIэ, зэсэгъа­шIэ. Ар сишIулъэгъу, сигуIэтыпI. Дунаим тетмэ анахь тын лъапIэу къысщэхъу, сыбзэ, сиадыгабзэ. Синыдэлъфыбзэ тыгъэм фэсэгъадэ. Ар дахэу, нэфэу къытфепсы, тилъагъо къытфегъэнэфы, тыгухэр къегъэфабэх. Сидунай идэхагъи, сипсыхъо нашхъоу Фэдз иIу­шъэшъэ макъи, сикъушъхьэ лъагэхэм язэпэшIэти, сигуб­гъомэ ягухахъуи сиадыгабзэ зэхысегъашIэ. Ныдэлъфыбзэр — сянэ гупсэ ынэ дахэх, сятэ игущыIэ шъабэх, ситэтэжъ итхыдэ шIагъох, синэнэжъ ихьалыгъу фаб, синэIосэ псы­хъом ичъакI, сфагъэтIысыгъэ чъыгым ипкIашъэхэм яIушъэшъэ макъ, тигъунэгъу мэзым итеплъ, адыгэ пщынэм ымэкъэ жъынч. Ныдэлъфыбзэр дгъэлъапIэзэ адыгабзэкIэ ты­жъугъэгущыI!

Я 6-рэ классым ис кIэлэеджакIоу Пшъызэпекъо Дарин:

— «Бзэр — псэ, бзэ зимыIэм лъэпкъ иIэп» — eIo адыгэ гущыIэжъым. Арэу къысшIошIы лъэпкъ пстэуми ныдэлъфыбзэр къазэрагурыIорэр. СицIыкIугъом къыщегъэжьагъэу синыдэлъфыбзэ шIу сэлъэгъу. Сыбгъэ дизэу къыздесэхьакIы, сырэгушхо, сэгъэлъапIэ. СлъэкIымэ, сыбзэ тыгъэу къезгъэпсыщт, адыгэ пэпчъ ар тезгъэпсэщт. СлъэкIымэ, сыбзэ хышхоу сшIыщт, тхъагъоу хэлъыр зэкIэми зэхязгъэшIэщт. СыщыIэфэ, жьы къэсэщэфэ, сянэ гупсэ къысIуилъхьэгъэ ныдэлъфыбзэм сырыгушхоу сырыгущы­Iэщт, сыфэлэжьэщт, зезгъэIэтыщт. Сиорэди, сигупшы­сэхэми ахэлъэу къыздесхьакIыщт. Хэти зэхэзыхырэр дихьыхэу, тыдрэ чIы къуапи щызгъэжъынчыщт!|