ЦIыфхэр жъугъэу зыхэлэжьэхэрэ Iофтхьабзэхэр щынэгъончъэу щытынхэм, лъэпкъ зэфыщытыкIэхэр гъэпытэгъэным, терроризмэм иидеологие пэуцужьыгъэным, нэмыкI Iофыгъохэм щатегущыIагъэх терроризмэм пэшIуекIогъэнымкIэ республикэ комиссиемрэ оперативнэ штабымрэ зичэзыу зэхэсыгъоу тыгъуасэ яIагъэм. Ащ тхьамэтагъор щызэрихьагъ Адыгэ Республикэм и ЛIышъхьэу КъумпIыл Мурат.

Мэхьанэшхо зиIэ общественнэ-политическэ ыкIи нэмыкI Iофтхьабзэхэм язэхэщэн, ащ хэхьэ 2021-рэм рагъэкIо­кIыщт кIэтхыкIыжьынри, щынэгъончъэу щытынхэмкIэ анахьэу анаIэ зытыра­гъэтыщт лъэныкъохэм къатегущыIагъ щынэгъончъэнымкIэ Федеральнэ къулыкъум АдыгеимкIэ и ГъэIорышIапIэ ипащэу Сергей Каштановыр.

ЦIыфхэр жъугъэу зыщызэрэугъоихэрэ чIыпIэхэр ыкIи ащ епхыгъэ инфраструктурэр терроризмэм ылъэныкъокIэ ухъу­магъэхэ хъуным фытегъэпсыхьэгъэ уплъэкIунхэм изэфэхьысыжьхэм адиштэу 2020-рэ илъэсым IэнатIэ зыIыгъ пэщи 4-мэ административнэ пшъэдэкIыжь арагъэхьыгъ, хэукъоныгъэу къыхагъэщыгъэхэр дагъэзыжьынхэу хабзэм икъу­лыкъухэм ыкIи иучреждениехэм тхылъ 330-рэ афагъэхьыгъ.

ЫпшъэкIэ зигугъу къэтшIыгъэ кIэтхыкIыжьыныр зэрэзэхащэщтым ыкIи ащ шапхъэу пылъхэр цIыфхэм агурыгъэIогъэным, ныбжьыкIэхэр экстремизмэм щыухъумэгъэнхэм фэшI пэшIорыгъэшъ Iофтхьабзэхэр зэхэщэгъэнхэм мэхьанэшхо зэряIэр ГъэIорышIапIэм ипащэ хигъэунэфыкIыгъ.

Адыгеим хэгъэгу кIоцI IофхэмкIэ иминистрэ ипшъэрылъхэр охътэ гъэнэфагъэкIэ зыгъэцэкIэрэ БрантIэ Мурадин общественнэ рэхьатныгъэр ыкIи гъогурыкIоным ищынэгъончъагъэ къэухъумэгъэнхэм хэбзэухъумэкIо къулыкъухэр зэрэфэхьазырхэм къытегущыIагъ.

ХэбзэухъумакIохэм Iоф зэрадашIэрэм епхыгъэу зэфэхьысыжьхэр къышIыгъэх къэралыгъо статистикэмкIэ Федеральнэ къулыкъум Краснодар краимкIэ ыкIи АдыгеимкIэ и ГъэIорышIапIэ ипащэ игуадзэу Къурыжъ Светланэ.

ХьакIэщхэр ыкIи цIыфхэр къызщыуцухэрэ нэмыкI чIыпIэхэр терроризмэм ылъэныкъокIэ ухъумагъэхэ зэрэхъурэм къытегущыIагъэх Росгвардием и ГъэIорышIапIэу республикэм щыIэм ипащэу Иван Гричановымрэ АР-м зекIонымрэ курортхэмрэкIэ и Комитет итхьаматэу Къэлэшъэо Инверрэ.

КъызэраIуагъэмкIэ, непэрэ мафэм ехъулIэу зекIоным епхыгъэ псэолъи 195-рэ шъолъырым ит. БлэкIыгъэ илъэ­сым ахэм ащыщэу 15-р ауплъэкIугъ. Зэфэхьысыжьхэм къызэрагъэлъэгъуагъэм­кIэ, объект зырызхэм щынэгъончъэным ипаспортхэр апылъхэп, хьакIэщхэм ащыщхэм макъэ къэзыгъэIурэ ыкIи видео тезыхырэ пкъыгъохэр, къэбарлъы­гъэIэс стендхэр ачIэтхэп.

Адыгеим и ЛIышъхьэ мыщ фэгъэзэгъэ профильнэ Комитетым ыкIи къулыкъу­хэм яIофшIэн нахь агъэлъэшынэу, респуб­ликэм щыпсэухэрэм ыкIи хьакIэу къа­кIохэрэм ящынэгъончъагъэ къэухъумэгъэным анахьэу анаIэ тырагъэтынэу къариIуагъ.

— Урысыем и Къыблэ пштэмэ, цIыфхэм зызщагъэпсэфынэу къыхахырэ чIыпIэхэм Адыгеир ащыщ. Ащ дакIоу зекIоным хэхъоныгъэ ышIыным тэркIэ мэхьанэшхо иI. Ар къыдэтлъы­тэзэ инфраструктурэр зэте­гъэпсыхьэгъэным, зекIоным епхыгъэ псэолъакIэхэр къызэ­Iухыгъэнхэм ткIуачIэ етэхьылIэ. ШэпхъэшIухэм адиштэу фэIо-фашIэхэр гъэцэкIэгъэнхэр, тадэжь къэкIорэ хьакIэхэм гупсэфэу ыкIи щынэ­гъончъэу загъэпсэфын амал яIэныр — джары пшъэрылъ шъхьаIэу щытыр, — къыIуагъ КъумпIыл Мурат.

Зэхэсыгъом хэлэжьагъэхэр нэмыкI Iофыгъохэми ахэплъагъэх.

АР-м и ЛIышъхьэ ипресс-къулыкъу.