УФ-м ФедерациемкIэ и Совет экономикэ политикэмкIэ и Комитет илIыкIохэр мы мафэхэм Адыгеим щыIэх. Республикэм социальнэ ыкIи экономикэ хэхъоныгъэхэр егъэшIыгъэнхэм фытегъэпсыхьэгъэ унэе программэр гъэцэкIагъэ зэрэхъурэм, джыри унаIэ зытетын фаеу щыIэхэм зэдатегущыIэнхэр ары ахэр къэкIонхэм ушъхьагъу шъхьаIэу фэхъугъэр.

ЛIыкIо купым ипащ Комитетым и Тхьаматэ игуадзэу Алексей Русских, Адыгеим ыцIэкIэ ФедерациемкIэ Советым исенаторхэу Хъопсэрыкъо Муратрэ Олег Селезневымрэ хэтых.

Тыгъуасэ республикэм къызэсыхэм Тэхъутэмыкъое районым яIофшIэн щырагъэжьагъ, программэм къыдыхэлъытагъэу ащ щагъэкIэжьыгъэ псэуалъэхэр къакIухьагъэх. Адыгеим и ЛIышъхьэу КъумпIыл Мурат пшъэрылъ къыфишIыгъэу АР-м и Премьер-министрэу Геннадий Митрофановым поселкэу Яблоновскэм культурэм и Унэу икIэрыкIэу щашIыжьыгъэмрэ культурэм, спортым зыщапылъхэ гъэпсэфыпIэ Гупчэу поселкэу Инэм щагъэкIэжьыгъэмрэ къаригъэ­лъэгъугъэх. Апэ зигугъу къэтшIыгъэ псэуалъэм игъэцэкIэжьын сомэ миллион 55,8-м ехъу, ятIонэрэм — сомэ миллион 54,3-рэ апэIухьагъ.

Поселкэу Яблоновскэм культурэм и Унэу дэтыр 1990-рэ илъэсхэм къащегъэ­жьагъэу унэе псэуалъэу щытыгъ, зэрищыкIагъэм тетэу агъэфедэщтыгъэп. Республикэ пащэхэм яшIушIагъэкIэ, илъэс заулэкIэ узэкIэIэбэжьмэ ар муниципальнэ образованием фэгъэзагъэ хъужьыгъэ ыкIи ащ игъэкIэжьын фытегъэпсыхьэгъэ проектыр унэе программэм хагъэхьагъ. Ащ тетэу Адыгеим ипащэхэм, УФ-м и Правительствэ яIэпыIэгъоу, культурэм и Унэ иIофшIэн зыпкъ рагъэ­уцожьыгъ.

Поселкэу Инэм игъэпсэфыпIэ Гупчэ зычIэт унэр 1980-рэ илъэсыр ары зашIыгъэр, жъы хъугъэу, гъэцэкIэжьынхэр зищыкIэгъагъэхэр бэшIагъэ. Программэм ишIуагъэкIэ ащ иунашъхьэ, ипчъэхэр, шъхьаныгъупчъэхэр, псым, электричествэм, фабэм якIуапIэхэр щызэблахъугъэх, ыкIоцIи ыкIыби дэпкъхэр агъэ­кIэжьыгъэх, интернет ращэлIагъ, машIом зыкъыштэмэ макъэ зыгъэIущтыр щагъэ­псыгъ, сэкъатныгъэ зиIэхэм ящыкIагъэ­хэри къыдалъытагъэх.

Джы ащ клуб зэфэшъхьафэу 32-рэ щагъэпсыгъ, ахэм нэбгырэ 700 ахэт. Джащ фэдэу экспозиции 4 зыхахьэрэ ыкIи экспонат 500 зычIэлъ музей хэт, библиотекэу агъэкIэжьыгъэм ифонд тхылъ 14589-рэ чIэлъ. Концертхэр къыз­щатырэ залхэм лъэхъаным къыздихьыгъэу ящыкIэгъэ пстэур ачIагъэуцуагъ. Ахэм анэмыкIэуи, Гупчэм 2020-рэ илъэсым зэнэкъокъум текIоныгъэр къы­щыдихи кином и Фонд сомэ миллиони 5 къыфитIупщыгъ, ащкIэ кинозал агъэ­псыгъ.

Псэуалъэу зигугъу къэтшIыгъэхэм къызэIуахыжьыгъэхэу мы уахътэм Iоф ашIэ. Арышъ, сенаторхэр гъэкIэжьын IофшIэнхэр зэрэзэшIуахыгъэхэр зэрэзэрагъэлъэгъугъэхэм имызакъоу, творческэ купхэм зызэрагъэхьазырырэми еплъыгъэх. ХьакIэхэм яIэпэIэсэныгъэ къарагъэлъэгъугъ народнэ хорэу «Зарницэм», адыгэ къэшъокIо ансамблэхэу «МэшIотхъуабзэм», «Адыгеим иныбжьыкIэгъу» зыфиIорэм, фольклорнэ ансамблэу «Родничокым», нэмыкIхэм.

Алексей Русских ылъэгъугъэм уасэ къыфишIызэ, творческэ купхэм яшIэныгъэ хэгъэхъогъэным мэхьэнэ ин зэриIэр къыхигъэщыгъ, культурэм иунэхэм ящыкIэгъэ псэуалъэхэр икъоу яIэхэмэ къыкIэупчIагъ. Поселкэхэм, къэралыгъоми, республикэми япащэхэм ащ фэдэу псэупIэхэм адэсхэм языгъэпсэфын, яуахътэ шIуагъэ къытэу агъэкIоным анаIэ къызэратетым пае ярэзэныгъэ къыраIотыкIыгъ. УнитIум IофшIэкIэ амалэу аратыгъэхэм яшIуагъэкIэ джыри нахь заушъомбгъун, купэу ащызэхащагъэхэм яшIэныгъэ хагъэхъон алъэкIынэу зэрэхъугъэр къыкIагъэтхъыгъ.

ХЪУТ Нэфсэт.