Узгъэгупшысэрэ Кавказыр
Кавказым идэхагъэ сыдигъуи нэплъэгъубэ къызфищэщтыгъ, ащ фэдэ чIыпIэ хэшыкIыгъэм бэ къенэцIэу кIэхъопсыщтыгъэр. Ащ къыхэкIэу, къушъхьэчIэс цIыф лъэпкъхэм мы джэнэт чIыпIэр Тхьэм къарипэсыгъагъэми, ар къаухъумэным, я ЧIыгу зыкIэрамытIупщыным пае къин макIэп ащэчыгъэр.
Уахътэр, уахътэр! Ар шы емылыч ехьыжьагъэм фэд, къэбгъэуцунэуи, къыодэIунэуи, угоуцонэуи щытэп, джащ пае цIыфлъэпкъыр ренэу гупсэфыр зыщыщ ымышIэу ащ лъыбанэмэ лъычъэзэ щыIэн фаеу мэхъу. БлэкIыгъэм къыгъэнэгъэ лъэуж дэутыгъэр, тау-таш гуихыр зэрэпфэпшысыжь. ЛIэшIэгъухэм ягъогууан тарихъ гупсэфыгъо непи къытитырэп, тыфызэплъэкIыжьы, тапэкIэ тымылъэпаоу тылъыкIотэшъуным пае.
ЛIэшIэгъу блэкIыгъэхэм ятхыдэ кIэпсэ гъэщыгъэ кIыхьэу къызэтещыкIы — ащ лъэхъан пэпчъ зыфэдагъэр къыхэщы. Я 18-рэ лIэшIэгъур гуимыкIыжь заом зэрипхъогъагъ. Кавказ заом ихьазаб илъэси 100 ыкъудыигъ, къушъхьэчIэс цIыфхэм апси бэдэдэу зыдихьыгъ. ЗэокIэзыжь уахътэми, псэр яхьафти, мыжъом лэжьыгъэр къытырагъакIэу, кIочIэрыпсэу лэжьакIом, цIыф хыем сыд хьазаба пэкIэкIыгъэр. Я 18 — 19-рэ лIэшIэгъухэр къэпIотэнэуи, къэптхыжьынэуи, сурэт пшIынхэуи щытхэп — жъалымыгъэ-нэпэнчъагъэу зэрахьагъэм гур егъэушкъои.
Зэожъ нэпэнчъэм хэтыгъэ лъэпкъ дзэпащэхэу цIыф жъугъэ къызэрыкIохэр ухъумэгъэнхэм, зэфагъэм, шъыпкъагъэм, мамырныгъэм, шъхьафитныгъэм, зэкъошныгъэм апэрэу къафэджагъэхэм, псэемыблэжь лIыбланэхэу, бгъэжъ тэмабгъоу, пый къумалым пэуцужьыгъэхэм, зышъхьамысыжьыгъэ лIыхъужъхэм ацIэхэр тшIэн ыкIи яшIэжь дгъэлъэпIэн фае.
Джары цIыф лъэпкъыбэр зэгурыIоу зыщызэдэпсэурэ хэгъэгушхоу Урысыем исубъект хэхыгъэу — Адыгэ Республикэр исабыигъом къыщегъэжьагъэу псэупIэ тынч зыфэхъугъэу, лъэпкъымкIэ урымэу, усакIоу Николай Милиди цIыфхэм ялIыхъужъныгъэ зэмыхъокIыжь кIигъэтхъэу, итхылъыкIэу «Вершина Кавказа» цIэу зыфишIыгъэр ытхыныр къызхэкIыгъэр. Узэкъотмэ узэрэлъэшыр, пытэу узэрэIыгъмэ, анахь къиныгъо иныри зэрэзэпыпчыщтыр къыщыIуагъ, щыкIэгъэтхъыгъ.
Кавказым илъэгапI, илъэпIагъ
КъушъхьэчIэс лъэпкъхэмкIэ къушъхьэр ухъумэпIэ дэпкъ пытагъ: къушъхьэ мэзым игъомылэ яшхыныгъ, къушъхьэпс къабзэр аIупагъ, къушъхьэр яунэпытэпIагъ. ЕтIани Кавказ итеплъэ гур дэкIэжьэу дэхагъэ, псэ зыпыт дунаим ар игъунджэ нэфынагъ. ТхэкIошхохэу А. Пушкиным, М. Лермонтовым, Л. Толстоим, нэмыкIхэми Кавказым идэхагъэ, ащ илъэпIагъэ уасэ фашIыгъ, усэ, поэмэ ыкIи произведение дэгъухэр атхыгъэх. Николай Милиди урыс классикхэм ясатыр иусэ тхы-лъэу «Вершина Кавказа» зыфиIорэмкIэ ахэуцуагъ.
Тхылъыр 2021-рэ илъэсым, Мыекъуапэ, тхылъ тедзапIэу ОАО-у «Полиграф-Юг» зыфиIорэм пчъагъэмкIэ 300 хъоу къыщытырадзагъ.
Зы поэмэрэ ыкIи усэ 60-м нахьыбэрэ ащ дэт. Ахэр зэкIэ псэ зыпыт пстэумэ анахь Iушэу алъытэрэ цIыфым фэгъэхьыгъэх.
«Мансур»
Поэмэр я 18-рэ лIэшIэгъум щыпсэугъэу, лъэпкъ шъхьафитныгъэм, мамырныгъэм, зэгурыIоныгъэ-зэфэдэныгъэм ябэнэкIуагъэу, Кавказым щыпсэурэ цIыфхэмкIэ щысэтехыпIагъэу, дзэ ислъам динлэжьэу, ар цIыфхэм ахэзыгуащэщтыгъэу Шейх Мансур фэгъэхьыгъ. Ар КавказымкIэ апэрэ революционерхэм ахалъытэхэрэм ащыщыгъ. Байхэмрэ лэжьакIохэмрэ азыфагу зэфэмыдэныгъэу дэлъыр емыкIу ылъэгъоу, лъэпкъым икъин фигъэпсынкIэмэ шIоигъоу ичэчэн лъэпкъ имызакъоу, зэкIэ къушъхьэчIэсхэр зэкъогъэуцогъэнхэр, къэгъэущыгъэнхэр Мансур фызэшIокIыгъ. ЦIыфхэм щысэ афэхъоу, зэрэ шъыпкъаIоу, лIыгъэкIэ ыпшъэ укIонэу щымытэу, тхьашIошъхъуныгъэ пытэу иIэр цIыфхэр зэфэгъэдэнхэм фигъэлажьэу щыIагъ. Тарихъ охътэ гъэнэфагъэм щыIэгъэ чэчэн лъэпкъым къыхэкIыгъэ Мансур фэтхагъ усакIоу Николай Милиди. Кавказ тарихъыр зышIогъэшIэгъонхэмкIэ мыр шIухьафтын лъапI, цIыфым фэдэу тхылъ пэпчъи насып иIэшъ, тхылъеджэкIо чаныбэ ыгъотынэу, ахэм яшIошIхэр къыраIотыкIынхэу тяжэ.
«О пцIэкIэ — ЦIыфыр, уищытхъу сэIуатэ»
ЦIыфым ишIушIэ зынэсырэр, лIакъом, лъэпкъым, хэгъэгум алъапсэр цIыф Iушыр арэу зэрэщытыр усэ сатырхэм зэкIоу, купкI иIэу къащыриIотыкIыгъ усакIом.
«Кавказым ихьалэмэтыгъэ орэдэу къэсэIо» зыфиIорэ шъхьэм цIыф цIэрыIохэу тарихъым лъэужышIу къыхэзгъэнагъэхэу, шIэныгъэлэжь-гупшысакIохэм, бзылъфыгъэ ялыехэу зэбгъэпшэн щымыIэхэм ацIэхэр усэ сатыр IупкIэхэмкIэ къыщегъэлъагъох авторым.
Я 3-рэ шъхьэр охътакIэм щыпсэущт ныбжьыкIэхэм афэгъэхьыгъ, «ЩыI ыкIи лъыкIуат лIэужыкIэр» зэреджагъэр. УсакIом зэрэщытэу «Вершина Кавказа» зыфиIорэ темэр, гупшысэр ипоэтическэ гулъытэ-гурышэ чанкIэ зэкIоу, IэпкIэ-лъапкIэу, бзэр чанэу, тхылъым ихудожественнэ гъэпсыкIэ-шIыкIэ зэкIэ сюжетым пхырыщыгъэу, композициер ащ дэIорышIэу усакIом ыгъэпсыгъ. Арышъ, Н. Милиди итхылъыкIэу илъэсыкIэм къыдэкIыгъэмкIэ тыфэгушIо, итворческэ кIуачIэ джыри нахь пытэнэу, псауныгъэрэ гудэчъыгъорэ усэн-тхэнымкIэ иIэу, Кавказым щыпсэурэ лъэпкъхэм ялитературэ ежь иIахь дахэ джыри хилъхьанэу фэсэIо.
Мамырыкъо Нуриет.
Сурэтхэм арытхэр: тхылъыкIэм итеплъ; сурэтэу «Чеченцы»; Шейх Мансур ипортрет.
ЗышIыгъэр джырэ уахътэм исурэтышIэу Руслан Хасхановыр ары.