Республикэм и Къэралыгъо Урыс драматическэ театрэу А. С. Пуш­киным ыцIэ зыхьырэм спектаклэу «Зы чэщыр» апэрэу къыгъэлъэгъуагъ.

Дунаим щыцIэрыIо къэшъокIо ансамблэу «Налмэсым» ипчы­хьэзэхахьэхэр зыщыкIорэ Унэшхом театрэм икъэгъэлъэгъон щызэхащагъ. Зэпахырэ узым къыхэкIэу шапхъэу агъэуцугъэ­хэр зэIукIэм щагъэцэкIагъэх.

Евгений Шварц ытхыгъэм техыгъэ театральнэ IофшIагъэр Урысыем искусствэхэмкIэ изаслуженнэ IофышIэшхоу Юрий Галушкэ ыгъэуцугъ.

ШIушIэ къэгъэлъэгъоныр рагъэжьэным ыпэкIэ Адыгэ Рес­публикэм и Къэралыгъо Урыс театрэ ипащэу Роман Корчанэ зэхахьэм къыщыгущыIагъ.

Хэгъэгу зэошхом илъэхъан пыйхэм Ленинград къадзыхьагъ. Къалэм цIыфхэр дэхьанхэ, дэ­кIынхэ алъэкIынэу щытыгъэп. Мамыр цIыфхэм гъомылапхъэр афикъущтыгъэп, сымаджэхэм Iэзэгъу агъотыныр къин дэдэу щытыгъ.

Роман Корчанэ къыIуагъ Ле­нинград къэзыухъумагъэхэм, фашист техакIохэр зэхэзыкъутагъэхэм лIыхъужъныгъэу зэрахьагъэр гъашIэм зэрэхэмыкIокIэщтыр.

Къэгъэлъэгъоныр

Евгений Шварц ытхыгъэм бэмэ уарегъэгупшысэ. Бзылъфыгъэ ныбжьыкIэу Марфа Васильевам заор зыщыкIорэ чIы­пIэхэр къызэренэкIых.

Ыпхъоу Дашэрэ ыкъоу Сережэрэ алъэ­хъу. Дашэ заводэу шъэфкIэ Iоф зышIэрэм щэлажьэ. Сережэ кIэлэеджакIу, ау заом Iухьанэу зегъэхьазыры…

ИкIалэхэр къыгъотынхэм фэшI М. Васильевам уахътэу иIэр зы чэщ ныIэп. Бзылъфыгъэр цIыфхэм гущыIэгъу афэхъу. Къалэр къызэраухъумэщтыр, мамыр псэукIэм зэрэфэкIощтхэр зэкIэми гупшысэ шъхьаIэу яI.

Адыгэ Республикэм изаслуженнэ артисткэу Лия Телен­ковам М. Васильевам ироль къы­шIызэ, тарихъым инэкIубгъо­хэм гукIэ уахещэ. Ныр икIалэхэм зэралъыхъурэр гущыIэ къодыекIэ къыIуатэрэп. ИзекIокIэ-­шIыкIэхэм псэ зыпыт гущыIэр къахэщы.

Анастасия Федоренкэм — Дашэ, Тимофей Кириченкэм — Сережэ ярольхэр къашIых. Унэм ипащэ ироль Адыгэ Рес­публикэм изаслуженнэ артистэу Владимир Ивановым къегъэлъагъо.

Спектаклэм нэмыкI артистхэри хэлажьэх. Хэгъэгу зэошхом имашIо, блокадэр зытелъ Ленинград афэгъэхьыгъэу Ольга Берггольц ыусыгъэхэр Оксана Нуреевам, Юлия Исуповам, фэ­шъхьафхэм агъэжъынчых.

ЗэлъашIэрэ Юрий Левитан ымакъэ пленкэм тетхагъэу тари­хъым къыхэнэжьыгъ. Ащ уедэ­Iузэ, Хэгъэгу зэошхом имэфэ гумэкIыгъохэр, Ленинград къиныгъоу зэпичыгъэхэр нэгум къыкIэуцох.

ТекIоныгъэм и Мафэ творчествэми къызэригъэблагъэ­щтыгъэр Ольга Берггольц, Юрий Левитан, нэмыкIхэм къытфа­гъэнэгъэ гукъэкIыжьхэм къахэтэгъэщых.

Евгений Шварц ытхыгъэм мэхьэнэ ин иIэу зэрэщытыр ар­­тист пэпчъ IупкIэу къегъэлъа­гъо. Зэо илъэсхэр къытлъы­зыгъэIэсыжьыгъэхэ тхакIохэм, дзэ­кIолI письмэхэм щыIэныгъэм нахь куоу ухащэ.

Адыгеим щыщ дзэкIолI пшIы пчъагъэ Ленинград икъэухъумэн хэлэжьагъ. ЛIыхъужъныгъэу зэ­рахьагъэр яорденхэм, медальхэм тагъашIэ. Ленинград иблокадэ пхырытхъугъэным хэлэжьэгъэ дзэкIолIэу Трахъо Хъалидэ къызэрэтиIогъагъэу, тидзэхэр ос-хъотым хэтхэу къалэм дахьэхэу зырагъажьэм, Ленинград дэс мамыр цIыфхэр, дзэкIолIхэр зэ­рэзэIукIэгъагъэхэр, гушIом хэт­хэу IаплI фабэ зэращэкIызэ нэпсыр къызэряхыщтыгъэр пщы­­гъупшэнхэ плъэкIыщтэп.

Къэгъэлъэгъоным къыпкъырыкIыгъэ гупшысэхэм зэхахьэм хэлэжьагъэхэр тегущыIагъэх. Спектаклэм Iоф дэзышIагъэхэм, артистхэм лъэшэу зэрафэра­зэхэр къаIуагъ.

Ямурадхэр

— ЛIыхъужъ ыкIи лэжьэкIо щытхъум афэгъэхьыгъэ къэгъэ­лъэгъонхэр тапэкIи къэтшIыщтых, — къытиIуагъ Роман Корчанэ. — ТекIоныгъэм и Мафэ лIыхъужъхэм, творчест­вэм пылъхэм къызэрагъэбла­гъэщтыгъэр къыхэдгъэщыщтых.

Урыс театрэм Пушкиным, Чеховым ярассказхэм атехыгъэ къэгъэлъэгъонхэм, кIэлэцIыкIу­хэм апае пшысэхэм Iоф адешIэ, театрэр зыгу рихьыхэрэр шIэхэу яплъынхэ алъэкIыщт.

ЕмтIылъ Нурбый.