Урыс классикхэм ямызакъоу, цIыф лъэпкъ зэфэшъхьафхэм ятхакIохэр, усакIохэр, композиторхэр зынахь лъапIэ щымыIэ Ным фэусагъэх.

Адыгэ литературэм илъэпсэхэщэу КIэрэщэ Тембот повестэу «Ны Iушым ыпхъу» ытхыгъ, ащ дэгъу дэдэу къыщыригъэлъэгъукIыгъ Ным идэгъугъэ-цIыфышIугъэ. Мы произведением техыгъэ спектаклэр Адыгэ къэралыгъо драматическэ театрэм щагъэуцугъ. ТиусакIохэу Пэрэныкъо Мурат, ЯхъулIэ Сэфэр, Жэнэ Къырымызэ, МэщбэшIэ Исхьакъ, Бэрэтэрэ Хьамидэ, Къуекъо Налбый, КъумпIыл Къадырбэч, Кощбэе Пщымафэ, Нэхэе Руслъан ыкIи джырэ уахътэм тиIэ тхакIохэм яусэ сатыр ыкIи гупшысэ гъэчъыгъэхэм Ныр ащагъэшIуагъ.

«Синан» зыфиIорэ усэ-орэдэу Жэнэ Къырымызэрэ Тхьабысымэ Умарэрэ зэдаусыгъэр зэфэдэкIэ Адыгеим имызакъоу, адыгэ дунаим щызэлъашIагъ, къыщаIо, къыдэшъох.

Типсыхъо сыкIэдэIукIымэ, Умакъэ ащ къыхэIукIы, Чъыгы бырабмэ япкIашъэ О пцIэкIэ къысэIушъашъэ. Синанэу синэнэ дах Дунаер сфэогъэдах, Насыпыр о къысэптыгъ, Дунаер къысфыхэпхыгъ.

Ным ишIулъэгъу-гукIэгъу гъунэнчъ, ащ илъфыгъэхэр ыгощхэрэп, ыпсэ къуапэ къыхэкIыгъэхэшъ, щэIэфэ псэр аIуелъхьэ. Тиадыгэ усакIохэри Ным шIоу фаIощтымкIэ зышъхьасыжьы­гъэхэп.

ТхакIоу, усакIоу ГъукIэлI Нурбый ипоэмэу «ГукъэкIыжьым сегъэфабэ» зыфиIорэр Ным фэкIорэ псэлъэ фаб, гупшысэ лъэш зэгъэкIугъ, нэрымылъэгъу IуданэкIэ Нымрэ илъфыгъэхэмрэ сы­дигъуи зэрэзэпхыгъэхэм итхыдэ зэ­гъэ­фагъ, укIэдэIукIымэ, укъызхегъэшхъожьы.

ГукъэкIыжьым сегъэфабэ Тыгъэ бзыир скIышъо нэсмэ, Пкъынэ-лынэр егъэIасэ. Тян, о пIапэ къысэнэсмэ, Сыгоу пшъыгъэр огъэIасэ. Гъэтхэ огур зэIыхьагъэу Бэрэ мэхъу ощхыр къещхэу. ГъэшIэ гъогум сигъэпшъыгъэу, Тян уадэжьы сыкъэкIожьы. Сыппэблагъэмэ, пIэгушъо СкIышъо гуапэу къегъэфабэ. Сыппэчыжьэмэ, зэхасшIэу ГукъэкIыжьым сегъэфабэ. Узым пстэури егъэгуIэ, ГукIодыгъор уегъэщыIэ. Тян, зэхэсхмэ уигущыIэ, МэкIодыжьы узэу сиIэр. Тыгъэр убгъэ о къыщепсы, НитIур жъуагъоу огум щесы. ПсынэкIэчъэу уибыдзыщэ, Тян, дунаим тыхэощэ.

Адыгэ тхакIохэр, усакIохэр, композиторхэр, журналистхэр, сурэтышIхэр Ным иобраз илъэшыгъэ-лъэпIагъэ къыраIотыкIы, анахь гущыIэ фабэхэр, зафэхэр, цIыфлъэпкъым ыпсэу, ыгоу алъытэрэ Ным иобраз тапашъхьэ къырагъэуцо. «Синан!» зыфиIорэ гущыIэ закъор мэкъэ IэтыгъэкIэ зэ къаIуи, ухэтми гучIэ зэхэшIэ блэрхэм узэлъаубытыщт. Ныхэм сыдигъокIи тафэжъугъэсакъ, тафэжъугъэзаф!

Мамырыкъо Нуриет.