«Налмэсыр» зыгъэдахэрэмэ ащыщ
Искусствэр зыщагъэлъэпIэрэ адыгэ унагъом щапIугъэ Хьакъуй Анжеликэ дунаим щызэлъашIэ.
Адыгэ республикэ гимназиер къызеухым, гум къыхихыгъэ сэнэхьатыр ищыIэныгъэ щыщ хъугъэ. Адыгеим и Къэралыгъо академическэ къэшъокIо ансамблэу «Налмэсым» хэтэу концертхэм ахэлажьэу ыублагъ.
Къашъо пэпчъ псэ къыпыбгъэкIэным мэхьанэ ритызэ, шIыкIэшIухэр къыгъотыщтыгъэх. Купышхом ухэтэу къашъор къэпшIы зыхъукIэ, уакъыхэмыщэу адебгъэштэн фае. Къэшъо хэхыгъэр уизакъоу пчэгушхом къыщыбгъэлъэгъоныр искусствэ лъагэм ишапхъэ къыпкъырэкIы. Артистым ежь-ежьырэу цIэ зыфешIыжьы.
Адыгэхэм япэсэрэ щыIакIэ, тарихъым ихъугъэ-шIагъэхэм къахэхыгъэ къашъохэр Хьакъуй Анжеликэ шIогъэшIэгъоных.
Къашъоу «Тыргъэтаор» Анжеликэ къышIызэ, лъэпкъ искусствэм ибаиныгъи къыгъэлъагъощтыгъ. ЗэлъашIэрэ сурэтышI-модельерэу СтIашъу Юрэ апэу шъуашэр ыди, Тыргъэтао иобраз къызэIуихыгъ. Адыгеим инароднэ артистэу Къулэ Амэрбый къашъор ыгъэуцугъ. Къашъоу «Тыргъэтаор» А. Хьакъуим инэмыкI артистхэми дэгъоу къашIы.
Анжеликэ Тыргъэтао иобраз зэрэхэхьагъэр, инэплъэгъукIэ къыIомэ шIоигъор, лъапэкIэ зэрэуцурэр, орэдышъоу жъынчырэм дыригъаштэзэ хъугъэ-шIагъэр къашъом къыщызэIуихын зэрилъэкIырэр, залым къыщеплъыхэрэм зэпхыныгъэу адыриIэ хъугъэр къашъом къызэрэхэщырэр олъэгъух.
«ЗэфакIом» нахьыбэрэмкIэ икIэщакIохэр Бэрзэдж Диан, Хьакъуй Анжелик, Къулэ Алый, Едыдж Гушъау. Адыгэ къашъор гукIэ къызэрашIырэм уеплъызэ, зэдегъэштэныгъэу ахэлъым гур пIэпехы.
— Адыгэ шъуашэм идэхагъи, къашъом купкIэу иIэри къэтэгъэлъагъох, — къеIуатэ Хьакъуй Анжеликэ. — Лъэпкъ шэн-хабзэхэр къашъом щыпхырытэщых.
«ШIуфэс къашъом», «Адыгэ уджхэм», нэмыкI къашъохэм Анжеликэ ахэлажьэ. Сэнэхьатэу къыхихыгъэр шIукIэ къетэжьы. «Налмэсым» ихудожественнэ пащэу, Адыгеим инароднэ артистэу Хъоджэе Аслъан тыщигъэгъозагъ ансамблэр шIэхэу гъогу зэрэтехьащтым.
«Налмэсыр» зызэхащагъэр мыгъэ илъэс 85-рэ мэхъу. Ансамблэм хэтэу Хьакъуй Анжеликэ Москва, Кремлым, Олимпиадэ джэгунхэм, Тыркуем, Израиль, адыгэхэр зыщыпсэурэ IэкIыб хэгъэгухэм, Урысыем ишъолъырхэм къащышъуагъ. Юбилей концертхэм афэхьазыр. Бзылъфыгъэхэм я Дунэе мафэ фэгъэхьыгъэу артисткэ цIэрыIом тыфэгушIо, «Налмэсыр» зыгъэдахэрэмэ ар ащыщ.