Музыкальнэ Iэмэ-псымэхэмкIэ орэдышъохэр къегъэIогъэн­хэмкIэ я IX-рэ зэIухыгъэ зэнэкъокъум Адыгэ Республикэм, Краснодар краим якIэлэеджакIохэр хэлэжьагъэх.

Адыгэ Республикэм и Къэралыгъо программэу «Культурэм хэхъоныгъэ ышIыныр» зыфиIорэм хэ­хьэрэ Iофтхьабзэр гъэ­шIэгъонэу кIуагъэ. Адыгэ Республиэм культурэмкIэ и Министерствэ, искусст­вэхэмкIэ кIэлэцIыкIу еджа­пIэу N 1-м МетодикэмкIэ игупчэ зэхащэгъэ зэнэ­къокъум илъэси 6 — 15 зыныбжьхэр щызэIукIагъэх. Аныбжьхэм ялъытыгъэу ахэр купищэу гощыгъагъэх.

Краснодар культурэмкIэ и Къэралыгъо институт икафедрэ ипащэу, искусст­воведениемкIэ кандидатэу, Дунэе зэнэкъокъухэм лау­реат ащыхъугъэу Владимир Метлушко Iофтхьабзэр зэ­рищагъ. БзэпсхэмкIэ, Iупэ пщынэхэмкIэ, музыкальнэ ударнэ Iэмэ-псы­мэхэмкIэ орэдышъохэр къегъэIогъэнхэмкIэ, искусствэм ибаиныгъэхэр къы­Iотагъэх.

Пхъэм хэшIыкIыгъэ Iэ­мэ­-псымэхэм, музыкэм нахь зиушъомбгъунымкIэ Iупэ пщынэхэр нахьышIоу зэрэбгъэфедэщтхэм, фэшъхьафхэм яхьылIэгъэ къэбархэр кIэлэеджакIохэм ашIогъэшIэгъоныгъэх.

КларнетымкIэ Алексей Грушевскэм, саксофонымкIэ Степан Цукановым музыкэр агъэжъынчызэ, кIэлэеджакIохэм яшIэныгъэ хагъэхъонымкIэ шIыкIэшIухэр къагъэлъэгъуагъэх.

ОсэшI купым хэтхэр, кIэлэегъаджэхэр Iэнэ хъураем хэлэжьагъэх, зэнэ­къокъум икIэуххэр зэфа­хьысыжьыгъэх.

Республикэм изэIухыгъэ зэнэкъокъу кIэлэ­еджэ­кIо 14 илауреат хъугъэ. ЩытхъуцIэхэр къыдэзы­хыгъэхэм дипломхэр, нэпэ­еплъ шIухьафтынхэр афагъэшъошагъэх.

Краснодар краим икъа­лэу Курганинскэ икIэлэ­еджакIоу Вероника Шаповаловам апэрэ чIыпIэр къыдихыгъ, саксофонымкIэ орэдышъохэр ащ къырагъэIуагъэх, кIэлэегъа­джэр В. Грушевский.

Адыгэ Республикэм икIэлэеджакIоу, Красно­гвардейскэ искусствэхэмкIэ икIэлэцIыкIу еджапIэ зыщызыгъэсэрэ Екатерина Куковицкаям ящэнэрэ чIыпIэр къыдихыгъ, кIэлэ­егъаджэр Н. Силаева.

ИскусствэхэмкIэ Тульскэм икIэлэцIыкIу еджапIэ къикIыгъэ Софья Машенцевам (флейтэр) апэрэ чIыпIэр къыдихыгъ, кIэлэ­егъаджэр Н. Орлова.

Курганинскэ, Темиргоевскэм, Лабинскэ якIэлэ­еджакIохэр яIэпэIэсэны­гъэкIэ нахь къахэщыгъэх, хагъэунэфыкIырэ чIыпIэхэр афагъэшъошагъэх.

КIэлэеджакIохэм искусствэр агу зэрэрихьырэр, яшIэныгъэ хагъахъо зэрашIоигъор зэнэкъокъум къыгъэлъэгъуагъ. Музыкальнэ искусствэм ипIуныгъэ мэхьанэ зыкъызэриIэтырэр зэхэщакIохэм къыхагъэщыгъ.

ЕмтIылъ Нурбый.