ЦIэрыIохэм «Налмэсыр» ащыщ
Урысые Федерацием итворческэ куп цIэрыIохэм япащэхэм язэIукIэ «Росконцертым» щыкIуагъ.
Москва щызэхащэгъэ Iофтхьабзэр «Росконцертым» ипэщэ шъхьаIэу А. В. Малышевым зэрищагъ.
Лъэпкъ творческэ купхэм концертхэр къатынхэм, зэпахырэ узым къыпкъырыкIэу къиныгъоу яIэ хъугъэхэр дэгъэзыжьыгъэнхэм, искусствэм иамалхэмкIэ цIыфхэм алъыIэсынхэм зэхахьэм щытегущыIагъэх. «Росконцертымрэ» лъэпкъ профессиональнэ творческэ купхэм я Союз ипащэхэмрэ Iофтхьабзэр зэхащагъ.
Адыгэ Республикэм культурэмкIэ иминистрэу Аулъэ Юрэ зэхахьэм къыщыгущыIагъ. Республикэм и ЛIышъхьэу КъумпIыл Мурат, Правительствэм лъэпкъ культурэм, искусствэм хэхъоныгъэхэр ашIынхэмкIэ зэхэщэн Iофхэр зэрагъэцакIэхэрэр, профессиональнэ творческэ купхэм я Союзрэ «Росконцертымрэ» мэхьэнэ ин зиIэ Iофтхьабзэхэм кIэщакIо зэрафэхъугъэхэр хигъэунэфыкIыгъэх.
Къэралыгъо академическэ урыс лъэпкъ хорэу М. Е. Пятницкэм ыцIэ зыхьырэр, Москва и Къэралыгъо академическэ къэшъокIо театрэу «Гжель» зыфиIорэр, Рязань, Татарстан, Къэбэртэе-Бэлъкъарым, Дагъыстан, Чэчэным, нэмыкIхэм ятворческэ купхэм япащэхэр зэхахьэм хэлэжьагъэх.
Адыгэ Республикэм и Къэралыгъо лъэпкъ къэшъокIо ансамблэу «Налмэсым» ихудожественнэ пащэу, балетмейстер шъхьаIэу Хъоджэе Аслъанрэ ансамблэм ипащэу Тхьаркъохъо Азэматрэ «Налмэсым» ыцIэкIэ зэхахьэм хэлэжьагъэх.
— Лъэпкъ профессиональнэ творческэ купхэм я Союз «Налмэсыр» хэт, — къытиIуагъ Хъоджэе Аслъан. — Москва щыкIогъэ зэхахьэм тызыгъэгъозэрэ къэбар гъэшIэгъонхэр щызэхэтхыгъэх. Лъэпкъ искусствэр нахь зегъэушъомбгъугъэу цIыфхэм зэралъыдгъэIэсыщтым тытегущыIагъ.
Адыгеим ирайон гупчэхэм, къуаджэхэм «Налмэсым» концертхэр къащитыщтых. Ащ дакIоу, зэкъошныгъэм ипчыхьэзэхахьэхэр, мэфэкI концертхэр Урысыем ишъолъырхэм ащызэхищэщтых.
2021-рэ илъэсым «Налмэсыр» илъэс 85-рэ хъущт. «Ащ ехьылIэгъэ пчыхьэзэхахьэхэм ансамблэ цIэрыIом зафегъэхьазыры.
«Росконцертым» ипэщэ шъхьаIэу Андрей Малышевым зэхахьэм къыщиIуагъ «Гастроль инхэр» зыфиIорэ Iофтхьабзэр зэрэлъагъэкIотэщтыр. Урысыем культурэмкIэ и Министерствэ «Гастроль инхэр» хэгъэгум ишъолъыр пстэуми ащызэхищэн имурад. Лъэпкъ ансамблэхэри ащ хагъэлэжьэщтых.
Гастрольхэм апэIухьащт мылъкумкIэ, зэхэщэн IофхэмкIэ Урысыем культурэмкIэ и Министерствэ ансамблэхэм IэпыIэгъу къафэхъущт.
Лъэпкъ профессиональнэ творческэ купхэм я Союз ипрезидентэу, Дагъыстан и Къэралыгъо академическэ ансамблэу «Лезгинкэм» ипащэу Джамбулат Магомедовым къыIуагъ хэгъэгум иансамблэхэм хэхъоныгъэ инхэр зэрашIырэр. «Гастроль инхэм» яшIуагъэкIэ культурэр, тарихъыр цIыфхэм нахьышIоу зэрагъэшIэщт.
Хэгъэгум щыпсэурэ лъэпкъхэм язэпхыныгъэхэр «Гастроль инхэм» агъэпытэщтых, искусствэм хэхъоныгъэ инхэр ышIыщтых. Тигуапэ анахь цIэрыIохэм ащыщэу «Налмэсыр» концертхэм зэрахэлэжьэщтыр.