Къэгъэлъэгъонхэм тяплъыщт
Гъэтхапэм и 5-м бэрэ тызэжэгъэ Iофтхьабзэм тыхэлэжьэщт. А мафэм Адыгэ Республикэм и Къэралыгъо Камернэ музыкальнэ театрэу Хьанэхъу Адам ыцIэ зыхьырэм къэгъэлъэгъон щыкIощт.
«Опереттэр сишIулъэгъу» зыфиIорэ музыкальнэ къэгъэлъэгъоныр гъэшIэгъонэу гъэпсыгъэ. Театрэм ипчъэхэр пчыхьэзэхахьэм къыщызэIуахыщтых.
— 2020-рэ илъэсым кIэу дгъэуцугъэ спектаклэхэм, илъэс зэфэшъхьафхэм къэдгъэлъэгъуагъэхэу цIыфхэм агу рихьыгъэ театральнэ IофшIагъэхэм къахэтхыгъэ пычыгъохэм шъуядгъэплъыщт, — къытиIуагъ Адыгэ Республикэм и Къэралыгъо Камернэ музыкальнэ театрэу А. Хьанэхъум ыцIэ зыхьырэм ихудожественнэ пащэу, Урысыем, Адыгеим искусствэхэмкIэ язаслуженнэ IофышIэшхоу Сулейманов Юныс. — Зэпахырэ узым къыхэкIэу тикъэгъэлъэгъонхэр зэпыдгъэугъагъэх. IофшIэныр етэгъэжьэжьы, ау театрэр зыгу рихьыхэрэм шэпхъэ гъэнэфагъэхэр агъэцэкIэнхэ фае.
Залым тIысыпIэу иIэм ипроцент 50-р ары театрэм икъэгъэлъэгъонхэм яплъынхэу чIагъэхьащтхэр. Театрэм икъэгъэлъэгъон еплъыщтхэм нэгуихъомрэ социальнэ зэпэчыжьэнымрэ япхыгъэ шапхъэхэри агъэцэкIэнхэ фае. Афэгъэнэфэгъэ тIысыпIэхэр арых щысыпIэу яIэщтыр. Камернэ музыкальнэ театрэу А. Хьанэхъум ыцIэ зыхьырэм икъэгъэлъэгъонхэм артистхэм орэдхэр къыщаIощтых, къашъохэр узыIэпащэу къашIыщтых. Сэмэркъэу зыхэлъ едзыгъохэр щыIэныгъэм къыхэхыгъэх.
Адыгэ Республикэм инароднэ артистэу, Грузием изаслуженнэ артистэу Исуп Аслъан ыгъэуцугъэ къашъохэр гум екIух, артистхэм жьы акIэтэу, нэгушIохэу къагъэлъагъох.
Режиссерэу Сулейманов Юныс ыгъэуцугъэ театрализованнэ музыкальнэ къэгъэлъэгъонхэм артистхэм яIэпэIэсэныгъэ ащыхагъахъо. Едзыгъо кIэкIым артистым сэнаущыгъэу хэлъыр къыщызэIуихын елъэкIы.
Къэгъэлъэгъонэу «Угощэ дэгъумэ, урихьылIагъ» зыфиIоу Цэй Ерстэм ытхыгъэм техыгъэ къэгъэлъэгъоныр адыгабзэкIэ кIощт. Сулейманов Юныс къызэрэтиIуагъэу, адыгэ унагъом инепэрэ щыIакIэ, уахътэм къызыдихьырэ Iофыгъохэм яплъы зышIоигъохэр театрэм рагъэблагъэх. Галина Лодяновам ытхыгъэу «Опереттэр сишIулъэгъу» зыфиIорэ къэгъэлъэгъоным еплъы зышIоигъохэу упчIэ зиIэхэр мыщ фэдэ телефонкIэ театрэм теонхэ алъэкIыщт: 80928-467-44-77; 52-09-22.
Театрэм шъуеблагъэх, къэгъэлъэгъонхэм шъуяплъ.