Урысыем футболымкIэ и Кубок къыдэхыгъэным хэлэжьэрэ командэхэм зэIукIэгъухэм апаублэжьыгъ.

Финалым и 1/8-м нэсыгъэхэр мэзаем и 20-м къыщегъэжьагъэу зэдешIэх.

КIэуххэр

«Зенит» — «Арсенал» — 1:2, «Локомотив» — «Тамбов» — 3:0, ЦСКА — СКА Хабаровск — 2:0, «Краснодар» — «Шъачэ» — 1:2, «Ростов» — «Ахмат» — 0:1, «Динамо» — «Спартак» — 2:0, «Химки» — «Крылья Советов» — 0:4. 2021-рэ илъэсыр Урысыем ифутбол клубхэм Кубокым фэ­гъэхьыгъэ зэIукIэгъухэмкIэ рагъэ­жьагъ. ЕшIэгъухэм ащыщхэм кIэухэу афэхъугъэр бгъэшIэгъонэу щыт.

Урысыем изэнэкъокъу 2020-рэ илъэсым дышъэр къыщыдэзыхыгъэ «Зенит» Санкт-Петербург зыщешIэм, «Арсеналыр» къытекIуагъ. Д. Кузяевым я 19-рэ такъикъым «Арсенал» икъэлапчъэ Iэгуаор дидзагъ. Ау К. Панченкэм, я 25-рэ, Р. Бауэр, пенальтикIэ, я 37-рэ такъикъхэм чемпионым икъэлапчъэ Iэгуаор дадзагъ. «Зенит» бэрэ ыпэкIэ илъыгъэми, хъагъэм Iэгуаор дидзэн ылъэкIыгъэп.

«Динамэр» «Спартак» зэрэтекIуагъэри къыхэтэгъэщы, Д. Фо­миным, пенальтикIэ, я 16-рэ такъикъым, К. Тюкаевым я 70-м къэлапчъэм Iэгуаор дадзагъ.

«Спартак» иешIакIэ зэIукIэ­гъум къыщигъотыгъэп. АпэкIэ илъыщтхэр, гупчэм щешIэщтхэр нахь зэгъэфагъэхэу зэнэкъокъум къы­щылъэгъонхэ фэягъ. Я 81-рэ такъикъым ифэшъуашэу В. Мозес судьям ешIапIэм ригъэкIыгъ. «Динамэр» нахь зэгурыIоу ешIагъ.

И. Ахметовым, я 39-рэ, Н. Влашич я 66-рэ такъикъхэм къэлапчъэм Iэгуаор дадзагъ, ЦСКА-р СКА Хабаровск 2:0-у текIуагъ.

«Локомотив» ешIэгъум ехъу­лIэу къаугъоигъэ «Тамбовым» 3:0-у къышIуихьыгъ.

Ижъырэ адыгэ къалэу Шъачэ икомандэ Краснодар зыщешIэм, Заболотнэмрэ Жоазиньорэ я 52-рэ, 67-рэ такъикъхэм къэлапчъэм Iэгуаор дадзагъ. Ащ ыуж «Краснодар» дахэу ешIагъ. Вильенэ метрэ 20 фэдизкIэ зыпэчыжьэ къэлапчъэм дауи, Iэ­гуа­ор чэрэгъузэ хъагъэм ифагъ. КъэлэпчъэIутэу Джанаевым а уахътэм Iэгуаом зылъидзыгъ шъхьае, къыубытын, къызэкIи­дзэжьын ылъэкIынэу щытыгъэп — Iэгуаор чэрэгъузэ зэрэбыбырэм фэшI.

Зичэзыу ешIэгъоу «Краснодар» «Динамо» Загреб дыриIэщтым Т. Вильенэ джащ фэдэ IэпэIэсэныгъэ къыщигъэлъэгъо­нэу фэтэIо.

«Ахмат» Ростов-на-Дону зыщешIэм, пенальтир Беришэ дэгъоу ыгъэцэкIагъ. Я 81-рэ такъи­къым «Ростовым» иешIакIоу Нориманн пенальтикIэ къэлап­чъэм лъэшэу дэуагъ, ау «Ахмат» икъэлэпчъэIутэу Шелие Iэгуаом лъыIаби, къызэкIидзэжьыгъ.

Хэгъэгум изэнэкъокъоу апэрэ купым щыкIорэм щешIэрэ футбол клубэу «Крылья Советов» «Химки» истадион 4:0-у текIоныгъэр къыщыдихыгъ. «Химки» Глушаковыр, Мырзэр, нэмыкI футболист цIэрыIохэри щешIа­гъэх, ау къэлапчъэм бэрэ дэуагъэхэп, ухъумакIохэр чIыпIэ къин ра­дзагъэхэп.

Хэзыгъэхэр

Кубокым фэгъэхьыгъэ зэнэ­къокъум «Зенит», «Спартак», «Краснодар», «Ростов», «Химки», «Тамбов», нэмыкIхэри хэзыгъэх. Гъэтхапэм и 3-м зэIукIэщтхэр: «Уфа» — «Урал». ТекIоныгъэр къыдэзыхыгъэхэр финалым и 1/4-м хэхьагъэх. ЗэIукIэщт командэхэр пхъэдзым къыгъэнэфэщтых.

«Шъачэ» Европэм икубокхэм афэбэнэн имурад, тренер шъхьа­Iэу Владимир Федотовым къы­Iуагъ апэ итхэм ащыщ хъунхэм ешIакIохэри зэрэфаехэр.

«Зенит», «Спартак», «Краснодар», фэшъхьаф клубхэу Кубокым фэгъэхьыгъэ зэнэкъокъум къыхэзыгъэхэр хэгъэгум иап­шъэрэ куп щыкIорэ зэIукIэгъухэм медальхэр къыщахьы ашIоигъу.

Зэнэкъокъум паублэжьыгъ

2020 — 2021-рэ илъэс ешIэгъум футбол клубхэм паублэ­жьыгъ. Мэзаем и 26 — 28-м я 20-рэ зэIукIэгъухэр апшъэрэ купым хэт футбол клубхэм яIэщтых.

ЕшIэгъухэр

26.02 «Тамбов» — «Ротор» 27.02 «Химки» — «Урал» «Зенит» — «Ростов» «Шъачэ» — «Арсенал» «Локомотив» — ЦСКА 28.02 «Спартак» — «Рубин» «Ахмат» — «Динамо» «Краснодар» — «Урал».

Хэта зыхьыщтыр?

Апэрэ ешIэгъухэр клубхэм къин къащыхъущтых. КIымэфэ зыгъэпсэфыгъом ыуж зэде­шIэщтхэм тшIогъэшIэгъонэу тяплъыщт. «Зенит» итренер шъхьаIэу Сергей Семак зэрилъытэрэмкIэ, апэрэ мафэхэм зэIукIэгъу гъэшIэгъонхэр тлъэгъущтых, текIоныгъэр къыдэзыхыщтыр къэшIэгъуае.