«Уфа-Алиса» Уфа – «АГУ-Адыиф» Мыекъуапэ – 22:22 (12:11). Мэзаем и 23-м Уфа щызэIукIагъэх.

«Адыиф»: къэлэпчъэIутхэр: С. Кожубековар, Баскаковар; ешIакIохэр: Краснокутскаяр – 1, Кирилловар, Серадскаяр, Логви­ненкэр, Богдановар – 4, Измайловар – 2, Куцеваловар – 5, Казихановар – 1, Дмитриевар – 3, Коблыр – 2, Ю. Кожубековар – 1, Стрельцовар – 3.

— Къалэу Уфа иешIакIохэр текIоныгъэм фэбэнэщтых, тэри зэIукIэгъур къэтхьы тшIоигъу, – къытиIуагъ «Адыифым» итренер шъхьаIэу, Адыгэ Республикэм изаслуженнэ тренерэу Никита Голуб гандбол зэдешIэгъур рагъэжьэным ыпэкIэ.

ТекIоныгъэр зыхьыщтыр язэрэмыгъашIэу ешIакIохэр зэнэкъокъу­гъэх. Я 52-рэ такъикъым «Адыифым» икъэлапчъэ Е. Голуновам Iэгуаор къыдидзагъ – 19:19.

Я 57-рэ такъикъым тиешIэкIо ныбжьыкIэхэм ащыщэу Ангелина Куцеваловам хъагъэм Iэгуаор ридзагъ. Пчъагъэр 19:20. Ащ ыуж А. Киселевам тикъэлапчъэ Iэгуа­ор къыдедзэ – 20:20.

ЗэIукIэгъур аухынкIэ такъи­къи 2 къэнагъ. «Уфар» ыпэкIэ къи­лъи, пчъагъэм хигъэхъуагъ – 21:20. НэгъэупIэпIэгъу 46-рэ къэнагъэу Дарья Богдановар ухъумакIом IэкIэкIи, хъагъэм Iэгуаор ридзагъ – 21:21-рэ.

Пчъагъэр зэфэдэу ешIэгъур аухыщтэу тыгугъэзэ, А. Киселевам хэкIыпIэ къыгъоти, «Адыифым» икъэлапчъэ Iэгуаор ди­дзагъ – 22:21-рэ, уахътэр – 59.38-рэ.

«Адыифым» гугъэр чIинэрэп, псынкIэу ыпэкIэ илъыгъ. Дарья Богдановам икIэрыкIэу ухъума­кIор къызэренэкIы, гупчэм ащыпхырэкIы. Лъэшэу ащ Iэгуа­ор зедзым «Уфам» икъэлапчъэ дэ­фагъ – пчъагъэр 22:22-рэ.

«Уфам» иешIакIохэр ошIэ-дэмышIэу апэкIэ илъыгъэх, ахэм тиклуб икъэлапчъэ Iэгуаор къыдадзэн алъэкIыгъэп, ешIакIохэм ащыщ блэугъ. ТекIоныгъэр «Адыифым» къыдимыхыгъэми, ешIакIохэм гуетыныгъэу, IэпэIэсэныгъэу къагъэлъэгъуагъэм тигъэгушIуагъ. КъэлэпчъэIутхэм, ухъумакIохэм зэгурыIоныгъэ ахэлъэу, цыхьэшIэгъоу зэрешIэхэрэр къыхэтэгъэщы. АпэкIэ зилъыхэкIэ хэкIыпIэшIу­хэр къэзыгъотыгъэхэ А. Куцеваловам, Д. Богдановам, нэмыкIхэм тафэраз.

ЕшIэгъухэм якIэуххэр

«Ростов-Дон» — ЦСКА – 21:20, «Ставрополье» — «Динамо» — 34:23, «Луч» — «Университет» — 30:38.

Зэтэгъапшэх 1. «Ростов-Дон» — 34 2. ЦСКА — 30 3. «Лада» — 30 4. «Астраханочка» — 26 5. «Звезда» — 26 6. «Кубань» — 22 7. «Ставрополье» — 16 8. «Университет» — 14 9. «АГУ-Адыиф» — 10 10. «Динамо» — 7 11. «Уфа» — 5 12. «Луч» — 4. Гъэтхапэм и 9-м «Адыифыр» «Луч» Москва Мыекъуапэ щыдешIэщт.