«Динамо-Синара» Волгоград – «АГУ-Адыиф» Мыекъуапэ – 15:15 (11:6). Мэзаем и 12-м Волгоград щызэдешIагъэх.«Адыиф», къэлэпчъэIутхэр: С. Кожубекова, Баскакова; ешIа­кIохэр: Клименко – 1, Краснокутская – 3, Кириллова – 1, Серадская, Богданова – 3, Измайлова – 6, Казиханова, Кобл, Стрельцова – 1. Суперлигэм хэт бзылъфыгъэ гандбол командэхэу «Динамэр» ыкIи «Адыифыр», анахь макIэмэ, я 9-рэ чIыпIэм фэбанэх. ЗэIукIэгъоу Волгоград щыкIуагъэр хырыхыхьэм фэдагъ. Апэрэ едзыгъор 11:6-у «Динамэм» зехьым, хэта зышIагъэр пчъагъэр зэфэдэу зэнэкъокъур аухыщтымэ? Я 49-рэ такъикъым пчъагъэр 14:12-у щытыгъ. Галина Измайловар ыпэкIэ илъи, хъагъэм Iэгуаор ридзагъ – 14:13, я 52-рэ такъикъым Ирина Клименкэр ухъумакIохэм ябэнызэ, къэлап­чъэм Iэгуаор дидзагъ – 14:14. «Динамэр» пчъагъэр зэфэдэ зэрэхъугъэм емызэгъэу ыпэкIэ къылъэкIуатэ, Д. Стаценкэм хъа­гъэм Iэгуаор редзэ – 15:14. ЗэIукIэгъур аухынкIэ такъикъи 4 къэнагъ. Галина Измайловам я 57-рэ такъикъым «Динамэм» икъэлапчъэ Iэгуаор дедзэ – 15:15. ЕшIэгъум къырыкIощтыр нахь къэшIэгъуае хъугъэ. «Адыифыр» ыпэкIэ илъыгъэу Д. Богдановам Iэгуаор IэкIахыгъ. «Динамэм» хэтэу Е. Дузкинар тикъэлапчъэ благъэу къекIузэ, Д. Казихановар пытэу пэуцуи, Iэгуаор тикъэлапчъэ къыдаригъэдзагъэп. Аужырэ такъикъым командэхэм якъэлэпчъэIутхэр цыхьэшIэгъоу ешIагъэх. Г. Измайловар зы нэгъэупIэпIэгъу къэнагъэу тазыркIэ къэлапчъэм дэуагъ, ау Колесниковам Iэгуаор кIуапIэ ритыгъэп. Пчъагъэр 15:15-у ешIэгъур аухыгъ, текIоныгъэр «Адыифым» IэкIэкIыгъ. «Динамэм» хэтхэу С. Стаценкэм, Э. Сидинам, А. Лебедевам хъагъэм Iэгуаом щырыщэ радзагъ. ТекIоныгъэр къыдахын ямурадэу тиухъумакIохэр бэрэ агъэгумэкIыгъэх. ЕплъыкIэхэр Гандбол клубэу «Адыифым» итренер шъхьаIэу, Адыгэ Рес­пуб­ликэм изаслуженнэ тренерэу Никита Голуб тизэдэгущыIэгъу къыщыхигъэщыгъ типшъашъэхэр текIоныгъэм зэрэфэбэнагъэхэр. Ухъумэн Iофыгъохэр дэгъоу агъэ­цэкIагъэх, ау ыпэкIэ ще­шIэ­хэрэм къэлапчъэм Iэгуаор дадзэнымкIэ IэпэIэсэныгъэу къа­гъэлъэгъуа­гъэм тигъэрэзагъэп. «Динамэм» хэтхэри апэкIэ зи­лъы­хэкIэ дэ­гъоу ешIэнхэм фэхьазырхэп. тикъэлэпчъэIутэу Светлана Кожубековар, Галина Измайловар лъэшэу уащытхъу­нэу ешIагъэх. Галина Измайловар зэIукIэгъу пэпчъ дэгъоу ешIэ, хъагъэм Iэгуаор ридзэзэ, зэнэкъокъум щысэшIу къыщегъэ­лъагъо. КIэуххэр Суперлигэм хэт командэхэм язэIукIэгъухэр. ЦСКА — «Звезда» — 31:25 (17:11), «Уфа» — «Ставрополье» — 20:25 (10:16). Хэт тыдэ щыIа? 1. «Ростов-Дон» — 30 2. ЦСКА — 28 3. «Лада» — 28 4. «Астраханочка» — 26 5. «Звезда» — 26 6. «Кубань» — 20 7. «Ставрополье» — 14 8. «Университет» — 12 9. «АГУ-Адыиф» — 7 10. «Динамо» — 7 11. «Уфа» — 4 12. «Луч» — 4. Мэзаем и 17-м «Адыифыр» «Ставропольем» Мыекъуапэ щыIукIэщт. ТекIоныгъэм фэкIорэ ешIэкIэ дэгъу типшъашъэхэм къагъэлъэгъонэу, тагъэгушIонэу афэтэIо. Мэзаем и 23-м «Адыифыр» Уфа щешIэщт. А зэIукIэгъум кIэухэу фэхъущтыми тегъэгумэкIы.