Урысые Федерацием дзюдомкIэ ихэшыпы­кIыгъэ командэ иегъэ­джэн-зыгъэсэн зэIу­кIэ­гъухэр ижъырэ адыгэ къалэу Шъачэ щэкIох.Европэм, дунаим язэIукIэгъу­хэм, Олимпиадэ джэгунхэм ахэ­лэжьэщтхэр къыхэхыгъэнхэм афэгъэхьыгъэ зэхахьэр Шъачэ испорт псэуалъэхэм ащызэха­щагъ. Хэгъэгум дзюдомкIэ ихэшы­пыкIыгъэ командэ итренер шъхьа­Iэу, Урысыем, Адыгэ Респуб­ликэм язаслуженнэ тренерэу Тао Хьасанбый Мыекъопэ бэнэпIэ еджапIэм зыщигъэсагъ. Олимпиадэ джэгунхэм джэрзыр къа­щыдихыгъ. — БэнакIохэм гуетныгъэ ахэлъэу дунэе зэIукIэгъухэм за­фагъэхьазыры, — къытиIуагъ Тао Хьасанбый. — КIуачIэр зэра­псыхьэрэм дакIоу, алырэгъум шIыкIэшIухэр щагъэфедэнхэм, текIоныгъэр зэнэкъокъум къыщыдахыным зыфагъасэ. Адыгеим щыщхэр Ордэн Адзаур, Мерэм Дамир, Датхъужъ Алый Адыгэ Респуб­ликэм дзюдомкIэ испорт еджапIэу Кобл Якъубэ ыцIэ зыхьырэм щапIугъэх. Хэгъэгум ихэшыпыкIыгъэ командэ хэтых. — Егъэджэн-зыгъэсэн зэIу­кIэгъухэр тшIогъэшIэгъоных, — къеIуатэ Ордэн Андзаур. — Спортышхом щызэлъашIэрэ Тао Хьа­санбый типащэу алырэгъум тыщэбанэ. КIуачIэм хэдгъэхъоным фэшI спорт псэуалъэхэр тэгъэфедэх. Жьы къабзэм ты­хэтэу Iоф зыдэтэшIэжьы. Спортышхом зэфещэх Хэгъэгум ишъолъырхэм къары­кIыгъэ бэнакIохэр Шъачэ щызэ­IуагъэкIагъэх. Мерэм Дамиррэ Датхъужъ Алыйрэ язэфэхьы­сыжьхэм ягуапэу къащыхагъэщыгъ бэнакIохэм нахьышIоу нэ­Iуасэ зэрафэхъухэрэр. — Зыр зым еупчIыжьынэу, дзюдом ишъэфхэр нахьышIоу зэрагъэшIэнхэм фэшI уахъти, амали яI, — игупшысэхэм тащегъэгъуазэ Мерэм Дамир. Дзюдор спорт лъэпкъ къодыеу щытэп. Ар щыIэныгъэм зэрэдиштэрэр уахътэм къегъэлъагъо. КIэлэцIыкIухэр, еджакIохэр дзюдом щыцIэрыIохэм акIырэплъых. — Псэ зыпыт зэIукIэгъухэм ямэхьанэ хэпшIыкIэу хэхъуагъ, — къеIуатэ Датхъужъ Алый. — Дунаим, Европэм, Олимпиадэ джэгунхэм медальхэр къащызыхьыгъэхэм уахэтэу алырэгъум зыщыбгъасэ зыхъукIэ, спортым гукIэ нахь пэблагъэ охъу. Iоф зыдэпшIэжьыным пае хэкIыпIэу къэбгъотырэр бэкIэ нахь гъэ­шIэгъон. Дышъэр къэзыхьыгъэр Олимпиадэ джэгунхэу Рио­-де-Жанейро щыкIуагъэхэм дзюдомкIэ дышъэр къэзыхьыгъэ Мудрэнэ Бислъан Адыгеим щапIугъ. Къэбэртэе-Бэлъкъарым ар къыщыхъугъ. КIэлэцIыкIоу тиреспубликэ къакIуи, респуб­ликэм самбэмкIэ иеджапIэ зыщигъасэу ригъэжьагъ. Апэрэ уахъ­эм тренерэу иIагъэх Хьэпэе Арамбый, Хьэпэе Хъалид, Хъот Юныс. Адыгэ республикэ гимназиер, колледжыр Мыекъуапэ къыщиу­хыгъэх, апшъэрэ еджапIэм чIэ­хьагъ. — Мыекъопэ бэнэпIэ еджапIэу Кобл Якъубэ лъапсэ зыфишIыгъэр дунаим щашIэ, — къы­тиIуагъ Мудрэнэ Бислъан. —IэкIыб къэрал тыкIуагъэу тибэ­накIохэм къакIэупчIэхэу, еджапIэм иIофшIакIэ къыщытхъухэу зэхэсхмэ, сэгушIо. Дышъэр Рио­-де-Жанейро къызыщысэхьым, Адыгеим щыщ нэбгырабэ къызэрэсфэгушIуагъэр, рес­публикэм иIэшъхьэтетхэр, зэ­лъа­шIэрэ ансамблэу «Налмэсыр», спортым пылъхэр Мыекъуапэ, Адыгеим ирайонхэм къазэрэ­щытпэгъокIыгъэхэр егъашIэм сыгу илъыщт. Шъуащытэгъэгъуазэ Сурэтым ит нарт шъаохэм 2019 — 2020-рэ илъэсым ягъэ­хъагъэхэм шъуащытэгъэгъуазэ. Блий Аюбэ Къэбэртэе-Бэлъкъарым къыщыхъугъ, аужырэ лъэ­хъаным Ермэлхьаблэ зы­щегъасэ. Адыгэ Республикэм изаслуженнэ тренерэу, Фэдз щыщэу Псэунэ Мурат ипащэу хэгъэгу, дунэе зэнэкъокъухэм ахэлажьэ. Европэм и Кубок дзюдомкIэ къыдэзыхыгъэ Блий Аюбэ къызэриIуагъэу, ямедальхэм ахагъахъозэ, бэнакIохэм тагъэгушIо ашIоигъу. Ордэн Андзаур Урысыем и Кубок зыфэбанэм, апэрэ чIыпIэр къыхьыгъ. Датхъужъ Алый Урысыем изэ­нэкъокъу зыхэлажьэм, илъэс 23-м нэс зыныбжьхэм якуп тыжьыныр къыщыфагъэшъошагъ. Мерэм Дамир Урысыем изэ­нэкъокъу ятIонэрэ чIыпIэр къыфагъэшъошагъ. Кубокым фэбэнэщтых Мэзаем и 21-м нэс дзюдомкIэ бэнакIохэр Шъачэ щыIэщтых. Анахь дэгъоу зыкъэзыгъэлъэ­гъуагъэхэр зэнэкъокъухэм ахэлэжьэщтых. — Европэм и Кубок къыдэ­хыгъэным фэгъэхьыгъэ зэIухыгъэ зэнэкъокъур Чехием икъалэу Прагэ щыкIощт, — къытиIуагъ Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгеим дзюдомкIэ ихэшыпы­кIыгъэ командэ итренер шъхьаIэу Бастэ Сэлымэ. — Ордэн Ан­дзауррэ Мерэм Дамиррэ Кубокым фэбэнэщтхэм ащыщых. Шъачэ зэIукIэгъухэр зэрэщыкIуагъэхэр зэфахьысыжьыщтых, пащэхэм мурадыкIэхэр рахъу­хьащтых. Сурэтым итхэр: дзюдомкIэ бэнакIохэу Блий Аюб, Мерэм Дамир, Датхъужъ Алый, Ордэн Андзаур, Мудрэнэ Бислъан. НэкIубгъор зыгъэхьазырыгъэр ЕмтIылъ Нурбый.