КIэлэцIыкIухэмрэ ныбжьыкIэхэмрэ япсауныгъэ агъэпытэнымкIэ, яспорт ухьазырыныгъэ хагъэхъонымкIэ зэнэкъокъу гъэшIэгъонхэр Адыгеим щызэхащэх.

Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм кIэлэ­еджакIохэм язэнэкъокъу щыкIуагъ. Илъэс 15-м нэс зыныбжьхэм дзюдомкIэ яIэпэIэсэ­ныгъэ къагъэлъэгъуагъ. Къуаджэхэм къары­кIыгъэхэм алырэгъум кIуачIэр дэгъоу зэрэщагъэфедэрэм дакIоу, дзюдом ишъэфхэр нахьышIоу зэрагъашIэ зэрэхъухэрэм тегъэгушIо.

Зэнэкъокъум апэрэ чIыпIэхэр къыщыдэзыхыгъэхэм шъуащытэгъэгъуазэ. Ацумыжъ Ренат, кг 38-рэ, Афыпсыпэ щыщ, тренерыр Нэгъуцу Азэмат, Байкъулэ Аслъан, кг 42-рэ, Хьакурынэхьаблэ къикIыгъ, тренерыр Шъы­нэхъо Мурат, Хьамырзэкъо Азэмат, кг 60, ари Шъынэхъо Мурат егъасэ.

Джарымэ Ибрахьим, кг 46-рэ, Пэнэхэс щыщ, тренерыр Ацумыжъ Заур, Апыщэ Ис­лъам, кг 50, Адыгэкъалэ зыщегъасэ, тренерыр Шъэумэн Байзэт.

Мыекъуапэ иIэпэIэсэныгъэ щыхэзыгъахъо­рэ Шъынэхъо Аслъан, кг 55-рэ, тренерхэу Беданыкъо Байзэтрэ Мерэм Саидэрэ ипащэх. Мыгу Батырбый, кг 66-рэ, тренерыр Хьэшхъуанэкъо Айвар. БэнакIом Мыекъуапэ зыщегъасэ. Мыекъопэ районым икIэлэ­еджакIоу Евгений Вотковыр, кг 73-рэ, чемпион хъугъэ, тренерыр ХьакIэмыз Мурат.

Яблоновскэ щеджэрэ Максим Грищук, кг 73-м къехъу, апэрэ чIыпIэр къыдихыгъ, тренерыр Виктор Божанов.

Апэрэ — ящэнэрэ чIыпIэхэр къыдэзыхыгъэхэр къыблэм икIэлэеджакIохэм дзюдомкIэ якIэух зэIукIэгъухэу Ермэлхьаблэ гъэтхапэм щыкIощтым хэлэжьэщтых.