Адыгэм идунай. Тыркуер
Лъэхъанэу зэпытчырэм интернетыр шIуагъэ къытфихьэу, Iэрыфэгъоу нахь зэрэдгъэфедэшъущтыр къыдгурыIуагъ. Iофыгъуабэ ащкIэ зэшIотхы хъугъэ.
[caption id="attachment_87228" align="aligncenter" width="800"] Унэрэкъо Яшар, Бирам-Кобл Алатин, Унэрэкъо Мир, Арслъан Мыхьамэд Яшар.[/caption]ЕтIани ахэр нахь псынкIэуи гъэцэкIагъэ мэхъух. ЗэIукIэ шъыпкъэхэм уахътэ хамыгъуатэу къемыкIолIэшъущтыгъэхэр джы онлайнкIэ зэрэугъоишъух, зэдэгущыIэгъухэр, десэхэр зэхащэх.
Ащ фэдэу интернетыр ашIоIэрыфэгъоу Тыркуем щыпсэурэ тилъэпкъэгъухэм адыгабзэм изэгъэшIэнкIэ лъэбэкъукIэхэр ашIых. Онлайн десэхэр зэхащагъэу ныдэлъфыбзэр къызIэкIагъахьэ.
Онлайнкlэ адыгабзэ зэрагъашlэ
Адыгабзэр зэгъэшIэгъэныр анахь мэхьэнэ ин зиIэ Iофэу тилъэпкъыкIэ щыт. Хэкурыси хэхэси къызэтенэнымкIэ ныдэлъфыбзэр бэгъон фае. Адыгабзэр ашIэным тилъэпкъэгъу хэхэсхэр сыдигъокIи пылъых. Адыгэ хасэхэр Тыркуем къызщызэIуахыгъэхэр илъэс 50 фэдиз хъугъэшъ, бзэ курсхэр ахэм ащызэхащэ зэпыт. Ау егъэжьэпIэ дэгъу зыфашIырэ егъэджэныр кIэухым намыгъэсыжьышъоу бэрэ къыхэкIы. Еджэныр зыублэрэ кIэлэеджакIохэм десэхэр ашIокъины мэхъу, уахътэ къыхагъэкIырэп ахэм къякIолIэнхэу. Аужырэ гъэм онлайн еджэкIэ-шIыкIэр къыдэкIуагъ. Пандемием илъэхъан Кавказ хасэхэм я Федерациеу КАФФЕД-р кIэщакIо фэхъугъэу интернетымкIэ адыгабзэм изэгъэшIэн зэхащагъ. Куп заулэмэ кIэлэегъаджэхэр адэлажьэх, рагъаджэхэрэр къэлэ зэфэшъхьафхэм ащэпсэух. Десэм уедэIунымкIэ ищыкIагъэр бзэр зэгъэшIэгъэн шIоигъоныгъэм нэмыкIэу интернет зэпхыныгъэр ары.
«Дунаир зэлъызыубытыгъэ коронавирусым унэмэ таришIыхьагъ, уахътэ нахь тиIэ хъугъэ ыкIи ащ къытфихьыгъэ шIуа-гъэр тэгъэфедэ, нахь цIыфыбэмэ тиныдэлъфыбзэ ашIэныр тигугъоу «зум» зыфиIорэ программэмкIэ адыгабзэр ятэгъашIэ», — къыхегъэщы кIэлэегъаджэу Арслъан Мыхьамэд Яшар. Тхьамафэм тIо, блыпэмрэ бэрэскэжъыемрэ, сыхьатитIу хъурэ егъэджэнхэр ащ зэхещэх. Ежьыр къалэу Адапазары щэпсэу, ригъаджэхэрэр къэлэ зэфэшъхьафхэм ащыщых, зэкIэмкIи нэбгырэ 40 идесэхэм къядэIух. Арслъан Мыхьамэд Яшар Дюздже университетым имагистратурэ къыухыгъ. Кавказыбзэхэм яфакультет адыгабзэмкIэ икъутамэу хэтым ишIэныгъэ къыщигъэшъыпкъэжьыгъ.
«Мыхьамэд Яшар магистрэ программэм къекIолIэгъэ кIэлэеджакIохэм ащыщ, — къеублэ Дюздже университетым Iоф щызышIэрэ кIэлэегъаджэу Шъхьэлэхъо Сусанэ. — Адыгабзэр Iулъ, гуфит-шъхьафитэу мэгущыIэ. ЦIыф гъэтIылъыгъэу, ымышIэрэм лъыхъоу, ащ къыкIэупчIэным темыукIытыхьэу щыт. Мыхьамэд имагистрэ IофшIэн зыфэгъэхьыгъэр нэмыкIыбзэ зэгъэшIэгъэнымкIэ европэ шапхъэу дунаим щаштагъэм диштэу адыгабзэм изэгъэшIэн зэрэбгъэпсыщтыр ары. ИIоф-шIэн дэгъу дэдэу ыгъэцэкIагъ, бзэм изэгъэшIэнкIэ ежьым ыушэтыгъэ программэхэр къыгъэшъыпкъэжьызэ магистрэ IофшIэныр ыухъумагъ.»
Шъхьэлэхъо Сусанэ Адыгэ къэралыгъо университетым илIыкIоу Дюздже университетым кIуагъэу илъэс пчъагъэ хъугъэу Iоф щешIэ. Арслъан Мыхьамэд Яшар имагистр IофшIэнкIэ шIэныгъэлэжь упчIэжьэгъоу Сусанэ иIагъ, джы къызнэсыгъэми зэпхыныгъэ зэдыряIэу кIэлэегъаджэхэр зэдэлажьэх.
Мыщ фэдэу рагъэджагъэхэу, университетыр къэзыухыгъэхэм Адыгэ хасэхэм джы адыгэбзэ курсхэр зэрэщызэхащэхэрэм Адыгэ хэкум икIыгъэ кIэлэегъаджэхэр щэгушIукIых, ашIырэ гъэхъагъэхэм алъэплъэх. Ежьхэм агъэцэкIэрэ Iофым ахэр ищысэх. Ныдэлъфыбзэр лъызгъэкIотэщт кIэлэегъаджэхэр агъэхьазырынхэр ары пшъэрылъ шъхьаIэу Тыркуем зыфырагъэблэгъэгъагъэхэр.
Апэ гущыIэ, нэужым тхыбзэ
Бирам-Кобл Алатин ригъаджэхэрэр купитIоу гощыгъэх. Илъэс 18 — 25-рэ зыныбжьхэр, нахь хэкIотагъэхэр шъхьаф-шъхьафых. КупитIуми бзэр апэрэу аушэты. Еджэн программэр кIэлэегъаджэм зэригъэпсыгъэмкIэ, гущыIэныр апэ регъэшъы. КъаригъэIорэ хьарыфхэр, гущыIэхэр еджакIохэм алъэгъу, зум-программэм ащ фэдэ амал хэт, нэпэеплъэу зэкIэ экраным къытыредзэ.
«Онлайн десэхэр зызэхэтэщэм, ахэм къякIолIагъэхэр апэ тыушэтыгъэх. ЖэрыIуабзэ зыIулъхэм Мыхьамэд афэдгъэзагъ, ащ еджэкIэ-тхакIэ аригъэшIэныр ипшъэрылъ. Сэ сиехэр гущыIэшъухэрэп, арышъ, сипрограммэ бзэм изэгъэшIэнкIэ пэублэ лъэбэкъу пIоми хъущт. Макъэр тэукъэбзы, бзэгур тэузэнкIы, нэужым гущыIэр къэтэIо», — къеIуатэ Бирам-Кобл Алатин. Мы кIэлэегъаджэми сэнаущыныгъэ ин хэлъ. Истамбыл, Бандырма, Самсун я Адыгэ Хасэхэм адыгэбзэ курсхэр бэрэ къащитыгъэх. КъызэриIорэмкIэ, еджэныр заублэкIэ, сыдигъокIи ашIокIэщыгъоу зэкIэ къекIуалIэх. Ау тIэкIу-тIэкIузэ пэужьых. Е бзэр ашIокъины мэхъу, е IофшIэн ужым джыри еджэным пае Хасэм къэкIонхэр къяхьылъэкIы, уахътэу тырагъэкIуадэрэр ашIохьаулые фэдэу мэхъу.
«Мы онлайн еджэныр узэрэлъэгъоу гъэсэныгъэ зэбгъэгъотыным ыпэ изгъэшъыщтэп. ЦIыфыр плъэгъузэ къэбгъэгущыIэныр, макъэр зэхебгъэхыныр нахь дэгъу. Ау зы феди хэлъ мы етхьыжьэгъэ Iофым — десэхэр ханэрэп, купыр зэбгырызырэп. Арышъ, бзэр дгъэбаинымкIэ дгъотыгъэ амалыр тэгъэфедэ», — къыхегъэщы Алатин.
Бирам-Кобл Алатин пчыхьищэ десэхэр къетых. Студент нэбгырэ 30 бэрэскэжъыем регъаджэ, нахьыжъ нэбгырэ 20-мэ гъубдж ыкIи мэфэку пчыхьэрэ десэхэр къафетых.
«Бирам-Кобл Алатини кIэлэегъадж, адыгабзэр дэгъоу зышIэу, бзэ зэхэтыкIэр зыушэтырэ цIыфэу щыт. Дюздже университетым ишIэныгъэ щыхигъэхъуагъ, магистрэ цIэр къыщигъэшъыпкъэжьыгъ. ЫгъэцэкIэгъэ IофшIэнымкIэ упчIэжьэгъоу иIагъэр Унэрэкъо Мир. Адыгэ унагъохэм псэукIэу, гъэпсыкIэу яIагъэм тегъэпсыхьагъэу иIофшIэн ыгъэхьазырыгъ. ИшIэныгъэ хигъэхъоным ар пылъ, ушэтынхэр ешIых, бзэ зэфэшъхьафхэр зэригъапшэзэ, адыгэбзэ макъэр нэмыкIыбзэм къыхигъэщыныр игугъу. Мыпшъэу еджакIохэм адэлажьэ. Джа ежьыр ригъаджэхэрэм зэращыгушIукIырэм фэдэу тэри игъэхъагъэхэм тарэгушхо», — къытфиIотагъ Шъхьэлэхъо Сусанэ.
Онлайн десэхэм еплъыкIэу афыриIэмкIи Сусанэ теупчIыгъ.
«Сыд фэдэрэ бзэ зэбгъэшIэным пае мафэм сыхьат-сыхьатитIу фыхэпхын фае. Удэмышъхьахэу уахътэр тебгъэкIуадэмэ, лъыбгъэкIотэщт. Мы онлайн десэхэр зэхэщэгъэнымкIэ унэрысыным ишIуагъэ къэкIуагъ. Ау бзэм икуупIэ зэбгъэшIэным пае интернет зэпхыныгъэ закъор макIэ, кIэлэеджакIор уапашъхьэ исэу ебгъэджэным сэ зыпари пэсшIыщтэп. Арэу щытми, адыгабзэр зэбгъэшIэнымкIэ сыд фэдэрэ амали бгъэфедэн фае. Арышъ, лъэпэ мафэкIэ ежьэнхэу ыкIи тиныдэлъфыбзэ агъэбэгъонэу сафэлъаIо», — къыхигъэщыгъ Шъхьэлэхъо Сусанэ.
Еджэным зэфигъэнэIосагъэх
Анкара. Дюздже. Измир. Истамбыл. Тыркуем икъэлэ инхэм, зэпэчыжьэхэм непэ тилъэпкъэгъухэр ащэпсэух. Ахэр нэIуасэ зэфэхъунымкIи мы егъэджэным ишIуагъэ къэкIуагъ. ЗэпэIэпчъэ лъэпкъыр зэзыпхырэ амалэу джырэ уахътэ интернетыр хъугъэ.
Мары, сэ сшъхьэкIэ мы онлайн десэхэм якъэбар сшIэнэу зэрэхъугъэр еджакIохэм ащыщ инстаграмымкIэ къызысфатхэр ары. Арслъан Мыхьамэд Яшар ригъаджэхэрэм ащыщэу Ежьэн Мурат къысфэтхагъ. ИгущыIэ къызэрэзэригъэкIугъэмкIэ илъэIу фэзгъэцэкIэным сыдэгуIагъ. Хэхэс адыгэхэм якъэбархэр къызэрэстырэр ешIэти, икIэлэегъаджэ зэрэфэразэр ащ къыриIотыкIыгъ, мэкъэгъэIу фысигъэшIынэу къыкIэлъэIугъ.
«Бэрэ адыгабзэкIэ сыкъыпфэтхэнэу, нэIуасэ сыкъыпфэхъунэу сыфэягъ. ТэкIу хэукъоныгъэ сэшIыми къысфэгъэгъу. Ау сэтхэшъу, ащ лъэшэу сыщэгушIукIы. Ащ фэдэ амал сэзгъэгъотыгъэр адыгэбзэ онлайн курсхэр тфызэхэзыщагъэхэр ары. Сэ сыгущыIэшъущтыгъэ, ау еджакIэрэ тхакIэрэ сшIэщтыгъэп. Джы мары сыкъыпфэтхэшъугъ. ТикIэлэегъаджэхэм апае къэбар бгъэхьазырыгъагъэмэ сигуапэщтыгъэ», — къыхигъэщыгъ Мурат.
Ежьыр зэрэщысэшIури къыгъэшъыпкъэжьэу, Мурат джаущтэу зэгъэкIугъэу къэтхагъ. Сыдэущтэу «хьаIу» епIощт ащ фэдэ екIолIакIэ зышIыгъэм?
Зигугъу къышIыгъэхэ кIэлэегъаджэхэу Арслъан Мыхьамэд Яшари Бирам-Кобл Алатини дэгъоу сэшIэх. Ащ ыпэкIи якъэбархэм сакъытегущыIэу хъугъэ. Аублэгъэ Iофым гъэхъагъэхэр зэрэщашIыщтым щэч хэлъэп. Мыпшъыжьэу адыгэ лъэпкъым фэлэжьэрэ цIыфых.
«СиеджакIохэм тхакIэрэ еджакIэрэ язгъэшIэщт. Ауж сикIыщтэп ясымыгъашIэу. КIэрэщэ Тембот, МэщбэшIэ Исхьакъ афэдэхэм адыгабзэкIэ ятхыгъэхэм еджэнхэу мурад яI, арышъ, ар къадэзгъэхъущт», — еIо Арслъан Мыхьамэд Яшар. Гухэлъ лъагэу зыфагъэуцугъэм яшъыпкъэу факIох. Мэзищы хъугъэу адыгэбзэ десэхэр дунэе хъытыум иамалкIэ къатых.
ТIэшъу Светлан.