«Динамо-МГТУ» Мыекъуапэ — «Тамбов» Тамбов хэку — 79:87 (21:16, 15:27, 25:24, 18:20). Мэзаем и 6-м Мыекъуапэ щызэдешIагъэх. «Динамо-МГТУ»: Чичайкин — 7, Суслов — 4, Рябов — 10, Александров — 9, Гапошин — 7, Чаленко, Милютин — 9, Еремин — 8, Князев — 11, Кочнев — 14.

Урысыем баскетболымкIэ изэнэкъокъоу суперлигэм иятIонэрэ куп щыкIорэм Мые­къопэ «Динамо-МГТУ-р» Тамбов хэкум иклубэу «Тамбовым» щыIукIагъ. ЕшIэгъур Адыгеим испортсменхэм дэгъоу рагъэжьагъ, ау ятIонэрэ едзыгъор «Тамбовым» ыхьыгъ. ТекIоныгъэм екIурэ гъогур хьакIэхэм нахь псынкIэу къагъотыгъ.

ПэшIорыгъэшъ зэнэкъокъум апэрэ чIыпIи 5-р къыщыдэзыхыщтхэм «Динамо-МГТУ-р» ахэфэщтэу тэлъытэшъ, гумэкIыгъо щыIэп. Илья Александровыр, Артем Гапошиныр, Николай Ереминыр, нэмыкIхэри финалым дэгъоу щешIэнхэ алъэкIыщт.

«Тамбовым» хэтэу Загретдиновым очко 27-рэ Мыекъуапэ къыщихьыгъ, Малейко — 15. АщкIэ къатIомэ тшIоигъор баскетбол клубыр апэрэ чIыпIэм фэбэнэным зэрэфэ­хьазырыр ары. Хъагъэм Iэгуаор бэрэ изыдзэрэ ешIакIохэр «Тамбовым» хэтых.

ЧIыпIэу зыдэщытхэр

1. «Барнаул» — 30 2. «Тамбов» — 29 3. «Металлург» — 28 4. «Чебоксарсие Ястребы» — 27 5. «Динамо-МГТУ» — 26 6. «Динамо» Ст – 24 7. «ЧелБаскет» — 24 8. «Русичи» — 22 9. «Нефтехимик» — 20 10. «Барс-РГЭУ» — 20 11. «МицуБаскет» — 20.

«Динамо-МГТУ-м» ешIэгъуи 10 къыхьыгъ, 6-р шIуахьыгъ. Мэзаем и 9-м «Динамо-МГТУ-р» «МицуБаскет», Липецкэ хэку, Мыекъуапэ щыIукIэщт.