НэпцIыкIэ зызэгуатхэ

АР-м хэгъэгу кIоцI IофхэмкIэ и Ми­­нистерствэ 2019-рэ илъэсым IофшIэкIо куп зэхищагъ, ащ хэ­хьа­­гъэх кощын IофхэмкIэ гъэIоры­шIапIэм ыкIи экстремизмэм пэуцу­жьы­гъэнымкIэ гупчэм икъулыкъу­шIэхэр.

АщкIэ зэхэщакIохэм пшъэрылъэу яIагъэр IэкIыб къэралхэм къарыкIыгъэхэр учетым хэмыуцохэу охътэ гъэнэфагъэкIэ тикъэралыгъо исынхэм ыкIи гражданствэр къыдахыным афэшI нэпцIыкIэ Урысыем ицIыфхэм зызэрагуатхэхэрэр къычIэгъэщыгъэнхэр ары.

2020-рэ илъэсым подразделением икъулыкъушIэхэм ащ фэдэ хъугъэ-шIагъэхэр къыхагъэщыгъэх. 2017-рэ илъэсым IэкIыб къэралым къикIыгъэр охътэ гъэнэфагъэкIэ Урысыем щыпсэунымкIэ кощын IофхэмкIэ гъэIорышIапIэм лъэIу тхылъкIэ зыкъыфигъэзагъ. Ащ лъапсэ фэхъугъэр Урысыем щыпсэурэ бзылъфыгъэм зэрэготхагъэр къэзыушыхьатырэ тхьапэр ары.

Полицием икъулыкъушIэхэм уплъэкIун Iофтхьабзэхэр зэхащагъэх. КъызэрэчIагъэщыгъэмкIэ, зэшъхьэгъусэхэм нэпцIыкIэ зызэгуатхагъэу ары. ЗэкIэ ищыкIэгъэ тхьапэхэр къулыкъушIэхэм къаугъои прокуратурэм IэкIагъэхьагъ.

БлэкIыгъэ илъэсым тыгъэгъазэм ыкIэхэм проку­ратурэм идао хьыкумым дыригъэштагъ, зэшъхьэгъу­сэхэр нэпцIыкIэ зэрэзэготхагъэхэр къыгъэшъыпкъэ­жьыгъ ыкIи ахэр зэгуатхыкIыжьыгъ.

Маркэ зытемыт тутынхэркъаIахыгъэх

АР-м хэгъэгу кIоцI IофхэмкIэ и Ми­нистерствэ экономикэ щынэ­гъон­чъэ­нымкIэ ыкIи къолъхьэ тын-Iыхыным пэ­шIуекIогъэнымкIэ игъэIорышIапIэ икъулыкъушIэхэм илъэс 39-рэ зы­ныбжь унэе предпринимателым хэ­­бзэукъоныгъэ зэрихьагъэу къыха­гъэщыгъ.

Къэбарэу къаIэкIэхьагъэм къыпкъырыкIыхэзэ полицием иIофышIэхэм зэгуцафэхэрэм итучан ауплъэ­кIугъ. КъулыкъушIэхэм къызэрэчIагъэщыгъэмкIэ, мы тучаным тутынэу щащэхэрэм акциз маркэр атеты-гъэп.

ЗэкIэмкIи ащ фэдэ тутын къэмлэнэ мини 3,5-м ехъу къычIагъотагъ. Экспертизэм зэригъэунэфыгъэмкIэ, маркэ зытемыт продукциеу къаIахыгъэм зэкIэмкIи сомэ мин 450-рэ тефэу къалъытагъ.

МыщкIэ уголовнэ Iоф къызэIуахыгъ. Зэхэфынхэр джыри макIох.

Полициер лъэхъу

Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэр 1988-рэ илъэсым Армением къыщыхъугъэ Асатрян Каро Ашот ыкъом лъэхъу.

БзэджэшIэ купым хэ­тэу гъэпцIагъэ зы­хэлъ зэ­къодзэн бзэ­джэ­шIагъэ зэрэзэри­хьа­гъэм фэшI хъулъфыгъэм лъэхъух.

ТышъолъэIу, Асат­рян Каро зыдэщыIэм шъу­щыгъуа­зэмэ Мые­къуапэ щыIэ телефон номерэу (8772) 52-26-32 е мобильнэ телефо­нымкIэ (102-м) шъуа­къытеонэу.

ГъэпцIакIохэм шъуафэсакъ

Мы аужырэ уахътэм Интернет зэ­пхыныгъэм иамалкIэ цIыфэу агъап­цIэхэрэм япчъагъэ хэпшIыкIэу хэ­хъуагъ.

ГущыIэм пае, товархэр ащэхэу ыкIи ащэфхэу сайт­хэм мэкъэгъэIухэр къарагъахьэх. Товарыр зыщэфы зышIоигъохэм якартэ номерхэр гъэпцIагъэкIэ бзэ­джашIэхэм къызIэкIагъахьэх, нэужым цIыфхэм якартэ илъ ахъщэр рахы.

Банкым къышъуитыгъэ картэм иномер яшъуIон фаеу зыгорэкIэ СМС-мэкъэгъэIу къышъуIукIэмэ е телефонымкIэ къышъуфытеохэмэ шъушIошъ шъумыгъэхъу, гъэпцIакIохэм зяшъумыгъэгъэдел, цыхьэ афэ­шъумышI. КартэмкIэ ыкIи терминалымкIэ шъуифэIо-фашIэхэр жъугъэцакIэхэ хъумэ, сакъыныгъэ къызхэжъугъаф.

Шъуикартэ и ПИН-код ыкIи цифрэ 16 хъурэ но­мерыр яшъуIон фаеу СМС къышъуIукIэмэ е телефо­нымкIэ къышъуфытеохэмэ яшъумыIу, бзэджашIэхэм зяшъумыгъэгъапцI.

Зызэрафэжъугъэзэн шъулъэкIыщтыр

ЦIыфым хэбзэнчъэу къыдызекIуа­гъэ­хэмэ хэгъэгу кIоцI къулыкъум зы­фигъэзэн зэрилъэкIыщтыр АР-м и МВД шъугу къегъэкIыжьы.

Ахэм зэу ащыщ письмэ шIыкIэм тетыр. Мыщ фэдэу ар тхыгъэн фае:

1. Письмэр зыфэптхырэ хэгъэгу кIоцI къулыкъум ыцIэ е зызфэбгъазэ пшIоигъо къылыкъушIэм ылъэ­къуацIэ, ыцIэ, ятэ ыцIэ е иIэнатIэ.

2. Ежь цIыфым ылъэкъуацIэ, ыцIэ, ятэ ыцIэ.

2. Джэуапыр къыздагъэхьыжьыщт почтовэ адресыр.

3. УиIапэкIадзэ ыкIи зыщыптхыгъэ мафэр.

4. ИщыкIагъэ хъумэ, письмэм техыгъэр ибгъэгъусэн плъэкIыщт.

Даоу къаIэкIахьэхэрэр зэкIэ атхых. Нэужым ахэм захаплъэхэкIэ, уахътэу къафагъэуцугъэм къыриубытэу ар къэзытхыгъэм джэуапыр фагъэхьыжьы.

АР-м и МВД джыри зэ цIыфхэм закъыфегъазэ, бзэджэшIагъэ зэрахьагъэу е хабзэр аукъуагъэу щыгъуазэхэмэ полицием икъулыкъушIэхэм макъэ арагъэIунэу. Шъугу къэтэгъэкIыжьы, телефон номерымкIэ ыкIи Интернетым исайтымкIэ ОВД-м зыфэжъу­гъэзэн шъулъэкIыщт. Джащ фэдэу Министерствэм иофициальнэ сайтэу «Для граждан» зыфиIорэм игъэкIотыгъэ къэбарыр ижъугъотэн шъулъэкIыщт.

Сакъыныгъэ къызхэжъугъаф

Общественнэ чIыпIэхэм хъункIэн бзэджэшIа­гъэхэу ащызэрахьэхэрэм ащыухъумэгъэнхэм фэшI шIэгъэн фаехэм полицием иIофышIэхэм цIыфхэр ащагъэгъуазэх.

Мыщ фэдэ шапхъэхэр зыщышъумыгъэгъупшэх:

— ахъщэу шъуIыгъыр зыфэдизыр общественнэ чIыпIэхэм къащышъумыгъэлъагъу;

— пчыхьэр хэкIотагъэу унэм шъукIожьы хъумэ, цIыфхэр макIэу зыщызекIохэрэ урамым шъурымыкIомэ нахьышIу;

— унэм шъукъэсыжьы хъумэ (анахьэу шIункIым) зышъуплъыхь, зыгорэ шъуауж итэу, къышъулъыплъэу гуцафэ шъушIымэ шъусакъ;

— подъезд чIэхьагъум дэжь шъумышIэрэ цIыфхэм шъуащыIукIэмэ шъуадэмыгущыIэу шъуаблэкI, шъуизакъо подъездым шъучIэмыхьажьэу шъуиунэ чIэсхэм шъуяжи, ахэм шъуаригъусэу шъучIэхьажь;

— шъумышIэрэ цIыфым лифтым шъудимытIысхь;

— зыгорэ шъуауж къихьагъэу шъуегуцафэмэ, цIыфхэр нахьыбэу зыдэщыIэхэ чIыпIэм (тучанхэм, щэпIэ гупчэхэм) шъуачIахь, псынкIэу полицием иIофышIэхэм макъэ яжъугъэIу;

— лифтым къыщышъутебэнагъэхэмэ, диспетчерым укъызэреджэщт кнопкэм псынкIэу шъутеIункI.

ШЪУШIЭН ФАЕ:

— уIэшыгъэу бзэджашIэр къышъутебанэмэ шъу­пэ­мыуцужь (шъузыпэуцужьыкIэ бзэджашIэр нахьри къэ­губжын ыкIи изекIуакIэхэр ыгъэлъэшын ылъэ­кIыщт);

— бзэджашIэм итеплъэ дэгъоу зэжъугъашIэ;

— бзэджашIэр къызэрэшъутебэнагъэм епхыгъэ къэбарыр псынкIэу полицием IэкIэжъугъэхьаным фэшI номерэу 02-м шъутеу.

ЦыхьэшIэгъунчъэу щыт пкъыгъохэр къэжъугъо­тыгъэмэ, шъузэрэзекIон фаем полицием иIофы­шIэхэм шъущагъэгъуазэ.

Пкъыгъом итеплъэкIэ зыфэдэр къэшIэгъуае. Камуфляжым фэдэу Iэлъмэкъыр, къэмланэр, джэгуа­лъэр агъэфедэх. ЦIыфхэр бэу зыщызэхахьэрэ чIыпIэм цыхьэшIэгъунчъэу щыт пкъыгъор къыщыжъугъотыгъэмэ, шъуфэсакъ, шъунэмыс, псынкIэу полицием икъулыкъушIэхэм макъэ яжъугъэIу.

Общественнэ транспортым хьап-щып горэ къыранагъэу гу лъышъутагъэмэ, цIыфэу исхэм шъуяупчI. Ар къычIэзынагъэр ыкIи къычIэзынэн зылъэкIыщтыр зэжъугъашI. Ар зыер жъугъэунэфын шъумылъэкIы­гъэмэ, водителым ешъуIу.

Подъездым ичIэхьэгъу дэжь шъузэгуцафэрэ пкъыгъор къыщыжъугъотыгъэмэ, мыщ щыпсэухэрэм шъуяупчI, бысым горэм къычIинагъэмэ зэжъугъашI. Ар зыер къычIэшъумыгъэщыгъэмэ полицием макъэ ежъугъэIу.

Джащ фэдэу IофшIапIэм цыхьэшIэгъунчъэу щыт пкъыгъор къыщыжъугъотыгъэмэ, псынкIэу админист­рацием е учреждением идежурнэ макъэ яжъугъэIу.

Джыри зэ шъугу къэтэгъэкIыжьы!!!

Ны-тыхэр! Шъуисабыйхэм ящыIэныгъэрэ япсауныгъэрэ шъоры зыIэ илъыр. Урамым къыщагъотыгъэ пкъыгъом щынагъо къыздихьын зэрилъэкIыщтыр агурыжъугъаIу. Сакъыныгъэ къызхагъэфэнэу, ащ фэдэ пкъыгъохэм защадзыенхэу яшъуIу.

НэкIубгъор зыгъэхьазырыгъэр КIарэ Фатим.