Адыгеим и ЛIышъхьэу КъумпIыл Мурат Адыгэ Республикэм ипроку­ратурэ иколлегие изэ­хэсыгъоу тыгъуасэ щыIагъэм хэлэжьагъ. Ады­ге­им ипрокурорэу Игорь Шевченкэм ар зэрищагъ.

Джащ фэдэу Iофтхьабзэм хэлэжьагъэх Урысые Феде­рацием и Генеральнэ прокуратурэ игъэIорышIапIэу ЮФО-м щыIэм ипащэу Константин Со­мовыр, республикэм ипроку­ратурэ иаппарат иIофышIэхэр, видеоселектор шIыкIэм тетэу чIыпIэхэм ащыIэ прокурорхэр.

Зэхэсыгъом хэлажьэхэрэм зафигъазэзэ, Адыгеим и ЛIы­шъхьэу КъумпIыл Мурат зэрэхигъэунэфыкIыгъэмкIэ, икIыгъэ илъэсыр къызэрыкIуагъэп, пан­демиер щыIэныгъэм илъэныкъо пстэуми алъыIэсыгъ.

«ГъэрекIо цIыфхэм къины­гъуабэ къафыкъокIыгъ. Ащ епхыгъэу ахэм яфитыныгъэ­хэмрэ яфедэхэмрэ якъэухъумэн мэхьанэшхо иIэу щытыгъ. Дэгъоу къызэрэддэлэжьагъэхэм, вирусым зимыушъомбгъуным епхыгъэ унашъохэм якъыхэ­хынкIэ IэпыIэгъу къызэрэтфэ­хъугъэхэм афэшI прокуратурэм иIофышIэхэм «тхьашъуегъэпсэу» ясэIо», — къыIуагъ КъумпIыл Мурат.

Республикэм ипащэ зэхэ­сыгъом зэрэщыхигъэунэфы­кIыгъэмкIэ, IофшIэнымкIэ фитыныгъэу яIэхэм якъэухъумэн­кIэ, медицинэ IэпыIэгъу дэгъу цIыфхэм ягъэгъотыгъэнымкIэ, социальнэ ахъщэ IэпыIэгъухэр аIэкIэгъэхьэгъэнхэмкIэ респуб­ликэм ихэбзэ къулыкъухэмрэ прокуратурэм икъулыкъухэмрэ азыфагу зэдэлэжьэныгъэ дэгъу илъыгъ.

Медицинэ фэIо-фашIэхэр дэеу зыгъэцакIэхэрэр, Iэзэгъу уцхэр аIэкIэгъэхьэгъэнхэмкIэ хэукъоныгъэ зышIыхэрэр къыхэгъэщыгъэнхэ зэрэфаер Адыгеим и ЛIышъхьэ хигъэунэфыкIыгъ.

«Социальнэу дэеу ухъума­гъэхэм япсауныгъэрэ яфиты­ныгъэрэ къызэраухъумэрэм шъхьафэу гъунэ лъафын фае. ЦIыфхэм нахьыбэу къагъэшIэным, демографиемкIэ Iофхэр нахьышIу шIыгъэнхэм атегъэ­псыхьэгъэ пшъэрылъэу тиIэхэм язэшIохынкIэ ащ ишIуагъэ къэ­кIощт», — къыIуагъ КъумпIыл Мурат.

Республикэм и ЛIышъхьэ зэхэсыгъом къызэрэщыхигъэщыгъэмкIэ, илъэсыр къызыщихьащтым ехъулIэу лэжьапкIэмкIэ Адыгеим чIыфэ те­лъыгъэп. Адыгэ Республикэм ипрокуратури ащкIэ ишIуагъэ къэкIуагъ.

Республикэм ипащэ анахьэу анаIэ зытыраригъэдзэгъэ Iо­фы­гъохэм ащыщ лъэпкъ про­ект­хэмрэ къэралыгъо программэхэмрэ къащыдэлъытэгъэ бюд­жет мылъкур зэрагъэфедэрэм, сабый ибэхэм псэупIэхэр, сабыибэ зэрыс унагъохэм чIыгу Iахьхэр къазэраратырэм, ЖКХ-м ылъэныкъокIэ хабзэхэр къызэ­рэ­далъытэрэм, предприниматель­хэм яфитыныгъэхэр къы­зэрау­хъумэрэм гъунэ алъыфыгъэныр.

Зыныбжь имыкъугъэхэм яфитыныгъэхэм якъэухъумэнкIэ про­­куратурэмрэ хэбзэ къулыкъу­хэмрэ зэпхыныгъэ пытэ зэ­ды­ряIэным мэхьанэшхо зэриIэр Адыгеим и ЛIышъхьэ къыхи­гъэщыгъ.

«Хабзэм димыштэрэ Iофтхьабзэхэм ахагъэлэжьэнхэу, агъэплъэхъунхэу зэрэпыхьэхэрэм тиныбжьыкIэхэр ащытыухъу­мэнхэ фае. МыщкIэ хэбзэ, хэ­бзэухъумэкIо, социальнэ къулыкъухэм, общественнэ организациехэм язэдэлэжьэныгъэ агъэлъэшын фае», — хигъэунэфыкIыгъ КъумпIыл Мурат.

Адыгэ Республикэм ипрокурорэу Игорь Шевченкэм 2020-рэ илъэсым ведомствэм Iофэу ышIагъэхэр зэфихьысыжьыгъэх. IофышIэхэм анахьэу анаIэ зыты­рагъэтыгъэр Урысыем и Прези­дентрэ Урысые Федерацием и Генеральнэ прокуроррэ къагъэ­нэфэгъэ лъэныкъохэр ары.

Зэхэсыгъом икIэух Адыгеим и ЛIышъхьэ Iофтхьабзэм хэла­жьэхэрэм анаIэ тыраригъэдзагъ экстремизмэмрэ терро­риз­мэмрэ апэуцужьыгъэнымкIэ зэ­дырагъэштэн, республикэм ибюджет, ихьакъулахь хэбзэ­гъэуцугъэ нахьышIу шIыгъэнымкIэ прокуратурэм нахь зигъэчанын зэрэфаем.

Адыгэ Республикэм и ЛIышъхьэ ипресс-къулыкъу