Адыгэ литературэм чIыпIэшхо щиубытыгъ
Урысые Федерацием культурэмкIэ изаслуженнэ IофышIэу, Адыгэ Республикэм инароднэ тхакIоу, къуаджэу Адэмыерэ Красногвардейскэ районымрэ яцIыф гъэшIуагъэу Кощбэе Пщымафэ псаугъэмэ, ыныбжь 85-рэ зэрэхъущтыгъэм фэгъэхьыгъэ шIэжь зэхахьэ Адыгеим и Лъэпкъ тхылъеджапIэ щыкIуагъ.
Iофтхьабзэм хэлэжьагъэх тхакIохэм я Союз хэтхэр, творческэ интеллигенциер, гуманитар ушэтынхэм апылъ Адыгэ республикэ институтым, Адыгэ къэралыгъо университетым ыкIи кIэлэегъэджэ колледжым яIофышIэхэр, яеджакIохэр, тхакIом иIахьыл гупсэхэр, иныбджэгъухэр, тхылъеджапIэм иIофышIэхэр ыкIи къэбар жъугъэм иамалхэр.
БэмышIэу Ютуб каналым къихьэгъэ орэд дахэу ЖэнэлI Светланэ къыIуагъэмкIэ зэхахьэр къызэIуахыгъ. Ащ игущыIэхэр Кощбэе Пщымафэ иех, орэдышъом изылъхьагъэри, къэзыIорэри ежь Светлан.
Iофтхьабзэр зэрищагъ филологие шIэныгъэхэмкIэ кандидатэу, Адыгэ къэралыгъо университетым икIэлэегъаджэу Хъуажъ Нуриет. ЗэлъашIэрэ тхакIоу зишIэжь агъэлъэпIагъэм итворческэ ыкIи ищыIэныгъэ гъогу къыхэхыгъэ хъугъэ-шIагъэхэу мэхьанэ зиIэхэр зэгъэкIугъэу къэзэрэугъоигъэхэм анэгу къыкIигъэуцуагъ. Хъуажъ Нуриет къызэриIуагъэмкIэ, Пщымафэ публицистыгъ, драматургыгъ, общественнэ IофышIагъ ыкIи народнэ тхакIор опсауфэ лъэпкъ Iофхэм ишъыпкъэу афэлэжьагъ. Кощбаим шIэныгъэ куу зэрэIэкIэлъыгъэм ишыхьат илъэс 57-м къыкIоцI адыгэ литературэм Iоф зыщешIэм тхылъ зэфэшъхьафыбэ зэритхыгъэр.
Урысыем IофшIэным и ЛIыхъужъэу, УФ-м и Общественнэ палатэ хэтэу, Адыгеим, Къэбэртэе-Бэлъкъарым, Къэрэщэе-Щэрджэсым янароднэ тхакIоу МэщбэшIэ Исхьакъ гущыIэ дахэхэр Кощбэе Пщымафэ къыфиIуагъэх.
— Илъэс 50 фэдизрэ ныбджэгъуныгъэ тазыфагу илъэу къэтхьыгъ, — къыIуагъ МэщбэшIэ Исхьакъ. — Пщымафэ сшIэнэу зэрэхъугъагъэр иапэрэ рассказхэр зыдэт тхылъэу «Сэтэнай» зыфиIорэм рецензие фэстхынэу къызысахьылIэр ары. Мыщ сызеджэм сызIэпызыщагъэр иадыгабз, ижабз. Ар IупкIэу, дахэу зэгъэкIугъэу, гъэшIэгъонэу къысшIошIыгъ. Мыщ дэжьым къыщылъэгъуагъ мэкъэ шъхьафкIэ литературэм къызэрэхэхьан ылъэкIыщтыр. Ары зэрэхъугъэри. Пщымафэ адыгэ литературэм чIыпIэшхо щиубытыгъ, лъэужышхо къыхинагъ. ИцIыфыгъэ игугъу къэтшIымэ, цIыф шъабэу, епIорэр ыгъэцакIэу, шъыпкъэныгъэ хэлъэу, ныбджэгъуныгъэр ыгъэлъапIэу, «интеллигент» зыфаIорэм фэдэу щытыгъ.
ШIэжь зэхахьэр къыгъэбаигъ тхакIом итворчествэ фэгъэхьыгъэ тхылъ къэгъэлъэгъонэу къагъэхьазырыгъэм. Ащ къытегущыIагъ Лъэпкъ тхылъеджапIэм краеведениемрэ лъэпкъ литературэмрэ яотдел иIофышIэу Айтекэ Рузанэ. Джащ фэдэу, Адыгэ кIэлэегъэджэ колледжэу Андырхъое Хъусен ыцIэ зыхьырэм истудентхэу Бэрзэдж Анжелэрэ Джамырзэ Бэллэрэ Кощбэе Пщымафэ итхылъмэ къахэхыгъэ пычыгъохэм къяджагъэх.
Творческэ интеллигенцием илIыкIохэу къекIолIагъэхэми зишIэжь агъэлъэпIэрэ тхакIом гущыIэ дэхабэ къыфаIуагъ.
Iэшъынэ Сусан. Сурэтхэр Iэшъынэ Аслъан тырихыгъэх.