ПшIуахьызэ зыбгъэсэн плъэкIыщт
«АГУ-Адыиф» Мыекъуапэ — «Звезда» Звенигород — 23:30 (12:15). Щылэ мазэм и 31-м республикэ спорт Унэшхоу Кобл Якъубэ ыцIэ зыхьырэм щызэдешIагъэх.
«АГУ-Адыиф»: къэлэпчъэIутхэр: С. Кожубекова, Баскакова; ешIакIохэр: Клименко, Краснокутская, Кириллова — 5, Серадская, Богданова — 1, Измайлова — 5, Куцевалова — 3, Казиханова, Дмитриева, Кобл — 6, Ю. Кожубекова — 1, Стрельцова — 1.
«Звездар» Краснодар зыщешIэм, текIоныгъэр «Кубань» ыхьыгъ. ЗэкIэлъыкIоу зэIукIэгъуитIу «Звездам» шIуамыхьыным фэшI зэнэкъокъум зыфигъэхьазырыгъ. Мариана Егоровам клубэу «Адыифым» икэлапчъэ гъогогъуи 6 Iэгуаор дидзагъ. Анна Николаевамрэ Станислава Серафимовамрэ тфырытфэ тикомандэ икъэлапчъэ Iэгуаор къыдадзагъ.
Европэм и Кубок икъыдэхын хэлэжьэщтхэм ахэфэным «Звездар» фэбанэ. «Адыифыр» ащ темыкIуагъэми, дэеу ешIагъэу тлъытэрэп. Ухъумэн Iофыгъохэр нахьышIоу ыгъэцакIэхэ зыхъукIэ, «Адыифыр» зэнэкъокъум щылъыкIотэн ылъэкIыщт.
Кобл Зурет гъогогъуи 6 «Звездам» икъэлапчъэ Iэгуаор дидзагъ. ТапэкIи ащ иIэпэIэсэныгъэ хигъэхъощтэу тэгугъэ.
Нахь ныбжьыкIаIохэм Ангелина Куцеваловар къахэщы, къэлапчъэм Iэгуаор дидзэнымкIэ шIыкIэшIухэр къегъотых. Кобл Зуретрэ Ангелина Куцеваловамрэ спорт унагъохэм ащапIугъэх. Юлия Кожубековари спортыр зыщагъэлъэпIэрэ унагъом щыщ. Галина Измайловам зэIукIэгъу пэпчъ хъагъэм Iэгуаор бэрэ щыредзэ, ащ щысэ тырахы тшIоигъу.
ЕшIэгъухэр
«Динамо» — «Ростов-Дон» — 28:44, «Ставрополье» — «Лада» — 30:36, «Университет» — «Кубань» — 22:31, «Астраханочка» — «Ростов-Дон» — 18:28.
ЧIыпIэхэр
1. «Ростов-Дон» — 30 2. ЦСКА — 26 3. «Лада» — 26 4. «Астраханочка» — 24 5. «Звезда» — 24 6. «Кубань» — 18 7. «Ставрополье» — 12 8. «Университет» — 10 9. «АГУ-Адыиф» — 6 10. «Динамо» — 4 11. «Уфа» — 4 12. «Луч» — 4.
Мэзаем и 10-м «Адыифыр» Астрахань, и 12-м Волгоград ащешIэщт.