Инурэ джыри къытшъхьащыт
Урысые Федерацием культурэмкIэ изаслуженнэ IофышIэу, Адыгэ Республикэм инароднэ тхакIоу, къуаджэу Адэмыерэ Красногвардейскэ районымрэ яцIыф гъэшIуагъэу Кощбэе Пщымафэ псаугъэмэ, ыныбжь 85-рэ хъущтыгъэ. Сшы къызытхэмытыжьыр илъэси 8 хъугъэми, тыкъыгъэгъунэу ар джыри къыддекIокIы.
Пщымафэ 1936-рэ илъэсым мэзаем и 1-м къуаджэу Адэмые къыщыхъугъ. Къоджэ гурыт еджапIэр 1955-рэ илъэсым къыухыгъ. А илъэсым къыщегъэжьагъэу 1960-рэ илъэсым нэс Адыгэ къэралыгъо кIэлэегъэджэ институтым щеджагъ. Тхэныр пасэу, я 6-рэ классым исэу ригъэжьагъ. Остыгъэ пэнэшъум пэсэу художественнэ тхылъхэм чэщыр хэкIотэфэ яджэныр икIэсагъ.
Институтыр къызеухым гъэзетэу «Социалистическэ Адыгеим» иредакцие лэжьэныр щыригъэжьагъ. 1960-рэ илъэсым къыщегъэжьагъэу 1968-рэ илъэсым нэс ащ Iоф щишIагъ, иапэрэ очеркхэмрэ рассказхэмрэ щитхыгъэх. СССР-м ижурналистхэм я Союз кIалэр 1965-рэ илъэсым аштагъ. Рассказ 11 къызыдэхьэгъэ иапэрэ тхылъэу «Сэтэнай» зыфиIорэр 1966-рэ илъэсым къыдигъэкIыгъ.
1968-рэ илъэсым къыщегъэжьагъэу 1970-рэ илъэсым нэс Кощбэе Пщымафэ журналэу «Зэкъошныгъэм» иредактор шъхьаIэу Iоф ышIагъ. ТхэкIо ныбжьыкIэхэм яя 5-рэ Всесоюзнэ зэIукIэрэ тхылъыр зикIасэхэм я Урысые зэфэсрэ 1969-рэ илъэсым ахэлэжьагъ. А илъэс дэдэм повестэу «Гум пае гу аты» зыфиIорэр къыдигъэкIыгъ, 1970-рэ илъэсым СССР-м итхакIохэм я Союз аштагъ.
1970-рэ илъэсым къыщегъэжьагъэу 1987-рэ илъэсым нэс П. Кощбаем тхылъ тедзапIэм иредактор шъхьаIэу, 1996-рэ илъэсым нэс идиректорэу Iоф ышIагъ. А уахътэм къыкIоцI тхылъ 11-м ехъу къыдигъэкIыгъ, ащ щыщэу 4-р — урысыбзэкIэ.
Кощбэе Пщымафэ Адыгэ драматическэ театрэми ишъыпкъэу дэлэжьагъ. Ащ иповестэу «Мэфибл уай» зыфиIорэм техыгъэ пьесэр, идрамэу «ШъхьакIо» зыфиIорэр, КIэрэщэ Тембот иповестэу «Шахъомрэ пшъэшъэ пагэмрэ» зыфиIорэм техыгъэу ытхыгъэ музыкальнэ-лирическэ драмэр агъэуцугъэх. ПстэумкIи народнэ тхакIом ипьеси 5 титеатрэ щагъэуцугъ. УрысыбзэкIэ ытхыгъэ драмитIур — «День икс», «Заноза в сердце» зыфиIохэрэр джыри къыхаутыгъэхэп.
Тхьабысымэ Умарэ иоперэу «Лэукъан» илибретто Бэрэтэрэ Хьамидэ игъусэу ытхыгъ. Кощбэе Пщымафэ В. Лихоносовым, И. Зубенкэм ятхыгъэхэм ащыщхэр, А. Цагарели икомедиеу «Ханума», Шэуджэн Аюбэ иповестэу «Зыщымыгъэгъупш!» зыфиIохэрэр адыгабзэкIэ зэридзэкIыгъэх.
Адыгеим имызакъоу, нэмыкI чIыпIэхэми ар ащашIэщтыгъ, лъытэныгъэшхо къыфашIыщтыгъ. Урысые, адыгэ литературэм зиIахь хэзышIыхьэгъэ народнэ тхакIом цIыфыгъэшхо хэлъыгъ. ЩыIакIэм бэрэ узыщырихьылIэрэ, цIыф жъугъэхэр зыгъэгумэкIырэ Iофыгъохэр ары ащ итхыгъэхэм къащиIэтыщтыгъэр.
Литературэм иIахьышIу зэрэхишIыхьагъэм, творческэ IофшIэгъэшхо зэриIэм япэгъокIэу Кощбэе Пщымафэ щытхъуцIэу «Урысыем культурэмкIэ изаслуженнэ IофышI» зыфиIорэр, Адыгэ Республикэм и Къэралыгъо Совет – Хасэм и Щытхъу тхылъ къыфагъэшъошагъэх, Урысыем итхакIохэм я Союзрэ Урысые Федерацием ижурналистхэм я Союзрэ ахэтыгъ, Теуцожь Цыгъо ыцIэкIэ щыт литературнэ шIухьафтынымрэ Андырхъое Хъусенэ ыцIэкIэ щыт журналист шIухьафтынымрэ ялауреатэу, Адыгэ Республикэм инароднэ тхакIоу, Адэмыерэ Красногвардейскэ районымрэ яцIыф гъэшIуагъэу щытыгъ.
Сшы ытхыгъэ рассказхэмрэ повестьхэмрэ украинабзэкIэ, тыркубзэкIэ, арабыбзэкIэ, болгарыбзэкIэ, абхъазыбзэкIэ, бэлъкъарыбзэкIэ ыкIи нэмыкIыбзэхэмкIэ къызэрэдэкIыгъэхэри, арырэ Адыгеим инароднэ тхакIоу МэщбэшIэ Исхьакърэ 1991-рэ илъэсым КъурIаныр адыгабзэкIэ зэрэзэрадзэкIыгъэри къасIо сшIоигъуагъ.
Сшы зэхахьэхэмрэ зэIукIэхэмрэ чанэу ахэлажьэщтыгъ. Ар бэрэ Адыгеим икомпозитор цIэрыIохэу Тхьабысымэ Умарэ, Анзорыкъо Вячеслав, Бысыдж Мурат, Натхъо Джанхъот, Сихъу Рэмэзан, орэдыIоу Шъэожъ Розэ аIукIэщтыгъ, адэлажьэщтыгъ.
Пщымафэ иусэхэр лъапсэ зыфэхъугъэ орэдыбэ радиокомитетым ифонотекэ хэлъ. Орэди 100-м ехъу ягуапэу джыри цIыфхэм къаIо. Ащ ытхыгъэхэу «Гъэбэжъу орэд», «Адэмые иорэд», орэдхэу «Оррэ сэррэ», «Бибэ цIыкIур», «Сихэку — сиорэд», «Джэуап къысэт», «ШIулъэгъу», «Сыгу о уилъ», «Адыгэ къашъохэр», «Къашъо, симазэ» зыфиIохэрэм ыкIи нэмыкIхэм тамэ агъотыгъ.
Кощбэе Пщымафэ къоджэдэсхэм, къалэм, районхэм адэт предприятиехэм яIофышIэ къызэрыкIохэм адызэхащэрэ зэIукIэхэм чанэу ахэлажьэщтыгъ. Ар Налщык рагъэблагъи, тхылъ тедзапIэу «Эльбрусыр» къызызэIуахыгъэр илъэс 50 зэрэхъугъэм фэгъэхьыгъэ мэфэкI Iофтхьабзэм хэлэжьэгъагъ.
Ыныбжь илъэс 70-рэ зыщыхъурэм ехъулIэу къыдагъэкIыгъэ тхылъым зы роман, зы повесть, сатыритIу хъурэ усэхэр къыдэхьагъэх. Пщымафэ зэрэтхэщтыгъэр, итхылъхэр къызэрэдигъэкIыщтыгъэр иIофшIэн шъхьаIэкIэ — редактор IофшIэнымкIэ пэрыохъу хъущтыгъэхэп. IофитIури дэгъоу зэдигъэцакIэщтыгъ. 1996-рэ илъэсым къыщегъэжьагъэу 2013-рэ илъэсым нэс журналэу «Зэкъошныгъэм» иредактор шъхьаIэу ар щытыгъ.
ЩэIэфэ Пщымафэ тхэныр езыгъэжьэгъакIэхэм IэпыIэгъушIоу яIагъ, яусэхэм, яповестьхэм, ярассказхэм, яроманхэм яджэщтыгъ, ахэр афигъэтэрэзыжьыщтыгъ. Хэукъоныгъэу хашIыхьагъэхэр ариIожьыщтыгъ, анахьэу анаIэ зытырагъэтын фаехэр къафигъэнафэщтыгъ. Народнэ тхакIор общественнэ Iофхэми чанэу апылъыгъ, республикэм щыкIорэ Iофтхьабзэхэм загъорэ дэд ахэмылажьэу къызэрэхэкIыщтыгъэр. ЦIыф къызэрыкIохэм ар агъэлъапIэщтыгъ, лъытэныгъэшхо къыфашIыщтыгъ.
Кощбэе Пщымафэ Адыгэ Республикэм ипублицист анахь IэпэIасэхэм ащыщыгъ. Ежь тхакIохэми джа дэдэр къаIоу зэхэтхыщтыгъэ. Къуаджэм щылажьэхэрэм, театрэм, наукэм, литературэм яIофышIэхэм афэгъэхьыгъэ очерк гъэшIэгъонэу ытхыгъэхэм гущыIэм псэ къыпызыгъэкIэрэ журналист IэпэIасэ ар зэрэхъугъэр, итворчествэкIэ лъэгэпIэшхом зэрэнэсыгъэр къагъэлъэгъуагъ. Народнэ тхакIор ренэу ныдэлъфыбзэм дэлэжьагъ ыкIи рылэжьагъ, ащ иIэшIугъэ икъукIэ зэхишIагъэу щытыгъ, ищыIэныгъэ зэрэщытэу адыгабзэм изегъэужьын фигъэIорышIагъ. Адыгэ гъэзетхэм, журналхэм, тхылъхэм якъыдэгъэкIынкIэ, гущыIэ щэрыохэм якъэгъотынкIэ шъхьах иIагъэп. Адыгэ гъэзетымрэ журналымрэ яредакциехэм, тхылъ тедзапIэм зэращылэжьагъэм епхыгъэу ащ сыдигъуи цIыфыбэ къеуалIэщтыгъ, ятворческэ амалхэм зыкъызэIуягъэхыгъэнымкIэ ныбжьыкIабэмэ IэпыIэгъу афэхъугъ. Лъэгъо дахэ зэрэтырищагъэхэмкIэ, упчIэжьэгъу Iушэу зэрэщытыгъэмкIэ ежьхэри тхакIом фэразэх.
Адыгейми, Урысыеми ащыпсэухэрэм Кощбэе Пщымафэ ирассказхэм, иповестьхэм, иновеллэхэм, ироманхэм яджэнхэр якIас. Народнэ тхакIор икъэлэмыпэкIэ анахьэу зылъыIэсыгъэр мы аужырэ илъэс 200 — 300-м адыгэ лъэпкъым къырыкIуагъэр ары. ТхакIом зи ымыушъэфэу, дэгъури дэйри чIимыукъуащэу ылъэгъугъэр зэкIэ, игузэхашIэхэр къекIоу тхьапэм ригъэкIущтыгъэх…
Тэ, игупсэхэмрэ иIахьылхэмрэ, Пщымафэ лъэшэу къытфыщэкIэ. Ау ар зи зыхэмышIыхьажьышъущт Iофышъ, зыздигъэзэжьыгъэ дунаим тынчыпIэ щигъотынэу, псэпэшIагъэу иIэр фигъэбэгъонэу Тхьэм телъэIу. Пщымафэ инурэ джыри къытшъхьащыт.
Кощбэе Елен.