Террористическэ акт зэрэзэрахьащтымкIэ къэбар нэпцI языгъэIугъэ Д. П. Севостьяновым игъогупэ Адыгэ Республикэм ихэбзэухъумэкIо къулыкъухэм пабзыкIыгъ.

Мыекъуапэ щыщ Д. П. Севостьяновыр 2020-рэ илъэсым щылэ мазэм и 16-м полицием афытеуи, ПАО-у «Урысыем и Сбербанк» иотделениехэу Мые­къуапэ дэтхэм ащыщ горэ къагъэоным ищынагъо зэрэщыIэр ариIуагъ.

Ащ зигугъу къышIыгъэ унэр къызалъыхъум къагъэ­орэ пкъыгъо къычIагъотагъэп.

Оперативнэ-лъыхъун Iофтхьабзэхэр псынкIэу зэрэзэрахьагъэм ыпкъ къикIыкIэ къафытеогъэ хъулъфыгъэр зыщыщыр агъэунэфын алъэкIыгъ. Нэужым нафэ къызэрэхъугъэмкIэ, Д. П. Севостьяновыр 2000-рэ илъэсым къыщегъэжьагъэу Адыгэ республикэ клиникэ психоневрологическэ диспансерым иучет щыт, зэрэтыгъуагъэм къыхэкIэу УФ-м и Уголовнэ кодекс ия 158-рэ, ия 161-рэ статьяхэм атетэу ыпэкIэ ащ уголовнэ пшъэдэкIыжь рагъэхьыгъагъ.

ГъэIорышIапIэм оперативнэ-лъыхъун Iофтхьабзэу зэрихьагъэхэр яIэубытыпIэу Урысые Федерацием и Уголовнэ кодекс ия 207-рэ статья ия 2-рэ Iахь тетэу Д. П. Севостьяновым уголовнэ Iофэу къыфызэIуахыгъэм полицием икъулыкъухэр хэплъагъэх.

Адыгэ Республикэм и Мыекъопэ къэлэ хьыкум 2020-рэ илъэсым тыгъэгъазэм и 23-м ышIыгъэ унашъомкIэ Урысые Федерацием и Уголовнэ кодекс ия 207-рэ статья ия 2-рэ Iахь къыщыдэлъытэгъэ бзэджэшIагъэр Д. П. Севостьяновым зэрихьагъэкIэ алъы­тагъ, психиатрическэ IэпыIэгъу язытырэ медицинэ организацием ащ къыщеIэзэнхэу аухэсыгъ.

***

Террористическэ акт зэрэзэрахьащтымкIэ къэбар нэпцI къязыгъэIугъэ А. В. Ткаченкэм игъогупэ Адыгэ Республикэм ихэбзэухъумэкIо къулыкъухэм пабзыкIыгъ.

Станицэу Джаджэ дэс А. В. Ткаченкэр аркърэ наркотикрэ яшъуагъэу 2020-рэ илъэсым щылэ мазэм и 15-м хэбзэухъумэкIо къулыкъухэм ащыщ горэм афытеуи, Краснодар оборонэмкIэ и Министерствэ иеджапIэ къагъэоным пае лагъымэ чIалъхьагъэу ариIуагъ.

Ащ зигугъу къышIыгъэ унэр къызалъыхъум къагъэ­орэ пкъыгъо къычIагъотагъэп.

Оперативнэ-лъыхъун Iофтхьабзэхэр псынкIэу зэрэзэрахьагъэм ишIуагъэкIэ къафытеогъэ хъулъфыгъэр зыщыщыр агъэунэфын алъэкIыгъ. А. В. Ткаченкэр ыцIэ аримыIоу пчъагъэрэ полицием афытеуагъэу, бзэджэшIэгъэ зэфэшъхьафхэр зэрэзэрахьащтхэмкIэ къэбар нэпцIхэр афиIопщыгъэу нэужым къычIэкIыгъ.

Оперативнэ-лъыхъун Iофтхьабзэу зэрахьагъэхэр яIэубытыпIэу Урысые Федерацием и Уголовнэ кодекс ия 207-рэ статья ия 2-рэ Iахь тетэу А. В. Ткаченкэм уголовнэ Iофэу къыфызэIуахыгъэм полицием икъулыкъухэр хэплъагъэх. Психолого-психиатрическэ хьыкум экспертизэм ащ иакъыл имыунэежьэу къыгъэлъэгъуагъ.

Адыгэ Республикэм и Мыекъопэ къэлэ хьыкум 2020-рэ илъэсым тыгъэгъазэм и 11-м ышIыгъэ унашъомкIэ Урысые Федерацием и Уголовнэ кодекс ия 207-рэ статья ия 2-рэ Iахь къыщыдэлъытэгъэ бзэджэшIагъэр А. В. Ткаченкэм зэрихьагъэкIэ алъытагъ, психиатрическэ IэпыIэгъу язытырэ медицинэ организацием ащ къыщеIэзэнхэу аухэсыгъ.