Нэфсэт инэфынэ бэгъощт
ЦIыфымрэ гъашIэмрэ язэпхыныгъэ укъытегущыIэзэ, IофшIагъэу щыIэр къыхэогъэщы. Лъагъоу къыгъэнагъэм уасэ фэошIы.
КъокIыпIэм щыпсэурэ лъэпкъхэм искусствэхэмкIэ я Къэралыгъо музееу Мыекъуапэ дэтым Кушъу Нэфсэт илъэс 20-м нахьыбэрэ ипэщагъ. Игъонэмысэу дунаим ехыжьыгъэ адыгэ бзылъфыгъэр иIофшIагъэкIэ гъашIэм къыщытхэтэу тэлъытэ. Ащ фэгъэхьыгъэ сурэт къэгъэлъэгъонэу музеим къыщызэIуахыгъэм цIыфыбэ хэлэжьагъ.
ШIэжь къэгъэлъэгъонэу «Время портретов» зыфиIорэм уегъэгупшысэ, цIыфхэм атырашIыкIыгъэ сурэтхэм уяплъызэ, тянэ-тятэхэр, тинэнэжъ-тэтэжъ пIашъэхэр, цIыф цIэрыIохэр, ныбджэгъухэр нэгум къыкIэуцох. Гум щычэрэгъухэзэ, уадэгущыIэ пшIоигъоу ухэщэтыкIы.
ИгупшысэкIэкъытхэт
Къэгъэлъэгъоным икъызэIухын фэгъэхьыгъэ зэхахьэр Сулейманова Фатимэ зэрищагъ. Музеим ипащэ иIэнатIэ ащ егъэцакIэ.
Ф. Сулеймановам къызэриIуагъэу, Кушъу Нэфсэт иIофшIэн ыгъэгумэкIырэ цIыфэу псэущтыгъ. СурэтышIэу, архитекторэу зэрэщытыгъэм мэхьэнэ хэхыгъэ иI. Искусствэм икуупIэ гукIэ лъыIэсын, цIыфхэм шъхьэихыгъэу адэгущыIэн ылъэкIыщтыгъ.
Ригъэжьэгъэ Iофым зэригъэгумэкIырэр щыIэныгъэм къыщигъэлъэгъоныр шэнышIу зэрэфэхъугъагъэр дэгъоу тэшIэ.
Лъытэныгъэ фашIы
Адыгэ Республикэм культурэмкIэ иминистрэу Аулъэ Юрэ, ащ игуадзэу ШъэуапцIэкъо Аминэт, Адыгеим исурэтышIхэм я Союз итхьаматэу Елена Абакумовар, нэмыкIхэри зэхахьэм къыщыгущыIагъэх.
Гу пытэ зиIэ адыгэ бзылъфыгъэу Кушъу Нэфсэт зэрэщытыгъэр ягупшысэхэм къащыхагъэщыгъ. Аулъэ Юрэ къызэриIуагъэу, Кушъу Нэфсэт фэгъэхьыгъэ къэгъэлъэгъоныр дэгъоу гъэпсыгъэ, сурэтхэм уяплъызэ, хъугъэ-шIагъэхэр зэогъапшэх.
Адыгеим щызэлъашIэрэ сурэтышIэу Эдуард Овчаренкэм игукъэкIыжьхэр зэхахьэм къыщиIотагъэх.
— Нэфсэт сыдигъуи лъытэныгъэ ин фэсшIыщтыгъ, — игупшысэхэм тащегъэгъуазэ Эдуард Овчаренкэм. — Ащ нэIуасэ сызыфэхъугъэ 1974-рэ илъэсыр сщыгъупшэрэп.
Адыгеир нахьышIоу аригъэшIагъ
Э. Овчаренкэм изэфэхьысыжьхэр тшIогъэшIэгъоных. Темыр Кавказым, Къыблэ шъолъырым ясурэтышI цIэрыIохэм яIофшIагъэ фэгъэхьыгъэ къэгъэлъэгъонхэр зэхащэхэ зыхъукIэ, Мыекъуапэ къызэрэхахыщтым щызэнэкъокъух.
— Кушъу Нэфсэт сурэтхэм якъэгъэлъэгъон музеим щызэхищэ зыхъукIэ, чIыпIэу фигъэшъошэщтым, сурэтхэр лъэгъупхъэхэу къэлъэгъонхэм сыдигъуи мэхьанэ аритыщтыгъ, — къыIуагъ Э. Овчаренкэм.
Ары, сурэтышIхэм язакъоп Нэфсэт зыгъэгумэкIыщтыгъэр. Искусствэм пылъхэм иIофшIэнкIэ алъыIэсыщтыгъ.
ХэушъхьафыкIыгъэ чIыпIэр
Музеим къыщызэIуахыгъэ къэгъэлъэгъоныр гупшысэу халъхьагъэмкIэ гощыгъэу зэхэщакIохэм къызэрагъэлъагъорэм мэхьанэшхо етэты.
Кушъу Нэфсэт ишъхьэгъусэу Аслъан музеим ипэщагъ. Ащ исурэткIэ къэгъэлъэгъоныр къызэIуахыгъ. Нэфсэт тырашIыкIыгъэ сурэт заулэ нэплъэгъум ит. СурэтышI цIэрыIохэу В. Баркиным, Э. Овчаренкэм, Г. Назаренкэм, Л. Белых ятворчествэ уегъэгушхо.
Нэфсэт тырашIыкIыгъэ сурэтхэм тяплъызэ, искусствэм ыбзэкIэ тадэгущыIэ. Тыкъызэхахэу тлъытэзэ, тымыгуIэу апашъхьэ тит… Адыгэмэ зэраIоу, «нэм кIэтыр псэм фэд». Сурэтхэм тадэгущыIэзэ, джэрпэджэжь макъэхэр тхьакIумэм щызэIокIэх, Нэфсэт игущыIакIэ зэрэтщымыгъупшэрэр къыхэтэгъэщы.
Видеофильмэри гум къегущыIыкIы. ТхьакIущынэ Аслъанрэ Кушъу Нэфсэтрэ язэIукIэгъу, культурэм иIофышIэхэм яхьылIэгъэ нэпэеплъ сурэтхэм щыIэныгъэм щыщ къэбархэм уахащэ.
Сурэтхэм къаIуатэрэр
Къэгъэлъэгъоным изэхэщакIохэм тафэраз. «Время портретов» зыфиIорэм лIэужхэр зэрепхых. ЦIыфыр цIыфы щыIэныгъэм щызышIырэр зэбгъашIэ пшIоигъоу IофшIагъэхэм уяплъы.
Э. Овчаренкэм янэ исурэт зэришIыгъэм къыхэдгъэщырэр илъэсыбэкIэ зэкIэIэбэжьи, бзылъфыгъэм иобраз лъэхъаным диштэу къызэригъэлъэгъуагъэр ары. ТхакIохэу В. Твороговам, Г. Немченкэм ясурэтхэри лъэгъупхъэх. «Красноармеец» зыфиIорэ сурэтыри лъэхъанэу зыхэтым иджэрпэджэжь.
Гъогунэкъо Мухьарбыйрэ Хъуажъ Рэмэзанрэ Адыгеим исурэтышI цIэрыIох. Къэгъэлъэгъоным ахэр еплъыхэзэ, сурэтхэр агу зэрэрихьыгъэр къытаIуагъ.
ЦIыфхэм ясурэт 60 музеим къыщагъэлъагъо. Ным ехьылIагъэхэр гум къегущыIыкIых. СурэтышI 30-м нахьыбэмэ яIофшIагъэ музеим щыолъэгъу. М. Джикаевым, М. КIышъэм, Ф. ПэтIыуащэм, А. Къуанэм, А. Бырсырым, Н. ЛэупакIэм, В. Фаворскэм, нэмыкIхэм цIыфым ищыIакIэ къагъэлъагъо.
Кушъу Нэфсэт Москва, Ленинград хэкум, Къыблэм, Францием, Тыркуем, нэмыкIхэм ясурэтышIхэм яIофшIагъэхэр музеим къыщагъэлъэгъонхэм кIэщакIо, зэхэщакIо афэхъущтыгъ. Адыгэ бзылъфыгъэм ишIуагъэкIэ тиреспубликэ Урысыем, IэкIыб хэгъэгухэм нахьышIоу ащашIагъ, лъэпкъ зэфыщытыкIэхэм ягъэпытэнкIэ лъэпсэшIухэр ышIыгъэх. Музеим иIофышIэхэу Елена Малышевам, ХъуакIо Ларисэ, СтIашъу Юрэ, фэшъхьафхэм къызэраIуагъэу, Н. Кушъум ригъэжьэгъэ Iофыр щыIэныгъэм щылъыкIотэщт. Нэфсэт инэфынэ дунаим щыбэгъощт.
Къэгъэлъэгъоныр гъэтхапэм и 28-м музеим щызэфашIыжьыщт.
ЕмтIылъ Нурбый. Сурэтхэр музеим къыщытетхыгъэх.