«Ростов-Дон» Ростов-на-Дону — «Лада» Толь­ятти — 28:24 (13:11). Щылэ мазэм и 27-м Ростов-на-Дону щызэIукIа­гъэх.

Урысыем гандболымкIэ изэ­нэкъокъоу суперлигэм щыкIорэм хэлэжьэрэ бзылъфыгъэ командэхэм язэдешIэгъу гъэшIэгъонэу кIуагъэ. Дышъэм фэбэнэрэ клубхэм язэIукIэгъу заублэм, «Ладэр» текIоныгъэм нахь пэбла­гъэу къэ­лъагъощтыгъ. Пчъагъэр зэрэ­лъыкIуатэщтыгъэр: 2:0, 3:1, 3:3. О. Фоминам хъагъэм Iэгуаор дедзэ — 3:4. «Ростов-Доным» иешIакIоу К. Кожокарь зэкIэлъы­кIоу хъагъэм Iэгуаор гъогогъуи 2 редзэ — 5:4.

«Ладэр» ошIэ-дэмышIэу ыпэкIэ илъызэ, пчъагъэм хегъахъо — 5:8. А уахътэм Мыекъуапэ щапIу­гъэ Виктория Калининар цыхьэшIэгъоу зэрешIэрэм ишIуагъэкIэ къэлапчъэм «Ладэм» Iэгуаор ди­дзэн ымылъэкIэу бэрэ къыхэ­кIыгъ. К. Кожокарь, Ю. Манагаровам «Ладэм» икъэлапчъэ Iэгуаор дадзэ — 8:8. Владлена Бобровниковар «Ростов-Доным» дэгъоу щешIагъэхэм ащыщ.

Пчъагъэр — 25:18, зэIукIэгъур аухынымкIэ такъикъи 10 къэнагъ, 27:20 — къэнагъэр такъикъи 5. «Ладэм» иешIакIэ хегъахъо, пчъагъэр 27:24-рэ. «Ростов-Доныр» ухъумэн Iофыгъохэр зэ­ригъэцэкIэщтхэм нахь ыгъэгумэ­кIыщтыгъ. Аужырэ нэгъэупIэпIэгъухэм А. Смирновам хъагъэм Iэгуаор дидзагъ — 28:24-рэу ешIэгъур аухыгъ.

КъэлэпчъэIутэу Виктория Калининар такъикъ 55-рэ зэIукIэгъум хэлэжьагъ, зэхэщакIохэр къыщытхъугъэх, иIэпэIэсэныгъэ къыхагъэщыгъ.

Зичэзыу ешIэгъухэр

«Луч» Москва — «Астраханочка» Астрахань — 18:37 (9:15), «Кубань» Краснодар — «Звезда» Звенигород — 31:23 (13:12), ЦСКА Москва — «Астраханочка» Астрахань — 31:29 (17:13).

Зэтэгъапшэх

1. «Ростов-Дон» — 26 2. ЦСКА — 26 3. «Лада» — 24 4. «Астраханочка» — 24 5. «Звезда» — 22 6. «Кубань» — 16 7. «Ставрополье» — 12 8. «Университет» — 10 9. «АГУ-Адыиф» — 6 10. «Динамо» — 4 11. «Уфа» — 4 12. «Луч» — 4. Щылэ мазэм и 31-м «АГУ-Адыифыр» «Звездам» Мыекъуа­пэ щыIукIэщт.