Урысыем футболымкIэ иапшъэрэ куп хэт командэхэм яуплъэ­кIун зэIукIэгъухэр IэкIыб къэралхэм ащэкIох.

Зэхэт Араб Эмиратхэм, Европэм ихэгъэ­гухэм ешIэгъухэр ащызэхащэх.

Латвием икомандэу «Ригэм» 1:0-у «Краснодар» текIуагъ. Я 38-рэ такъикъым Э. Сперцян пенальтикIэ къэлапчъэм Iэгуаор дидзагъ.

«Краснодар» — «Шахтер» Солигорск — 3:0.

Къэлапчъэм Iэгуаор дэзыдзагъэхэр: Ка­белла — 43, Классон — 49, Сабуа — 90+1.

Зичэзыу уплъэкIун зэIукIэгъухэр «Краснодар» Европэм щыриIэщтых.

А. Миранчук ишIуагъэкIэ

Италием футболымкIэ и Кубок къыдэхыгъэным фэгъэхьыгъэ зэIукIэгъухэм тигуапэу талъэплъэ. Алексей Миранчук зыщешIэрэ «Аталантэр» финалым и 1/4-м «Лациом» щыIукIагъ.

Пчъагъэр 2:2-у щытэу А. Миранчук я 57-рэ такъикъым «Лациом» икъэлапчъэ Iэгуаор дидзагъ, «Аталантэ» 3:2-у текIоныгъэр къыдихыгъ, зэнэкъокъум щылъэкIуатэ.

Краснодар краим къыщыхъугъэ Алексей Миранчук игъэхъагъэхэм ахигъэхъонэу фэтэIо.