Адыгэ Республикэм и Къэралыгъо Камернэ музыкальнэ театрэу Хьанэхъу Адам ыцIэ зыхьырэм адыгабзэкIэ кIощт къэгъэлъэгъон егъэхьазыры.

Лъэпкъ культурэм щызэ­лъашIэрэ Цэй Ерыстэм ытхыгъэм техыгъэу «Угощэ дэгъумэ, урихьылIагъ» зыфиIорэр театрэм шIэхэу къыгъэлъэгъощт.

Адыгэ Республикэм искусствэхэмкIэ изаслуженнэ IофышIэшхоу, Испанием щыпсэурэ композиторэу Хъупэ Мурат орэдышъор ыусыгъ. Урысыем изаслуженнэ артистэу, Адыгэ Республикэм инароднэ артистэу, драматургэу Пэрэныкъо Чатибэ усэхэр ытхыгъэх. Урысыем, Адыгеим искусствэхэмкIэ язаслуженнэ IофышIэшхоу, режиссерэу Сулейманов Юныс къэгъэлъэгъоныр ыгъэуцугъ.

— ЩыIэныгъэм къызыдихьырэ зэхъокIыныгъэхэм такъыпкъырыкIызэ, хъугъэ-шIагъэхэр зэтэгъапшэх. Унагъом игъэпытэн, лъэпкъ шэн-хабзэхэр къэухъумэгъэнхэм, ныбжьыкIэхэмрэ нахьыжъхэмрэ язэфыщытыкIэхэм, нэмыкIхэм афэгъэхьыгъэ къэгъэлъэгъоныр театрэм иныбджэгъухэм агу рихьыщтэу тэлъытэ, — къытиIуагъ Камернэ музыкальнэ театрэу А. Хьанэхъум ыцIэ зыхьырэм ихудожественнэ пащэу Сулейманов Юныс.

Гуащэмрэ нысэмрэ язэфыщытыкIэхэр Кобл Зуретрэ ЛIый Бэллэрэ спектаклым къыщагъэлъагъо зыхъукIэ, артистхэм ярольхэмкIэ узыIэпащэ. Гуащэмрэ нысэмрэ зэгурымыIохэу къызэрэхэкIырэр артистхэм гъэшIэгъонэу къэгъэлъэгъоным къыщызэIуахы. Нысэр къоджэ щыIакIэм хэщагъэ зэрэхъурэри, адыгэ унагъом икъэбари артистхэм къагъэлъагъозэ, пIуныгъэм имэхьанэ гукIэ уфащэ.

Артистхэу Бэгъ Алъкъэсрэ Беданыкъо Жьыутрэ ярольхэр гъэшIэгъоных. Гуащэмрэ нысэмрэ язэфыщытыкIэ лъыплъэхэзэ, ежьхэри къоджэ щыIакIэм икъэ­Iотэн нахь хэщагъэхэ мэхъух. Бэгъ Алъкъэс искусствэм зыхэтыр бэшIагъэ. Ролым псэ къыпигъэкIэным фэшI зэфэмыдэ екIолIакIэхэр къегъотых. Беданыкъо Жьыут лъэпкъ искусствэм ибаиныгъэхэр ролым къыщызэ­Iуихынхэм фэшI тишэн-хабзэхэм, орэдым зафегъазэ.

КIэщакIох

Республикэ общественнэ движениеу «Адыгэ Хасэмрэ» Къэралыгъо Камернэ музыкальнэ театрэу А. Хьанэхъум ыцIэ зы­хьырэмрэ гъусэ зэ­фэхъухи, къэ­гъэлъэгъоным игъэуцун кIэщакIо фэхъугъэх.

— Адыгабзэм изэгъэшIэн, игъэфедэн, лъэпкъ шэн-хабзэхэм ныбжьыкIэхэр афэгъэсэгъэнхэм яхьылIэгъэ Iофы­гъохэр зетэхьэх, — къыти­Iуагъ Адыгэ Хасэм итхьаматэу ЛIымыщэкъо Рэмэзан. — Проектэу зэхэдгъэуцуагъэм къыдилъытэу Камернэ музыкальнэ театрэм тапэкIи тыдэлэ­жьэщт, зэхэщэн IофхэмкIэ Iэпы­Iэгъу тыфэхъущт.

Спектаклыр Мыекъуапэ имызакъоу, район гупчэхэм, къуаджэхэм къащагъэлъэгъощт. Гуащэр сыда зыгъэдэгъурэр? Нысэр унагъом екIуным фэшI сыда къызыщыригъэжьэн фаер, хэта зэдэIущтыр? Хъулъфы­гъэм унагъом чIыпIэу щыриIэм… Джэуапхэм уягупшысэзэ, артистхэм уядэIу.

— Нэбгырабэ къызэрэкIэлъэIугъэхэр, театрэм иныбджэгъухэм япчъагъэ зэрэхэхъощтыр къыдэтлъытэхи, къэгъэлъэгъоныр ятIонэрэу дгъэуцугъэ, хэхъоныгъэхэри фэтшIыгъэх, — къеIуатэ Сулейманов Юныс. — Адыгэ Хасэм лъэшэу тыфэраз. Гъусэныгъэу зэдэтшIыгъэр щыIэныгъэм щыдгъэпытэщт.

Камернэ музыкальнэ театрэу А. Хьанэхъум ыцIэ зыхьырэм къэгъэлъэгъоным ехьылIэгъэ уплъэкIунхэр шIэхэу щаухыщтых. Театрэр зышIогъэшIэгъонхэр, мэкъэгъэIухэм шъуяж.

Сурэтым итыр: къэгъэлъэ­гъон-уплъэкIунхэм артистхэр ахэлажьэх.