Спорт зэнэкъокъухэмкIэ 2021-рэ илъэсыр баеу щытыщт. Олимпиадэ джэ­гун­хэр, дунэе, хэгъэгу зэIукIэгъухэр зэхащэщтых.

Урысые Федерацием иныбжьыкIэхэм самбэмкIэ язэнэкъо­къухэр Ермэлхьаблэ, Ханты-Мансийскэ мэзаем ащыкIощтых. Мы мафэхэм бэнакIохэм зэIукIэгъу­хэм зафагъэхьазыры.

Илъэс 16 — 18 зыныбжь кIа­лэхэр, пшъашъэхэр мэзаем и 2 — 7-м Ермэлхьаблэ щызэнэ­къокъущтыгъэх, — къытиIуагъ Адыгэ Республикэм самбэмкIэ испорт еджапIэ ипащэу, спортымкIэ дунэе класс зиIэ мастерэу Делэкъо Адамэ. — БэнэпIэ алырэгъум текIоныгъэр къыщыдэзыхыхэрэр дунаим иныбжьыкIэхэм язэнэкъокъу хэлэжьэщтых. Тыжьыныр къыдэзыхы­гъэхэр Европэм изэIукIэгъухэм ащыбэнэщтых.

Адыгеим щыщ ныбжьыкIэхэр пэшIорыгъэшъ зэIукIэгъухэм ахэ­лэжьагъэх. Делэкъо Адамэ зэри­лъытэрэмкIэ, Ермэлхьаблэ зэ­кIохэм, тренерхэри, бэнакIохэри яIэпэIэсэныгъэ хагъэхъонымкIэ шIыкIэшIухэм алъыхъугъэх.

БэнакIор алырэгъум зыте­хьэ­кIэ илыягъэу гумэкIынэу щытэп, текIоныгъэм икъыдэхын зэрэ­фэхьазырыр зыдишIэжьын фае. Ермэлхьаблэ испорт еджапIэ зыщызыгъасэхэрэм Iоф зэрэзэ­дашIэжьырэм титренерхэм къыхагъэщыгъэр макIэп. Анахьэу анаIэ зытырадзагъэр опытэу яIэ хъугъэр лIэужхэм зэрагъэфедэ­рэр ары.

Мыекъопэ бэнэпIэ еджапIэм самбэмкIэ, дзюдомкIэ зыщы­зыгъасэщтыгъэхэм ащыщхэм Ермэлхьаблэ яIэпэIэсэныгъэ щы­хагъахъо, тренерэу Iоф зы­шIэ­хэрэр ахэтых. Мудрэнэ Бислъан Олимпиадэ джэгунхэм дышъэр къащихьыгъ.

Тэхъутэмыкъое районым ­испорт еджапIэ сэнаущыгъэ зы­хэлъ кIа­лэхэр, хэгъэгум медальхэр къы­щыдэзыхыгъэхэр щэбанэх. Рес­пуб­ликэм самбэмкIэ испорт еджа­­пIэ ипащэхэм ар къыдалъыти, ныбжьыкIэхэм язэ­IукIэгъухэр Тэхъутэмыкъуае щы­зэхащагъэх.

Урысыем изэнэкъокъоу Ермэлхьаблэ щыкIощтым Адыгэ Республикэм ибэнэкIо 25-рэ хэлэжьэщт. Къыблэ шъолъырым изэIукIэгъухэм хагъэунэфыкIырэ чIыпIэхэр къащахьыгъэх.

ХьакIэко Данэ, Екатерина Со­ловьевам, Кобл Рэмэзан, Гъомлэшк Анзор, Хьакъуй Амин Къы­блэм дышъэр къыщахьыгъ.

Тренерхэу Джарымэкъо Рус­там, Делэкъо Адамэ, Нэныжъ Байзэт, нэмыкIхэм ныбжьыкIэхэм Iоф адашIэ.

Ханты-Мансийскэ щыбэнэщтых Мэзаем и 11 — 15-м Урысыем иныбжьыкIэхэм самбэмкIэ язэIукIэгъухэр Ханты-Мансийскэ щыкIощтых.

Илъэс 18 — 20 зыныбжь кIалэхэр, пшъашъэхэр хэгъэгум изэнэкъокъу хэлэжьэщтых. Адыгэ Республикэм самбэмкIэ иеджапIэ итренер шъхьаIэу Гу­Iэтыжь Хъалидэ зэхэщэн Iофыгъохэр ыгъэцакIэхэзэ гущыIэгъу тыфэхъугъ.

— БэнэкIуи 9 Ханты-Мансийскэ кIонэу щытыр, — къытиIуагъ ГуIэтыжь Хъалидэ. — Пшъэ­шъитIурэ кIэли 7-рэ мэхъух.

Къыблэм изэнэкъокъу апэрэ чIыпIэхэр къыщыдэзыхыгъэхэ Анна Лодневар, Мыгу Миланэ, Гъомлэшк Анзор, Георгий Парфировым, Мерэм Нарт, нэмыкI­хэм зэIукIэгъухэм зафагъэхьазы­ры. КIалэхэм, пшъашъэхэм ябэ­накIэ хагъахъозэ самбэм ишъэф­хэм зафагъасэ. Адыгэ Респуб­ликэм ищытхъу спорты­шхом нахь лъагэу щаIэтынэу ти­спортсменхэм, тренерхэм афэ­тэIо.