Урысыем дзюдомкIэ ихэшыпыкIыгъэ ныбжьыкIэ командэ аштэщтхэм якъыхэхын фэгъэхьыгъэ зэнэкъокъу Красноярскэ щыкIощт.

Илъэс 18-м нэс зыныбжьхэр Красноярскэ щызэбэныщтых. КIалэхэри, пшъашъэхэри зэIукIэгъухэм ахэлэжьэщтых. Хэгъэгум ишъолъырхэм къарыкIыщт бэ­накIохэр пэшIорыгъэшъ зэIукIэгъухэм къащыхахыгъэх.

Къыблэм дзюдомкIэ изэнэ­къокъу ХьакIэко Данэ апэрэ чIыпIэр къыщыдихыгъ. Пшъа­шъэр Мыекъуапэ щеджэ, дзюдомкIэ иIэпэIэсэныгъэ хегъа­хъо.

Татьяна Шаталовар илэгъухэм къахэщы, бзылъфыгъэ дзюдор шIогъэшIэгъон.

Эдуард Мирошниковыр, Ордэн Батыр, Ваган Григорян, Мамхъо Астемир, Мэлыщэ Аскэр Красноярскэ щыкIощт зэнэкъокъум хэлэжьэщтых.

— ТиныбжьыкIэхэм загъэхьазыры, — къытиIуагъ Адыгэ Рес­публикэм дзюдомкIэ ихэшыпыкIыгъэ командэ итренер шъхьаIэу, Адыгеим изаслуженнэ тренерэу Бастэ Сэлымэ. – Урысые Федерацием ихэшыпыкIыгъэ командэ хагъэхьащтхэм якъыхэхын фэгъэ­хьыгъэ зэнэкъокъум мэхьэнэ ин иIэу тэлъытэ. НыбжьыкIэхэр шъо­лъырхэм зэрэщагъасэхэрэр зэфахьысыжьыщт, опытэу щыIэ хъугъэр нахьышIоу пащэхэм зэрагъэшIэщт. Щысэ зытетхыщтхэр зэнэкъокъум къыщылъэгъощтых.

Щылэ мазэм и 31-м къыщегъэжьагъэу мэзаем и 6-м нэс дзюдомкIэ зэIукIэгъухэр Красноярскэ щыкIощтых.