ФранцузыбзэкIэ къагъэгущыIагъэх
Адыгэ къэралыгъо университетым IэкIыбыбзэхэр зыщызэрагъашIэрэ факультетым ия 3-рэ курс ис студенткэхэу Татьяна Клименкэр, Виталия Комаровар ыкIи ХьакIэмыз Данэ зэнэкъокъум хэлэжьагъэх.
«Ciné de Noël: films russes en français» (Рождественское кино: русские фильмы на французском языке) зыфиIорэм мультфильмэу «Смешарикхэр» французыбзэкIэ къэгущыIэхэу агъэхьыгъэх. Зэшхэу Люмьер къыдагъэкIыгъэ апэрэ кинор къызагъэлъэгъуагъэр илъэси 125-рэ зэрэхъурэм зэнэкъокъур фэгъэхьыгъагъ.
Москва дэт кIэлэегъэджэ университетым IэкIыбыбзэхэр зыщызэрагъашIэрэ иинститут Iофтхьабзэм кIэщакIо фэхъугъ.
Зэнэкъокъум къэралыгъом ит къэлабэмэ ялIыкIохэм зыщаушэтыгъ. Москва, Липецкэ, Пензэ, Псков, Томскэ, Чэчэн ыкIи Саха республикэхэм, Адыгеим, нэмыкIхэм яныбжьыкIэхэр Iофтхьабзэм хэлэжьагъэх. Студент ыкIи кIэлэеджэкIуи 180-м ехъумэ зыкъыщагъэлъэгъуагъ, проект 41-рэ осэшIхэм арахьылIагъ.
Зэнэкъокъур лъэныкъуитфэу зэтеутыгъагъ: пычыгъом ихьылъагъэ (орэдхэр хэтымэ, геройхэр къызэрэгущыIэхэрэ шIыкIэр), зэрэзэрадзэкIыжьыгъэм идэгъугъэ, къызэрэгущыIэхэрэр, артистизмэу ахэлъыр ныбжьыкIэхэм къагъэлъэгъуагъ.
Зэнэкъокъум хэлэжьэнхэм фэшI тикъэралыгъо къыщыдэкIыгъэ фильмым е мультфильмым такъикъи 3 — 7 хъурэ пычыгъо къыхахын ыкIи ар французыбзэкIэ зэрадзэкIын пшъэрылъ яIагъ. Адыгэ къэралыгъо университетым щеджэрэ пшъашъэхэм «Смешарикхэм» ащыщ сериеу «Куда уходит Старый год» зыфиIорэр къахахыгъ. Iофтхьабзэм изэфэхьысыжьхэр онлайн шIыкIэм тетэу рекIокIыгъэх.
КъызэрэнэфагъэмкIэ, АКъУ-м икуп ятIонэрэ чIыпIэр къыхьыгъ. Я 2-рэ шъуашэ зиIэ диплом ахэм къафагъэшъошагъ. Французыбзэр языгъэшIэрэ кIэлэегъаджэу Людмила Шапинам джащ фэдэу рэзэныгъэ тхылъ къыфагъэхьыгъ.
Абрэдж Сэтэнай.